ENG VANGIN NGE KAN LAWM ANG?
Pu K.Lalengmawia, Bhutan
Thupuan 20:15, Luka 10 : 20
Vawiinah hian keimahniah hian tihian han inzawt theuh ila, ‘ eng nge kan lawmna? Engvangin nge kan lawm thin? Chhan tam tak a awm thei ang. Ringtute leh ringlo mite kan in an lohna chu kan thih hnu piahlam thil kan ngaihdan leh kan suangtuahnaah hian alang chiang hlein ka hria a ni.
Keini Pathian nung ringtu leh hnung zuitute chu kan khawvel zinkawng kan zawh tawp hnu ah chuan kan beisei leh kan nghahhlelh ber mai chu Vanram chatuan hmun thlen a ni. Ring lo mi kan tih kan bul vel a mite Hindu, Buddhist, Islam leh sakhaw dang betute chuan pian nawn lehna an rin avangin an damlaiin an theihtawpa tha a nun leh thil tha tih kha an tum a ni a. Chu chuan an piannawn lehnaah nasa takin kawngro a su dawn ni a an hriat avangin theihtawp an chhuah thin a ni.
Kan thih hnu-ah khawnge kan kal ang? Kristian te chuan kan kalna tur chu hmun hnihah meidil leh vanramah kan then a, kan kalna tur lam theuh chu kan in hre theuhin ka ring.
Awle, keini ringtu Isua hnung zuitu inti te vawiina Kohhrana rawngbawltu akul ataia inhmang em emte hian thil ngaihtuah tur pawimawh tak mai kan nei a ni. Rawngbawltute tawngkam lar tak mai pakhat chu, “Pathian mihriat nge kan nih, Pathian hretu” tih hi a ni. Keimahni-ah pawh hian Pathian mihriat nih kan duhin chutiang mite chu kan dah sang deuh bawk a ni. Pathian hretu ringawt nia kan hriatte chu tlemin kan hmu sir he deuh thin a nih kha. Mahse, Mathaia 10:29-30 kan chhiar chuan chawngzawng an hralh thin thu leh Pathian thu lo chuan pakhatmah leiah a tlak ngailoh thu leh mihringte Pathianin min hriatchian zia kan samzai lama chhiar vek a nih thu kan hmu a ni. Chu chuan chiang takin Pathian hian khawvel leh a chhunga thil awm zawng zawngte hi a hre chiangin keimahni mihring kan nihna chauh nimai lovin kan nun leh kan awmdan zawng zawngte min hrechiang em em a ni. Pathian hian khawvela mihring zingah hian hriat bik a neih loh zia a tilang chiang em em a ni. Pathian mihriat chu kan nisa tawh reng a ni. Amaherawhchu Pathian hretu kan nih leh phei chuan chu aia thil lawmawm chu a awm chuang lo a ni.
Luka 10:20-ah chuan rawngbawl tura tirh chhuah mi 70 te’n an rawngbawlna hmuna an hlawhtlinzia leh Pathian ropuina a lan nasatziate, lawm taka Isua hnena report an rawn pek thu leh Isuan a lo chhanna thu kan hmu a ni. Isuan, “Thil ropui leh thil makte in tih avangin lawm mai suh u, vana in hming ziah a nih vang zawkin lawm rawh u,” a ti a ni. Kohhran hruaitu ropui em em, Pathian rawngbawltu thahnemngai leh hlawhtling em em, thalai hruaitu lar leh thiltithei tak, kohhran nu rawngbawlna nung leh hlawk takah te hian kan lo duhtawkin Pathian hre em em leh Pathian thute hre takah te hian kan lo tawp mai em? Vanah Nunna Bu-ah kan hming chuang si lo hian Pathian mihriat chauh kan lo ni ang tih hi a hlauhawm a ni.
Thupuan 20:15-ah Johana’n hrilhlawkna a hmuhah chuan, “Tu hming pawh nunna bua ziak an hmuh loh chuan meidilah an paih bawk a,” tih kan hmu a ni. Kan thiltihte ropui leh tha hle siin Sardis khuaa Kohhran hote ang mai a thi reng si nung hming pu ang chauh kha kan ni ang tih a hlauhawm a ni. Isua hnung kan zuinaah hian pawnlam lang thei chauh ni lo chhunglam lang thei lo-ah pawh Pathian tan rinawm leh nun tak neitu kan nih a ngai a ni. Kan rawngbawlna hmun (kan awmna he lei) ah hian Pastor leh Kohhran hruaitu pawnlamah chuan angel ang, chhunglamah chuan ringlo mite rilru ang lek pu tam tak an awm a ni. Hengte hian ka rilru an tina thin a ni.
A tawp berah chuan Pathian tan kan theihna a tlem emaw, kan theihtawpa kan tih leh a hnung kan zuia a rawngbawl hna kan thawhna-ah hian Pathian mihriat ni a, Pathian hretu ni chunga, nakina vana kan hming an lam huna nunna bua kan hming a chuan ve ngei theih nan leh ka lawmman tur a ni tih hriain; Isuan kan hming nuna bu atanga a thai bo loh a Pathian leh vantirhkohte hmaah kan hming a tan tlat theihna turin Pathian hnenah i inhlan thar leh ang u.
Nunna lehkhabuah i hming a chuang tawh em?