NUN LEH THIL TIHA HMASAWN
Pu R.Lalchama (L)
“Engpawh nisela, kan thlen chin atang khan hma i sawn zel ang u” Philipi 3 : 16
Kan Lal Isua khan thihna hneha a thawhleh hnu khan a zirtirte hnenah khan thu ropui tak mai a chah a, ‘Lei leh vana thuneihna zawng zawng ka hnenah pek a ni tawh. Chutichuan, kal ula, hnam tin a mi zirtirah te siam ula, Pa leh Fapa leh Thlarau thianghlim hmingah chuan baptis ula, thu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin, in hnehah ka awm zel ang’ a ti a (Mat. 28 : 18 – 20)
Bible thu ropui tak kan han tarchhuah atang pawh hian keini Lal Isua ringtute, a hniakhnung zuitute dinhmun tur min kawhhmuh chiang hle a ni. Ringtute hi dinhmun ngai renga ding a, chêng reng turin min tlan lova, min leitu duh dan leh he khawvela a lokal chhan hi a theihna dan ang anga hril darh tura koh kan nih zia pawh a lang chiang nghal a ni.
Tunlai kan Zoram dung leh vangah hian Kristian ram tih khawpa hming mawi nei mek te hian mahni nun inbihchianga a tha lama Pathian leh a Kohhran tana hmasawnna dik nuna thanlenpuitu ni zel tur hian mahni hma zawn zelah theihtawp chhuah zawm zel turin tan ila sauh sauh zel ang u. Ringtu nun chu a thanglianin a luang chhuakin, a tha lamah hma a sawn chho zel tur a ni si a.
Kan tunlai khawvel Zoram zimte chhungah pawh hian kan Kristianna kawng leh hmasawnna min daltu mita hmuh tur leh benga hriat tur a va tam em! Chutih laiin han sawr zim leh ta ila, kan Kohhran bikah hian i han chhut lut leh ang aw. Kohhran inrelbawlna kawng hrang hrangah chuan hmasawnna hmuh tur a awm chho mek reng a. Amaherawhchu, kan Kohhran chhungah hian Pathian chhandamna hlutna tak tak la pawh pha lo engemawzat kan la neih te hi engtinnge ni zel ang le? Nang leh kei hian thawh tur leh hmasawnna tur kan va la ngah ve le. Kan chan ang chang a, kan hmuh ang hmu ve tura Lal Isuan a thisena a lei tawh te an ni asin. Chumi avang tak chuan keini rinna kawnga intlansiak mekte hi kan nunah tisa leh thlarauva thanlen tulnaa nun chhoh tam poh leh, kan Kohhran chuan lungrualna kawng kan zawh tam tial tial dawn a ni e.
Fak hla siamtuin:-
“I kiangah thimah mi an thu,
Thlanah thlamuanna nei lovin;
Meichher lain chhi eng zau rawh:
Thimchhah ber pawh a kiantir ang”
tih hla hi kan Kohhran chuan a takin hma a sawn pui tawh ang a. Keimahni theuhvah Lalpan ropuina pawh a chang zui zel tawh dawn a ni. Lalpa chu fakin awm rawh se.