Pathian fak leh chawimawi tute
Jonathan Lalremruata
Kan Pathian hi fak tlak Pathian a nihnate, chawimawi tlak anihna te leh chutianga Amah fak leh chawimawi tur kan nihna te hi inhrilhnawn vak a tul ka ring lo a ni. Amaherawhchu, kan rilru a kan lo chhan theuh atan, he zawhna pakhat chiah hi han zawh che u ka duh a ni. Tute nge Lalpa chu faka chawimawi thin? tih hi. Ngun taka inngaihtuahin i chhang dawn teh ang, chhanna ka rilru a awm lian ber chu Isaia 38:18-20 hi a ni. ‘ Thlan hian a fak thei si lo che a; Thihna hian a chawimawi thei hek lo che; Khuarkhuruma chhukte chuan i thutak chu an beisei thei lo a ni. Mi nungin, mi nungin, anni ngei chuan, vawiina kan tih ang hian an fak ang che;….’
Minungte chauhvin Lalpa fakin an chawimawi thin tih hi kan rilruah chiang sela tih hi ka han sawi hmasa duh a ni. Tute nge Minung a tih chu? Ka rilrua a fiah danah chuan Krista zara a tih nunte, Krista thihna a thi ve a, Krista ruala khaihthawhte hi Minungte chu an ni. Minung lo, Krista rual a kaihthawh ni ve lo, mitthi ten Pathian an fak in an chawimawi tak tak thei lo a ni.
Krista-a tih nun kan nih phawt loh chuan, Pathian hi fak a chawimawi ve a inngaiin, lâm vak vakin, zai vak vakin, rawngbawlna kawng hrang hrang ah hah em em in telin, ti ve thin mah ila, awmzia pakhatmah a nei lo tih hi kan hriatchian tul hlein ka hria a ni…. Thinlung bumhmang neitute kan nih tlat avang hian, eng dinhmunah chiah nge kan awm tih kan in enchian fo a pawimawh hle in ka hria a ni. A bikin kan ti teh ang, Pathian faka chawimawina chungchangah hian bum hi kan awl zual em aw? tih chang ka nei fo thin. Music leh hla hian kan nunah thu a sawi hma em em a, kan hla duhzawng tak, thiam taka an han sak changte, Pathian khawngaihna azarah kohhran alo hlim a, inkhawmna leh zaikhawmna a tui deuh mai a kan zai a, ka lam mup mup te hian, rilru a hlimin a nuam veng veng thin. Pathian hi fak leh chawimawi bik ta riau a inhriat a awl duh khawp mai. Kan nun pumpui a Amah fak leh chawimawi tur kan nih lai a, a huhova Pathian kan fakna hmunahte kan tel ve thin a, kan zai a, kan lam ve theih chuan tih tur tizo der anga inngaih mai a, duhtawk a, lungawi mai te hi a awl thin khawpin ka hria a ni. Heng vangte hi em ni ang…. saw nu/Pa saw, saw tlangval/nula saw… a lam a lam ve si a, kohhranah a inhmang tha ve viau si a, a rui leh ta, mi rel a thulh chuang lo, eiruk a sim chuang lo, mi tih ang zawng zawng a ti ve thei vek…. tih tur a kan awm fo thin hi tihte ka rilruah alo awm a ni. Mahni chuan Pathian fak a, chawimawi riau a kan inngaih reng lai hian, Pathian sawichhiatna hmanraw remchang takte hi kan lo ni leh hlauh thin em? Mahni theuh kan chian ka ring a ni. Krista thihna a thi ve lo, kraws a sual chinral loh, sual thihsan lo, sual sim tur kan neihte sim lo chung hian Pathian hi fak leh chawimawi thei a kan inngai anih chuan kan hre sual ngeiin ka ring a ni.
Tirhkoh Paula chuan, ‘Nitin ka thi thin a ti’. Nitin sual thihsan tur nei lem lo, ringtu tha tak an awm theih kan ring em? Krista thihna a thi ve lo, sual sim lote hi Krista rualin kaihthawhin an awm ngai lo, a chhan chu kaihthawh tur, thi kha a awm tlat lo alawm.
Thlarau thianghlim hmanga, i kalsan tur sualte hriattir i nih kha i kalsan loh chhung chuan, nungin Lalpa i fak thei ngai lovang tih i hriatchian ka duh a ni. In hlim ve hluai thin anga, lamtualah chuan nuam ti takin i lam mai thei, Pathian pawh fak viau leh chawimawi viauin i inhre mai thei. Mahse, chung programme-te chu a tawp rualin i fakna a tawp ang a, i nunin Lalpa a chawimawi ngai lovang tih hi kan hriat a pawimawh hle a ni.
Pathian khawngaihna avanga, kan insiamthatna tur, kan kalsan tur sual te, zawite a Thlarau thianghlimin min hriattir thinte hi i ngaizam lovang u. He Thlarau thianghlim aw kan ngaihzam nasat lutuk avang hian Ringtu kan nih tawh hnu pawh hian, kan nun atanga Pathian fakna leh chawimawina tak tak hi a chhuah theih loh phah fo thin niin ka hria a ni. Hawh u, Krista thihna a thi ve turin kraws bulah chuan kal ila, kan sualte thupha chawiin, simin, a hnenah i inhlan thar ang u… tichuan, nungin Lalpa chu kan fakin kan chawimawi thei ang.