KAWNG LEH THUTAK LEH NUNNA
Vanlalnghaka Hnamte
Isuan a hnenah, “Keimah hi kawng leh thutak leh nunna ka ni;keimaha kal lo chu tumah Pa hnenah an thleng ngai lo. Kei mi hria ni ula, ka Pa pawh in hre tawh tur; tun achinah amah in hria e, amah in hmu tawh bawk,” a ti a.
Isua hian helai Baibul changah hian kawng leh thutak leh nunna anih thu chiang takin min hrilh a. A then te te hian i han bih chiang ila.
Kawng awm chhun: Chatuan thihna leh nunna (Pathian nena inzawm lehna) chang thei dinhmunah mihringte hi kan ding a. Chatuan nunna chang thei tur hian kan hremna tur chu kan tuar phawt a ngai lawi si a. Chu chatuan nunna chang tur chuan Isua Krista hian Kraws lerah kan tuar aia min tuar sak a ni .Chu kawng awm chhun min siam sak tu chu Isua Krista, Pathian fapa ngei hi a ni. Chu min tuarsakna chu a awm loh chuan chatuan nunna nei thei dinhmunah hian kan ding lo hrim hrim a ni. Pathian hmangaihna Krista a lo lang chu fakin awm rawh se.
Thu tak: Thu tak khingpui hi enge a nih kan tih chuan dawt (thudik kim lo) kan ti thei awm e. Johana 8:44 ah khan dawt hmuchhuaktu pa kan hmu a. Tin, mihringte hian engvangin nge dawt hi kan lawm em em tihte a rawn sawi lang a nih kha. (Dawt hi kan pianpui tawng a ni tih chiang takin min hrilh a nih kha). Thutak emaw, thudik emaw hi Isua Krista nihna a ni ve thung si a ni. Isua khan a ma tuarna turah (Pilata hmaah) dawt sawi lo in Lal a nih thu kha a la sawi ngeuh ngeuh mai a ni. A chhan chu Isua leh dawt hian inlaichinna an neih miau loh vang a ni.
Chatuan nunna: Hei hi a hmasa bera awm zawk awm tak hi ni hian ka hre thin. Isua Krista hi chatuan nunna nei a ni. Kan han piangthara chatuan nunna kan nei emaw te kan in ti thin. (Chatuan nunna nen chuan kan inzawm zawk a ni. Johana 14:20) Isua ang turin theih tawp kan chhuah thin. Thlemnate kan han do ve tang tang, a tawngtai pawh kan tawngtai nasa, kan fight nasa thin. Mahse, thlemna chu a chak zawk si a kan tlu leh thin a ni. Heti zawng hian i sawi teh ang. Isua zawk hi nangmah aiah khan thuneihna han chantir ve zawk teh. Isua chuan a duh zawng han ti zawk teh se. He Isua hian thlalerah khan thlemna zawng zawng a ngam vek tawh. Nang leh kei angin thlemna ah a tlu ve lo. Chuvangin Isua ang turin emaw, Isua tan a nung lo in, nangmahah khan chatuan nunna Isua chu nun tir zawk la (Isua Kristan kraws ah i tan a tuarsak che tih i pawm zawh hnu hian Isua chu nangmahah a nung tih ring ang che), a duh zawng leh a ngaihtuah zawng leh a lawmna pawh a dang tawh ang. Dawt sawi i tumin a phal tawh lo ang, sual tih i tumin a phal lo ang. A chhan chu nangmahah khan, nangmah aia thuneitu leh a thu i zawm zawk (roreltu) chu a awm tawh dawn a ni. Chuvangin, Isua chatuan nunna hi i thinlungah (chatuan nun i neih theih nan) lo chen tir ve ang che. Galatia 2:20 “Krista hnenah khenbehin ka awm ta; nimahsela ka nung a ni; keimah erawh chu ka ni tawh lo. Krista chu keimahah a nung zawk a ni.”