ENGE NGAIH PAWIMAWH TUR
Sentea Ralte
Khawvela kan lo pian hian thi leh turin kan lo piang a ni tih hi chu kan hre vek awm e. Mahse kan rilru luah bertu a nih loh mai bakah dik tak chuan ngaihtuah pawh kan ngaihtuah tha duh lo thin a ni. Mihringte hi lo piang a thi leh tawp mai tur chu ni ila a zia ngawt ang. Mahse kan thih chiah hian kan chatuan hun hian min lo hmuak lai tak hi a manganthlak lai tak chu a lo ni ta a ni.
Bible chuan mihring dam hun chhung rei lohzia hi uar tak takin a sawi thin a, rei lo a ti em em mai a; chhum rei lote lo langa ral leh ta ang mai hi a ni ti ten a sawi a, kan chatuan hun nen a tehkkin phei chuan mit khapkar ang lek a ni tih tein min hrilh thin a. Tin, kan khualzinna ram mai a ni tih min hrilh bawk a ni. Pathian hrelo leh ringlotute hi chu thuhran lo ni ta se, tinge heng zawng zawng hretu ringtute zawkah pawh hian kan thil ngaihpawimawh ber anih loh fo mai thin ni ang ka ti ve fo thin a ni.
Kan hringnun hman chhoh dan hi uluk deuha a han chhut hian kan hmalam hun atana inbuatsaihna atan hian kan hmang zo vek mai ni hian a lang thin a ni. Naupang chu a puitlin hunah hna tha tak thawh tur a lo neih a, hlawhtling taka a nun a hman theih nan neih phak bakin nu leh pa ten lehkha an zirtir thin a. A lo puitlinga hnate chu a lo thawk ve thei ta a, chhungkua hial din theiin a lo awm a, a fate tan a inbuatsaih leh a, chumi pah chuan in leh lo din chu mihring damchhan ber emaw tih mai turin chumi kawngah chuan an intlansiak leh a. Chubakah an lo upat a hna an thawh theih loh hunah harsa lutuk lo a an awm theih nan inbuatsaih reng rengin hun an hmang leh a. Hringnun hi chu intlansiakna a ni e an lo ti thin a. A lo ni ngei mai. Kan hmalam theuh panin theihtawp chhuahin kan tlan vek zawng a lo ni.
Lal Isua chuan tehkhin thu a sawi a, Luka 12:16-21 ah chuan mi hausa pakhat hlawhtling em em mai chanchin tehkhin thu kan hmu a. Chu pa chu lo hlawk em em mai a,a thawh chhuah sa buh leh bal dahna pawh chu tih len belh hial ngai khawpin a lo hlawhtling ta a. Tichuan a tih len hnu chuan hahdam tak a awm a a, thawh chhuah chu chen tuma a rilru a siam mek lai chuan. “Mi â zaninah hian i thlarau an laksak dawn che, i thil deh chhuahte kha tu ta nge ni ta ang,” tiin Pathian aw a hre ta a ni. He khawvela awm kan la nih miau avangin a dik lo chu a ni chuang lo e. Mahse, ngaih pawimawh zawk tur hi a awm a ni.
He khawvel a hun tlemte, reilote kan neih chhunga chu ngaih pawimawih tur zawk ngai pawimawh lo kan nih chuan pawi kan la ti hle dawn a ni. Chatuan hun nena tehkhin chuan kan dam chhung ve hi chu mit khap kar lek ang chauh a ni tih Bible in min hrilh a. Tinge hun reilote a tana kan awmna tur pawh tih takzet a kan beiha kan sual chhuah thin lai hian chatuan hun kan hmanna tur atan hian tih takzeta kan inbuatsaih lo fo thin ni ang le. Kan duh emaw duh lo emaw pawh ni se kan chungah ala thleng anga, kan chatuan hmun hi kan la pan vek dawn a ni.
Bible chuan kawng dik lo lama kan kal hi a hlau hle mai a, kawng dik zawh turin vawi tam tak Bibe-ah min hrilh a. Kawng thlan turte min hrilh nasa hle a ni. Johana 14:16 ah chuan, “Keimah hi kawng leh thutak leh nunna chu ka ni; keimaha kal lo chu tumah Pa hnen an thleng lovang” tiin Lal Isuan min hrilh a ni. Chatuan hremhmuna kan kal lohna turin Lal Isua pawh kha khawvelah lo kalin kan tan a rawn thi a nih kha. Chuvangin he khawvela hun rei lote kan hman hi fing takin hman i tum ang u.
Tupawh mai hian Pathian hi kan tawh hun ala thleng dawn a, Lal Isua hi alo kal leh ngei dawn a, kan thih hma leh kan tawk hma anga. Lal Isua lo kal laia kan la dam a nih pawn kan tawk dawn tho a ni. Thupuan 22:12 ah chuan, “Ngai teh, ka lo kal thuai dawn e; mi tin an thiltih ang zela pek turin ka lawmman ka hnenah a awm a,” tiin kan hmu a. He khawvela kan thil tih leh hun hman dan khan kan chatuan hun hman dan tur kha a hril dawn a ni.
Chuvangin engtik hunah pawh nise, Lalpa hmaa kan din huna hlim taka Amah tawktu kan nih theuh theihna turin he khawvela hun tlemte kan neih hi Lalpa tan i hmang ang u.