TU NGE I HMANGAIHNA MAMAWH?
(STK Main Project- ‘Mi dangte Krista hnena hruai’ pualin)
Pu Vanlalpeka
“Tin, a ni chuan a hnenah, ‘Ka fapa, ka hnena awm reng i ni alawm, ka neih zawng zawng hi i ta a ni e. Hlim tak leh lawm taka awm tur a ni reng alawm; he i nau hi a thi a, a lo nung leh ta a, a bo va, kan hmu leh ta a ni si a,’ a ti a,” a ti a. (Luka 15:31&32)
Khawtlang nun zirtu pakhat chuan chhûngkaw lian tak atanga chawrchhuah harsatzia sawina lehkhabu ziah a tum a. Tichuan nu pakhat fa 13 lai nei chu a va kawm a. “I fate zawng zawng hian an nu hmangaihna inang theuhva an dawn a, angkhat theuhva ngaihsak an tul ang maw?” tiin a zawt a.
Nu chuan, “Tehreng mai” tiin a chhang a. Chuti chu tu nge i hmangaih ber? tiin a zawt leh a. A ni chuan, a damlo apiang, an dam hma chuan ka hmangaih a. Zin bo apiang an lo haw leh hma chuan ka ngaihsak ber thin,” tiin a chhâng a.
He nu chhanna atang hian, sawmkua pakua te kalsan a, berampuin a bo pakhat a zawn thu te, nu pakhatin duli bo a zawn thu te, fapa tlanbo lo haw veleh a pain ruai a buatsaih dan te hi ngaihtuah tham fe a awm in alang.
Isuan mi sualte a ngaihsak viau mai kha Pharisaite’n an ngaimawh hle a. Uire nu thiamloh a chantir duh lova, Chhiahkhawntu- Zakaia inah a thleng bawk a nih kha. Lal Isua hian sual a haw lo a ni lova, sual sim nan uirenu hi thiam loh a chantir duh lova, Zakaia’n a tih sual tawh loh nan a thlen chilh mai zawk niin a lang. Fapa tlan bo thu te, duli bo thu te, beram bo thu te a lo pian chhan chu, Isuan misual leh mi bo te hi , mi fel te leh mi bo ve lo te ang thova a hmangaih vang a ni.
Kohhran pawh hi chhungkua ang kan nihna lai chen a awm a, Kohhran hruaitu chu memberte nu leh pa an ni kan ti thei awm e. Pathian thuin min zirtir anga kan nunpui dawn chuan; nu leh pa chuan fa fel a hmangaih angin fa sual a hmangaih a ngai ang a. Kohhran hruaitu chuan, member fel leh tha leh tangkai te a ngaihven angin, member zinga sual deuha kan hriat te leh kohhran ngaihsak lo te thlengin a ngaihven a ngai ang. Chutiang bawkin tu leh fate’n kan nu leh pate kan hmangaiha, an thu kan awiha, an thatna tur kan duh sak ang bawk hian member-te pawh hi hruaitute lakah kan hel tlat a fuh lovang, tin, hruaitute demna leh selna anka chhakchhuak mai mai lova, an hmalakna leh rawngbawlna tihlawhtling tura kan zui pawh a ngai ve ngei ang. Pathian chhandamna hi mi zawng zawng tan a ni a, hmangaih bik leh duhsak bik a nei lova, keini’n duhsak leh hmangaih bik kan lo neih ve hi a rem mawlh lo.
Hmangaihnain a ngen chu hmangaihna a ni a, hmangaihna chhanletna awm chhun chu hmangaihna bawk a ni. Nangmah i inhmangaih angin i vengte hmangaih rawh tih a ni kha. Tute nge i vengte? TU NGE I HMANGAIHNA MAMAWH? Hmangaihna tel lo chuan tu nge mi bo zawng peih ang?