THLARAU MI NIH CHHINCHHIAHNATE:
‘That Incredible Christian’ by A.W.Tozer
‘Thlarau mi’ kan tih te hi eng ang mi nge ni ang le? Ring taka Pathian thusawi peih tak te hi nge, thawm nei hluah thin te nge ni ang, Biak In-a rei tak leh ring taka tawngtai thin te hi an ni mai angem le? Testimony leh sharing sawi tur ngah te, Pathian fak leh chawimawi chakte hi thlarau mite ze pakhat a ni ngei mai a; heng ziate hi anmahni ngawt hi chuan thlarau mi nihna a ni ngawt bik lova, hetianga lo lang chhuak phenah hian, thlarau mi nunah chuan chawl lova anmahni nun khalhtu leh control-tu a awm thin a ni. Thlarau mi nuna bet tlat tur kawng 7 a awm a, chungte chu hengte hi an ni:
1. Thlarau mi chuan a hlimna leh lawmna aiin thianghlim duhna, Pathian an duhna a nei lian zawk thin. Pathian duhzawnga, a nun chuan Pathianin a tul angin hlimna leh lawmna a pe zawk thin tih hria in a ngai pawimawh zawk thin.
2. Thlarau mi chuan a nunah Pathian zahawmna a lan chhuah hi a duh ber leh a ngaih pawimawh ber a ni a, chu nun a neih theihna tur chuan a tuar leh mualpho pawh a huam thin. “I hming zahawm rawh se” tia a tawngtai apiangin, ‘Lalpa, I hming a zahawmna tur anih chuan, a man engzat pawh ka pe ngam e’ a ti tel thin a ni.
3. Thlarau mi chuan nitin, a kraws a pu ngam bawk. Mi tam takin kan nitin nuna harsatna leh manganna kan tawh te hi kan kraws emaw kan ti fo thin. Heng harsatna hi chu mitin – misual leh mi tha pawhin kan tawn theuh a ni. Kan kraws put tur hi chu Pathian thu zawm kan duh avang chauh va kan tawn harsatnate hi a ni a, Pathian thu kan zawm loh avanga kan chunga thleng lo tur te an ni. Tih luih ni lovin, kan duhthlanna ngeia kan tawn, Krista thu zawm kan duh avang chauha kan paltlang ngaite an ni a. Hei hi Pathian hnena kan intukluh zia lantirna a ni.
4. Thlarau mi chuan mihringte thlir dan ni lovin, Pathian thlirna atangin thil a thlir thin. Mahni leh midangte ngaiha awm leh mawi ni mai lovin Pathian thlirna atangin a dik tawk em? Pathianin a pawm ang em? tiin a thlir thin. Pawn lam lan dan piah lamah, a chhungril takah Pathian duhdan a ni em? tih a chhut tel pha thin a ni.
5. Thlarau mi chuan thihna a thlir dan a danglam thin. A dam rei leh rei loh aiin a dam chhungin a nun in Pathian a chawimawi em? Khawvela a hun hi lo tawp dawn ta ni se, Pathian tawk turin a in peih em? Kristaah a nun a innghat em? tiin a dam chhung ni a chhiar zawk thin.
6. Thlarau mi chuan amah aia midangte an lan sarh a, an lo lar zawk hian a thinlung takin a lawm thin. A rawngbawlpuite’n amah aia dinhmun tha zawk leh sang zawk an chanin Pathian remruat a ni e, tiin a a lawmpui thei thin. ‘Ani chu tlatlum tur a ni, kei chu lang tur ka ni’ a ti ngam thin.
7. Thlarau mi chuan tun dinhmun chauh thlir lovin chatuan mit in thil a thlir thiam thin. Tun dinhmuna tha leh mawi mai ngaih tuah lovin Pathian thu zawm a, Pathian duhdan ang chu ,tih hlawhtlin a tum tlat tawh a. Mi lar nih ai chuan Pathian mi hmantlak nih a tum a, rawngbawl saka awm lova rawngbawltu nih zawk hi a nihna tur a ni tih a hrechiang thin.
Heng ang nihna hrang hrangte hi mahni tumna leh theihnaa neih chi a ni lova, Pathian Thlarau Thianghlimin amah duha lawmtute hnena a pek an ni.