HAHCHAWLHNA DIK ISUA KRISTA
Esther LD Hrahsel
“Nangni thawkrim leh phurrit phur zawng zawngte u, ka hnenah lo kal ula, keimah ka chawlhtir ang che u… ka nghawngkawl chu a nuam a, ka phur pawh a zâng a ni” Matthaia 11:28-30
Chhiartu duhtak, Isua Krista hmingin kumthar chibai ka buk a che. Hun chêp leh bichilh tak karah Editorial Board-te kaltlanga A thu puanchhuah theihna hun Lalpan min hawn sak hi ka lawm hle a, keimah ang bawkin hlawkna pakhat tal i hmuh ngei theih nan Pathian hnenah ka dil bawk a ni.
He khawvela kan chên ve Lalpan rem min tihsak chhûng hian tu hnenah nge tih leh khawiah nge hahchawlhna, hlimna leh thlamuanna kan zawn thin tih kan inngaihtuah ngai em le? He thuziak i chhiar mek lai hian i rilruin han ngaihtuah vang vang mah teh. Chawlhna hmuh tuma i tlânna kawng kha a dik leh dik loh nangmah vêkin i hrechiang ber turah ka ngai e.
Mihring tungchhova kal tawh phawtte hian remna leh muanna, hlimna kan zawng fo thin a, mi thenkhat chuan hausakna hi hlimna emaw tiin chu kawngah chuan an theihna piah lam thlengin, eirukna leh hlemhlêtna tein an nun an eichhiat tir thin a, mi thenkhat chuan nulat/tlangval hlimna zawngin an duh leh tum aia thuk zawkah an tâng mek bawk a. Mi thenkhatte erawh chu zu leh ruihhlo chi hrang hrangah an hmuh beiseiin chu lamah chuan chak takin an tlân a, anmahni ngei pawhin tha an tih tawh loh leh an nin êm êm thlengin hrehawm tihna nen an hun an hmang ral thin.
Heng kan sawi point pathum (3) avang chauh pawh hian mi engzatin nge an nunna hlu tak tichhia a, boralna kawng zawh mêk tih leh, an beisei chawlhna tak tak chu an hmu em tih chu a hretute kan nih ngei ka beisei. Setana bumna rapthlâk tak avanga bumtu sala tâng mekte hian engatinge anmahni pawn a tha lo tih an hriat reng kawng zawha an phar buai viau si le? AN NUNIN A MAMAWH, HAHCHAWLHNA DIK NEITU KRISTA PAN NACHANG AN HRIAT LOHVANG MAI A NI.
Kan Bible châng tarlanah hian, Lal Isua tawngkam mawi leh duhawm tak kan hmu a, harsatna hrang hrang tâwk thei leh thi thei mihring mai kan nihzia te, thildangah zawngin tlân mah ila kan hmu ngai dawn lo ani tih min hriatchian em avangin hmun dang leh kawng danga zawng lova Amah pan turin min hrilh chiang hle a ni.
Kuma lama naupang zawk leh khawvel chen ve chakna thinlung neih lai te, mahni chakna leh finna te chhuang a, fit ve ni-a kan inhriat lai hi chuan hmun dik lo zâwka hlimna zawn hi a awl khawp mai. Mahse, min hmangaih êm vanga a nun min petu kan Pathian chuan chu kawng chu kan zawh a hlau em em si a ni.
I eizawnnaah, i sawmdawnnaah, in chhungkaw boruak tawn mek leh i mimal nunah te harsatna tawkin, midang hriatpui si lovin lungngai leh mangangin, chakna rêng nei tawh lo angin i awm thin em? Thihna leh natna avanga khawharna leh hrehawm i tawrhna kha remchanga hman tumin setana’n i beiseina tihchhiat sak che a tum thin em le? Krista-ah hahchawlhna famkim a awm e.
Kum thar (2019) kan chhiar chhohna turah hian harsatna leh chhuanlam chi hrang hrang hmanga setanan thanga min awhtir a tumna hi hrethiamin, hahchawlhna dik Krista a awm tih hi hre thar leh ila, kum bul min tanpuitu leh kan nun min hruaitu ni turin i sawm thar leh ang u.
Khawvelah hian hlimna chhetê chu a awm ve ngei a, mahse, a tâwpna erawh chu lungngaihna leh chatuan atana thihna mai a ni si a! “Ka nghawngkawl chu a nuam a, ka phur pawh a zâng a ni” ti a min chahtu thuchah hi hre rengin, kan thlarau tana chawlhna dik kan hmuh theih nan pan tur dik Krista hnen i pan zel ang u tiin kan insâwm thar leh a ni e.
A thu malsawmtu Pathian ropui ber rawh se.