“Keimah hi kawng leh thutak leh nunna chu ka ni, Keimaha kal lo chu tumah Pa hnenah an thleng ngai lo.” Johana 14:6
Tv. R. Lalmalsawma
Isua Krista khawvela a lo awmlai khan, zirtirna tha leh rintlak tak tak a sawi a, Chatuan nun kan neih theihna turin rawngbawlnan a hun pumin a hmang. Pathian mihringa a lo channa hi ropui hle mahse, a hunlai khan Pathian fapa a nihna awih har an ti hle thin kha a ni a. A thu sawi leh zirtirna te chu mak an tiin, an rilru a hneh changte a awm thin thu kan hmu theuh a.
Amaherawhchu, thenkhatin an awih an awih a, thenkhatin an awih lem lova. Khawvel finna leh felna khan thu mawl te te sawi a, zirtirte kha a dodal leh thin a. Pharisaite leh lehkhaziaktute phei kha chuan an awih lo mai ni lovin, Isua zirtirna kha nasa takin an dodal a nih kha.
Pathian Fapa Isua Krista mihringa a lo channa hi thilmak tak a ni. Engkim tithei chungnungber a nihna hlipthla a a thilsiamte hnenah cheng tura he khawvel dan anga a lo piang hi hmangaihna leh tlawmna thuk tak a ni si a. Mirhing rilru hian a chhuichhuakin a hmufiah phak lo reng a ni. Khawngaihna avangin kan lo dawngsawng thei ve chauh a ni si a.
Isua Krista Lal leh chhandamtu a nihna hrefiah turin kan nihna ang anga a hnenah kan in tukluh angai. Lal Isua lo pian dan leh bultanna hi tlawmna atang a nih avangin, hausa leh thiltithei riauva inhriatna atang chuan a hunlai khan zui a harsa an ti a nih ka ring. Engemaw kan nunah hlipthla a, Isua Krista zui turin kan inbuatsaih thar a tul thin.
Ringtute Isua Krista hnungzui tura kan inpek hi thil tha tak a ni: Isua Krista hnungzui aa rawng kan bawl mek hian khawvel par mawina te hian kan bulah kan hmuh theiha thla an lo zar ve reng si a. Engchin hi nge kan neih anga, engchin hi nge kan khawlkhawm anga, engchin hi nge kan lak ang, tiin kan ngaihtuah ve fo thin anga. Kan rilru aindona lian tak awm thin hi hrilhfiah a har chang a tam khawpin ka hria. A thim zawnga thil thlir mai lova, Pathian atanga finna nei tura kan tawngtai fo angai ang a, Pathian thu in min hrilh, Isua ngeiin a sawi, ‘kawng leh thutak leh nunna’ a nih thu min hrilh a. Kan thlarau nun chawm tur sauh sauh turin Pathian thu thiltihthei hmanginchet kan lak thar leh atha hle mai. Beidawnna ata beiseina nung kan neih thar fona turin, kan thlarau nun thanlenna hmunah kan awm fo a ngai a ni.
Tlangkawmna: Kan dam chhungin thil hrang hrang tiin leh hna hrang hrang thawkin kan awm a ngaia. Kan mamawh kan thawhchhuah a tul a. Kalkawng him leh dik zawh theuh thei turin Pathian thu kan chhiar a, kan zir chian a, tawngtaina nenabeiseina thar Kristaah kan neih thar theuh theih nan tan ila thar theuh angu.