KRISTA THAWHLEHNA LEH KHAWNGAIHNA
Rev. Eddie C. Laldinsanga
1 Petera 1:3 ‘Ani chuan a khawngaihna nasa tak ang zelin, mitthi zing ata Isua Krista thawhlehna avangin beiseina nung hmu turin min hring leh a’
Isua Krista thawhlehna ropui zia hrefiah tur chuan mihring nihna leh dinhmun hi hriat hmasak a tul a ni. Mihring chu bawhchhiatna avanga Pathian hmaa thiamchang zo tawh lo, thianghlimna danin a phut pawh tihlawhtling zo tawh lo a ni a. Chu mihring chu thain lang ve thin mah se; Pathian rorelna hmaah erawh chhuan tur engmah nei lo, chhe lailet der a ni reng a, mi sual ber thihnaa thi tlak, hrem phu hliah hliah mihring a lo ni. He nihna leh dinhmunah hian mi a inhmuhchian loh chuan Krista thawhlehna hi a hrefiah thei ngai lovang.
Pathian hmaa mihring kan inhmuh dan tur chu thatna nei lo, thiamloh chang tawh hnu kan nihna inpawm leh chutiang taka awm chu a ni. Hlain ‘That ka tum veleh ka sual leh thin’ a tih hi mihring nihna dik tak a ni a, that tumin felna kawng zawh ve pawhin inhre thin mah se; mihring hi Pathian hmaah pawm tlak a ni chuang lo. Pathian hmaa chhe lailet der kan nihna hi kan inpawm a ngai a ni! Petera’n Krista hmaah ‘Lalpa, mi kalsan rawh, mi sual ka nih hi’ a tihna thinlung hi kan kristian nun hmasa leh Kristaa kan thawhlehna kalkawng a ni tih kan hriat a va tul em!
Chutiang taka hmalam hun thim mihring chuan eng nge a mamawh kan tih chuan, ‘Khawngaihna’ chauh chu a ni. Khawngaihna chu mihring thiamchanna tur kawng awmchhun a ni. A nih leh chu khawngaihna chuan kan tlinlohna leh fellohna chu min pawmin thiam min chan tir ta em ni? Ni lo ve, Pathian hian a thianghlimna leh felna palzut zawngin min khawngaih lo va, khawngaihna a nih avanga mi fello fela min pawm ta a ni lo.
Krista tellova mihring chu thiamchang thei a ni lova, chuvangin Khawngaihna chuan kan thiamchanna tur felna leh thianghlimnaa khat Fapa Isua Krista min pe ta zawk a ni. Van leh khawvelah lehkhabu hawng tlak tumah an awm lova, Beram No khan khawngaihna avangin nunna bua kan hming ziah ve na tur lehkhabu chu min hawnsak a ni.
Krista felna leh thianghlimna chauh chu kan thiamchanna tur a nih avangin ani chu thiamloh chang mihring angah lo changin kan nihna min
tawmpui a. Kan sualna chu a chungah nghahin a awm a, thiamloh chang mihringa chu Krista’n Kalvariah a lo thihpui ta! Pathian dan hmaa thiamchanna leh Pathian lungawina hi Krista chauhvin a man a pe zo tih hi chiang ila, Kalvaria kan hmuh Krista ngei kha kan tlanna man chu a lo ni. Pathian lungawinaah hian thawhlehna a lo awm a. Krista’n a thisen leh taksa ngei hlana a thihna hmunah chuan mihring bawhchhiatna avanga Pathian thinlung hliam tuam damin a awm a, Lalpa lungawi kum thu puanin a awm a ni. Krista tuarna chuan Pathian lung a tihawi avangin ani chu Pathianin thihna ata kai thovin nunna leh ropuina a khumtir ta zawk a ni. Hebrai 2: 9 chuan ‘ Isua…chu, thihna tuar avanga ropuina leh chawimawina khumtira awmin kan hmu ta zawk a ni’ tiin a sawi.
Rom 6:5-ah chuan ‘A thihna anpuiin amah nen kan inzawm tawh si chuan a thawhlehna anpui pawhin kan inzawm bawk ang’ tiin kan hmu a. Khawngaihna chuan Krista thihna chu ka thihnaah min pawmsakin a thihna anpuiin amah nen inzawmin min siam a, Krista inhlannaa Pathian lungawina chuan thawhlehna ropui a thlen kha Krista chungah chauh ni lovin rinnaa Krista lal leh chhandamtua pawmtu famkimlo mihring tan pawh thawhlehna a lo ni! Hei hi hre reng ila, Krista thihna leh thawhlehna hi khawngaihna avanga lo thleng a ni a, a thihna leh thawhlehna nun tawmpuina leh chumia beiseina nung min pek chu thiamloh chang mihring nihna pawmte, chumi avanga Pathian khawngaihna hnuaia tlu lut lo thei lo nia inhria tan a ni.
Chu nun neitu tan he khawvelah hian Krista lo chu chhuan tur dang a awm lo va, mahni tana nung tawh lovin an thih ai thia tho leha tan chuan an nung tawh zawk a ni.
Rom 6:5-ah chuan ‘A thihna anpuiin amah nen kan inzawm tawh si chuan a thawhlehna anpui pawhin kan inzawm bawk ang’ tiin kan hmu a. Khawngaihna chuan Krista thihna chu ka thihnaah min pawmsakin a thihna anpuiin amah nen inzawmin min siam a, Krista inhlannaa Pathian lungawina chuan thawhlehna ropui a thlen kha Krista chungah chauh ni lovin rinnaa Krista lal leh chhandamtua pawmtu famkimlo mihring tan pawh thawhlehna a lo ni! Hei hi hre reng ila, Krista thihna leh thawhlehna hi khawngaihna avanga lo thleng a ni a, a thihna leh thawhlehna nun tawmpuina leh chumia beiseina nung min pek chu thiamloh chang mihring nihna pawmte, chumi avanga Pathian khawngaihna hnuaia tlu lut lo thei lo nia inhria tan a ni.
Chu nun neitu tan he khawvelah hian Krista lo chu chhuan tur dang a awm lo va, mahni tana nung tawh lovin an thih ai thia tho leha tan chuan an nung tawh zawk a ni.