PATHIAN NENA INLAICHINNA
Pathian nena inlaichinna (Relationship) kan tih hian a thu va hriat satliah; beng a kan hriatna mai ni lovin Amah nena inbiakna, inpawhna tak tak, Pathian va tawn hriat (experience) thinna hi a ni.
1. Pathian nena inlaichinna kan neih chhan turte chu –
1) Lal Isuan min thawh sak: Isua’n krawsah min tlanna turin min tawrh saka, nimahsela a then hi chuan vanram kal nan bak Isua hi kan duh thin lova. Vanram kan kalna tur mai bakah Pathian nena kan lendun leh theih nan Isuan min tawrh sak a ni.
2) Min hruaitu tur atan kan mamawh: Isaia 53:6-ah chuan mihringte vah bo nasat thu kan hmu a, beram anga vengtu tha neih loh avanga vak bo thin kan ni a. Ringtute chu kan khawvel suk thlek anga awm ve tur kan nih loh avangin min hruaitu atan Pathian kan mamawh a ni.
3) Ruk hmang pa laka kan zalen theih nan: (Johana 10:9-10) Setana hian Pathian hmangaih mihringte hi nitinin min tibuai thin a, Lalpaa dinhmun tha luah thei lek lovin min siam chang a awm thin. Setana bawihna lak ata nitina kan zalen theihna turin Pathian nena inzawmna nghet kan mamawh a ni.
4) Nun tam kan neih nan: Nun tam kan tih hian khawvel thil (materialism) neih belh lam a kawk ber lova, thinlung lam hausakna leh nun dan thiamna a kawk zawk a ni. Paula’n retheih dante, hausaa awm dante, tlai leh riltama awm dan ka thiam a tih ang nun kha a ni. Nunna neia lo piang chhuak chuan hlimni leh lawmni a keng tela, he dinhmun in ep tak mai kara Pathiana lawm reng thei leh chhungrila thlamuanna kan neih theihna turin Pathian nena inlaichinna tha kan mamawh a ni.
2. Engtin nge Pathian nena inlaichinna kan neih theih ang?
1) Piantharna: Piantharna hi Pathian nena inlaichinna nei tura a laimu a ni. Pathian nena kan inzawmna chat tawh kha Isua zarah kan inzawm leh thei a, Lal Isua hi Lal leh Chhandamtu a kan pawm hmasak phawt angai a ni.
2) Tawngtai: Tawngtaina hi Pathian ka’n biakna hmanrua pawimawh tak a ni a. Fianrial tawngtaina piah lamah engkim kan tih lai paw’n a tawngtai theih reng a ni. Kan pianthar chiah hian keimahniah Thlarau Thianghlim a lo awm a, thil hrang hrang kan tih lai paw’n kan be reng thei a, mi nung anihna ang takin min chhan let hun a nei ngei ngei thin a ni.
3) Bible chhiar: Bible chhiar hi Pathianin min biak let ve na hmanraw pakhat a ni a. Tawngtaiin Pathian be reng mahla a thu i chhiar ngai loh chuan a duhzawngte i hre thei dawn lova, a hruai theihin i awm dâwn lo a ni. Pathian hi Bible hunlai ang khan a hring a hranin a rawn inlar kher tawh lova, min biak letna hmanraw hrang hrang a nei ve thin. Bible thu hmangte, kan chheh vel a mite kal tlangte’n, kan
dinhmun kal tlangte’n min be let ve thin a, Pathian ‘Aw’ a ni tih kan hriat hran chat theihna tur chuan a aw kan hriat tam a, a aw kan ngaihthlak tam angai a ni.
4) Sual kalsana thil tha tih (Ephesi 2:10): Nitinin thlemna tawk thin kan ni a, kan chak zawng tak leh duhzawng tak hmanga thlem thin kan ni (Jakoba 1:14). Heng thlemna hrang hrangte hi kan tlan bosan a ngaih hun a awm fo a, midangin min hmuh loh avang ngawt a thlemna pal zama Pathian duh loh zawng ti thin tu chuan a tawpah chhiatna bak a seng ngai lo a ni. Pathian hmangaihna leh tihna avanga thlemna kan kalsan thin chuan Pathian nen kan inlaichinna a lo nghet deuh deuh anga, a hruai theihin kan lo awm zel dawn a ni.