THINLUNG A LAMAH HAWN ILA
R.Lalrintluanga
Thinlung a lamah hawn ila,
Ro thil dang a ngai tawh lovang.
Pathian venhimna leh hruainain Christmas hun lawmawm tak kan lo thleng leh dawn ta reng mai!! Kumin hun kan hman taka kan nun dan leh kan thiltih kha chhut let ta ila, kan thiltih ang zela rulh tur leh malsawmna emaw, lawmman dawng tur ni ta ila, lawmman dawn tur nei tlem fe fe chu kan awm ang. Chumi zingah pawh chuan kei ngei pawh hi ka tel a ni. A (Pathian) zahngaihna leh khawngaihna nasa tak avanga he hun kan thleng hi lawmthu sawi mawlh mawlh tur kan lo ni e.
Chuti anih chuan engtin nge lawmthu kan sawi dan tur chu ni ta ang le? Pathianin a duh ber chu kan thinlung hi a ni a. “Ka fapa, i thinlung mi pe la, ka awm dan te hian i mit tlung rawh se.” tiin Thufingte 23:26-ah min lo hrilh a. Thinlung hi thil engkim a chhia a tha lo chhuahna a nih avangin chu chu Pathian pawhin a duh ber a ni. He Lal pian champhaphak lo thleng turah pawh hian Pathianin keimahnia a duh ber chu kan thinlung hi a ni.
Mi tam tak chuan he hunpui lo thleng turah hian hlim taka hman tumin kan thiam dan tawk theuhin kan inbuatsaih hlawm a. Thenkhat chuan Kohhranah zaikhawmna leh inkhawmna lama hman an tum laiin, thenkhat chuan thiante nen hun hlimawm tak hman tumin ruahmanna an lo siam bawk a. Kan hman tum dan a in ang lo hle hlawm mai. Mahse chung zawng zawng aia pawimawh chu kan sualte tlan tura van Lal fapa lo pian champhaphakah hian kan thinlung zawng zawng a hnena kan hlan ve phawt hi a ni. Chu thinlung hlanna atang chuan engkim a duhzawng tih duhna a lo chhuaka, thinlung ber kan hlan tawh miau avangin peih lo chung chunga tih a awm lova. Phur takin kan zaikhawma, phur takin kan inkhawm a, hlim takin Pathian kan fak thei zawk hi a lo ni.
He hunpui lo thleng tur hi tam tak tan chuan lawmna hun aimahin phur rit phurhna hun te, lungngaia tahna hun te a ni fo thin a. Lusun khawhar avanga lungngaia in dawm kun reng te an awm a, chutiang bawka retheihna avanga rilru hrehawm tak leh phur rit tak phur chunga hmang thin te pawh an awm. Amaherawhchu, inngaihtlawmna nena kan thinlung a lama kan hawn sak phawt chuan heng kan phurrit zawng zawng min chhawk theitu Isua Krista hian min lo chhawk vek dawn hi a lo ni zawk a. Chuvang chuan Krismas hlim taka kan hman theih nan “Lalpa kan thinlungah Lal ber ang che,” ti chungin thinlung a lamah hawn ila, Isua nen hlim takin he hunpui kan hmang theuh dawn nia.