THILSIAMTE CHUNGA MIHRING AWM DAN TUR
“Tin, LALPA Pathian chuan mihring chu a hruaia, Eden huanah chuan a enkawl leh veng turin a dah ta a.” Genesis 2:15
Genesis bung hmasa lama kan hmuh angin Pathian chuan ni ruk chhungin thilsiam chi hrang hrang a siam a. A ni hnuhnung berah mihring a siam thu kan hmu a. Chu mihring a siam chu a thilsiam dang zawng zawng enkawla veng turin a ruat a. Chu’ng a thilsiamte chu nihringin a mamawh atan a hman tangkai turin phalna a pe bawk tih kan hmu a. Amaherawhchu, chu a thilsiamte chu kan mamawh bak baka kan hman emaw kan tih chereu vak vak hi a siamtu Pathian remtihzawng a ni lo tih hi kan hriat a hun tawh takzet thung.
Tunlai khawvelin kan buaipui nasat berte zing ami chu khawvel sik leh sa inthlak danglam chak ta lutuk te, khawvel lo lum chak ta lutuk te, thing leh mau kan suat nasat lutuk avanga tuihna kangchat tam ta te leh environment chhe ta lutuk kaihhnawih avanga harsatna kan tawh thil dang tam takte hi a ni awm e. Heng a lo thlen chhan hi engdang vang ni lo vin Pathianin a thilsiam chunga thunei tura a ruat mihring ten kan tih dik loh avanga lo awm a ni.
Kum 2015 atanga kum 2020 inkar ringawt khan khawvel pumpuia ramngaw tih chereu zau zawng hi hectares maktaduai 50 lai a ni a. Kum tin hectares maktaduai 10 zel ramngaw tih chereu ang anih chu. Hemi titute hi thilsiam dangte ni lovin mihringte kan ni. India ram hi han thlir leh lawk ila. Nikum, kum 2020 chhung khan India ramah ramngaw hectares maktaduai 1.38 tih chhiat a ni a. Chu chu India rama ramngaw za zelah 3.4 (%) anih chu. Kum 2001 atanga kum 2018 thleng khan India rama ramngaw tih chhiat zat kha za zelah 3 (%) a ni a. Nikum chhunga ramngaw tihchhiat zat ringawt kha kum 19 chhunga kan ramngaw tih chhiat zat aiin a tam tihna a nih chu! A va rapthlak em! Mizoram bik hi ilo thlir leh lawk teh ang. India State Forest Report-in kum 2015-a statistics a rawn dahah chuan India hmarchhak state zingah Mizoram hian ramngaw kan nei zau ber a 18,748 sq kilometre laia zau kan la nei a ni. Mahse a hnu kum hnih hnu 2017-ah statistics rawn tichhuak lehin kum hnih chhunga ramngaw kan tih chereu zau zawng chu 531 sq kilometre a ni hem mai! Hemi hnu hian kum thum tha zen zawn chu kan hmang leh ta, engzat taka tam tichhe leh hman ang imaw?! State fire and emergency services department-in a tarlan danin kum 2011 thleng khan ramngaw kang report case 695 an nei a. A kan ral hlut zawng hi cheng vaibelchhe 90 lai nia chhut a ni bawk.
Ramngaw kan tih chereu hian thing leh mau kan suat satliah a nimai lo a, thil dang tam tak ken tel a nei a ni tih chu kan hre theuh awm e. Statistics rintlak tak tichhuak thin NASA-in a tarlan danin kum 2010 atang khan kum tina Carbon Dioxide punna chu 416 parts per million a ni a. Khawvel hi kum tina a lum belhna chu 0.74 degree celcius a ni. Chu khawlum zel avang chuan kum tin khawvel sik leh sa thununtu pawimawh tak Artic rama vur hlawm khal lian pui pui chu metric ton tluklehdingan 429 zet a tui ral phah bawk a. Chu vur tui ral chuan tuifinriat chim chin chu kum tin 3.3 millimeters zelin a tisang bawk. Tunah hian he thil hi khawvel buaipui a ni mek zel a ni.
Mizoram bik han thlir mai pawh hian kan bawlhhlawh paih duh dan leh kan sawngbawl dan en hian Isua zuitu tih atana mawi lo hi a va ni tehreng em. Pathian hian kan mihring puite nena kan chen hona kawngah hian inhmangaih taka cheng ho turin min duh a. Chu thil vek chu thilsiam dangte chungah hian kan lantir hi a phut tlat a ni. Thilsiam dangte chunga hmangaihna kan lantir hi Pathian kan hmangaih tak tak leh tak tak loh kan lan chhuah tirna kawng khat pawimawh tak a ni tih hi i hre tlang teh ang u. Bible atanga kan hmuh dan leh kan inzirtirna atang hi chuan khawvel hi kan awm hlenna tur a ni lo tih chu kan hre vek awm a. Mahse chumi anih avanga ngaihdan mawl tak hmanga kan awm hlenna tur anih loh vanga a nawm a maka thilsiam dangte chunga hlei kan len hian Pathian min ruahmansak aia tawi daihin kan nun hi pawt tawi thei ve bawk a nia. Mithiam ten an sawi danin khawvela thil engkim mai hi inzawmna nei vek kan ni a, chu’ng zinga thil pakhat chu engemaw vangin lo awm ta lo se, a tuar nasa ber tur chu mihringte hi kan ni, an ti.
Mihringte chuan nuam taka khawsak te, midang lak atanga duhsakna leh hmangaihna dawn te kan duh em em a. Hetiang chiah hi thilsiam dangte pawhin an duh leh an thlakhlelh em em a ni ve bawk. Isua vana a lawn dawn khan a thuchah pawimawh em em chu thilsiam zawng zawngte hnena Chanchin Tha hril kha a ni. Chu Chanchin Tha chu mihringte mai ni lo thilsiam dangte pawhin dawn ve an duha an thlakhlelh em em a ni. Min hual veltu thilsiam chi hrang hrangte duat tak leh hmangaih taka kan enkawl hi Isua zuitu kan nihna anga kan tihmakmawh a ni tih hi hre thar leh ila. Tuna kan han ziah lan hi chu a then a zar tlemte chauh a ni a. Heng baka hmalakna tur leh kan tih ve theih tam tak awm hi mi pangngai chuan kan hmuthiam vekin a rinawm a, kan tih duh leh duh lohah a innghat mai chauh zawk a ni. Pathian thu awih kan inti anih si chuan thilsiam dangte pawh hian chu Pathian thu kan awihna zar chu an zo ve dawn lawm ni?
“Thilsiam zawng zawngte chuan beisei em emin Pathian fate lo lanna chu an nghakhlel hle si.” Rom 8:19
“Thil siam zawng zawngte chu, tun thlengin rum leh nau vei na tuarin an awm hlawm tih kan hre si a.” Rom 8:22