CHAWIMAWIA AWM TURA CHU
“Thlarau chu pek a la ni rih lo, Isua chu chawimawia a la awm loh avangin”. Johana 7:39.
Krismas kan lo thleng leh dawn ta reng mai. Hun lawmawm tak, chhungkua a hman khawm ngei kan tumna hun thin kan lo thleng leh ta reng mai a ni. Amaherawhchu, he Krismas hi Mizo-te nunah hian negative leh positive side lian tak mai a nei a. Mizo Kristian piangthar inti ngam lo te tan phei chuan Pathian duh loh zawng nasa tak an tihna hun a lo ni ve mek bawk a. Thenkhat Pathian hmangaihtute tan chuan Pathian lawm taka an chawimawi hun a lo ni ve mek bawk a ni.
Piangthar inti ngam mang meuh lo Kohhran member-te’n an hman dan hi chu han sawi deuh chiam pawh ka tum lo a. An mamawh ber chu Krista a nun thar a ni mai a. Chu Krista chanchin tha hrilh chu kan hna atana Pathianin min pek a ni tih chu kan hre tlang turah ngai ila. Anih chuan Kohhran ten kan Lal lo piang kan hmuah danah hian thil kim lo deuh awm hian ka lo hre ve mai mai thin.
Krismas ah hian Pathian hian eng nge min beisei chu ni ta ang le? Kan Pathian hian Jerusalem-a zuk kal la, i pawisa in inkhawl ve tang tang la tiin min phut ta se. Mi hausa tan chuan a awlsam deuh ang a. Keini mirethei tan erawh Pathian lawm zawng a nun a harsa ve hle ang. Mahse, Pathian chuan min pek sa, kan kut te, kan ke te, kan aw neih chhunte hian min chawimawi rawh a ti mai a ni. Moria-a tlang pakhat a halral thil hlan tur intum chawp tu Pathian khan, a thil thlawn pek kan taksa a kan chawimawi hi a phut tlat a ni. Rilru leh tih tak zeta chawimawi tur hian Pathian hian min phut ve tlat a ni.
Pathian kan chawimawina atan Zaikhawm program-te kan hmang thin a. Mizo Kristian in Pathian chawimawina hmanrua kan neih pawimawh tak a ni. Zaikhawm han tui deuh hi chuan Kohhran a hlim kan ti a. Kohhran puipate pawh an lawm em em thin a ni. Amaherawhchu, zai tui loh chang a lo awm a, puh mawh tur kan zawng tam lutuk thin hi chu a mak ka lo ti thin. Khuang rik dante, rimawi tum tu vangte kan han puh a, kan in hnial ta nuaih nuaih mai thin te hi ngaihtuah chian a ngai khawp mai. Zai tui leh tui loh hi chu nang leh kei hian Pathian kan fak duhna (Pathian fak ka chakna) atangin a ni. Khuang vuak dan, mi lam leh lam loh, thingpui tui leh tui loh, zai hruaitu thiam leh thiam lohin Pathian kan fakna tur a dal a nih chuan Pathianah kan in enfiah a ngai. Rimawite a pawimawh lo e ka ti lo, a pawimawh e. Mahse, a pawimawh ber chu Isua i fak chakna leh chawimawi i chakna kha a pawimawh lai ber chu a ni. Marka 7:36 “Tumah hrilh loh tur a ti tlat a; nimahsela khap nasat veleh an tlangaupui zual zawk mah thin a.” Bengngawng tawngtheilo a tihdam sak a khan Lal Isua kha nasa takin a chawimawi a ni.
Pathian chawimawi thei tura hmanrua pakhat chu ngaihtuahna hi a ni. Ngaihtuahna hian inpuah chah ve a ngai a ni. Miin a chawimawi ber tur, chawimawi tlak a nihna a ngaihtuah loh chuan a tui awm vak loh a ni. Devotion nei uluk a, Bible chhiar ching mi hian Pathian chawimawi chu an lo peih deuh nge nge thin a ni. Ngaihtuahna a sum leh nawm chenna ringawt a luh chuan, Lalpa chawimawi tur hian kan lo fit tawh lo fo thin a ni. Pathian i hmuh ngai loh chu engtin nge i chawimawi ang? Pathian hi hriat theihna pakhat chiah kan nei chu chu a fapa Isua Krista atangin a ni. Mi Krista nen a inzawm chuan Pathian a lo hre tawh a, a duh zawng pawh a lo hre tawh a ni. Ringtu i nih chuan Chanchin tha bu li te hi Isua tunge anih tih hre tur hian i chhiar chhuak ve hrim hrim ang u. Tunge kan chawimawi a ber pawh hre lo a, zai tui tum em em pawh a dik lohna lai chin a awm thei a ni.
Pathian chawimawina hmanrua pawimawh tak chu taksa fit tha a ni. I lo chik ve thin em? Mi hrisel lo, natna ruk nei bula awm hi a hrehawm em em thin a ni. Taksa na neuh neuh neih reng reng hi chuan rilru hi a hlim thei lo a ni. Kan taksa hi Pathian in min pek a nih ang ngeiin kan enkawl tha tur a ni. A theih ang angin kan enkawl ve a ngai a ni. Kan chawimawina tur hmanrua ber a chak loh chuan kan lo phunchiar san a. Pathian fak tur kan nih ang a, Pathian faka kan hlim zawh loh chuan thinrimnate, mawhpuh turte kan zawng thin. Ringtu nun Pathian ti lawm zo lo, phunchiar em em, hmangaihna leh dawhtheihna pe chhuak zo lo ah khan kan lo chhuak mai tawh thin a ni. Kan bula mite tan eng ni lo in, bawlhhlawh mai kan lo ni tawh thin a ni.
A tawp berah chuan Pathian chawimawi tur chuan sual kawng i hriat reng laka inthiarfihlim ang che. Pathian thianghlim leh sualna hian inzawmna a nei lo. Sal tanna ram atangin Pathian a fak theih loh.
Sam 137:3 “Zion hla pakhat min sak sak rawh u,” tiin, Chutah chuan sala min hruaituten hla saah min ngen a, Min tiretheituten hlimah min ngen bawk si thin. Mi ramahte chuan Lalpa hla engtin nge kan sak theih ang?
Sualin a duh tawka min bawih kual chunga Lalpa chawimawi tum hi a theih loh a ni. Chuvangin, sual bawih ata lo chhuak la Lalpa i chawimawi ang u hmiang.