DANIELA RAWNGBAWLNA LEH LUCIFERA RAWNGBAWLNA
( Zac Poonen-a ziak atanga lak chhawn )
Daniela kha Pathian mi hman, Pathian tana inserh thianghlim tlat a ni tih Bible-ah kan hmu a. A thiante Hanania, Misaela leh Azaria te erawh chu fel ve viau mahse Daniela ang chuan an huaisen tawk lova, Daniela huaisen zia an hmuh hnu erawh chuan huai takin an nung ve ta anih kha. Tunlaiah pawh hian heng thian za ho ang deuh va mahnia Pathian tana inpe ngam chiah lo, entawn tur an awm erawh chuan Pathian tana mi tangkai tak ni thei tur hi an awm nual ang. Daniela hi chuan mahni inti bawlhhlawh lova lal leh hotute, chhungte leh midang thu aiin Pathian thu chauh huai taka zawm a tum tlat avangin a rawngbawlna hi a pawimawh bik em em ani.
Tunlai khawvelah hian Daniela ang rawngbawltu hi Kristiante hian kan mamawh khawp mai. “…mi tam tak felnaa hawikir tirtu…” (Dan 12:3) ni tura Daniela rawngbawlna chhunzawmtu tur hi Pathianin a mamawh a ni. Felna leh thuchah pangngai sawi chauh ni lo, ataka nunpui rawngbawlna hlen chhuaktu tur hi Pathianin a zawng a ni.
Daniela rawngbawlna khing lehlam chu Lucifera rawngbawlna hi a ni. Lucifera, Pathian kid no. 1 thin chu a lo chapo tak avangin Pathian lakah a hel ta a, vantirhkoh hmun thuma thena hmun khat chu ama lam tanga siamin Pathian lakah an hel ta a. (Thup 12:4) Pathian hian engvang nge he thil hi a thlen a phal tlat le? kan tih chuan vanramah lungawi lo leh phunchiar, hel rilru pute awm ve a remti lo a ni ngei ang.
Tunlai Kohhranah pawh hian Lucifera rawngbawlna chhuzawmtu, phunchiar leh sawisel tur ngah, hruaitu nih chak, dawt hreh lo leh mi rel ching, midangte hmu tling thei lo a awm theih khawp ang. Hetiang mi chu khawvel tawp hma chu an awm reng dawn. Amaherawhchu, hetiang mite hi chu vaukhanna thu kan hrilh a tul thung. Kan hlau tur a ni lo, hetiang ho hi chuan Krista taksa (Kohhran ho) hi chu an ti chhe pha ngai lo vang. Pathian huana hnim leh hlo thlo faitu mai an ni zawk. Pathian Kohhran tikhawlotu chu a hun takah Pathian a che mai dawn zawk a ni (I Kor 3:17). Kohhranah lungawi lohna leh rin hranna te a lo awm hian, thil ni ve tur reng a ni zawk ( I Kor 11:19). Leilung pian hma khan vanah pawh rin hranna chu a lo awm daih tawh a. Pathianin thim leh eng a lo thliar daih tawh bawk a (Gen 1:4), chuvang chuan buh lem leh buh tak chu thliar hun a la awm ngei ang.
Daniela rawngbawlnaah chuan inpumkhatna leh inpawlhona nuam a awm a, Lucifera rawngbawlnaah chuan inlungrual lohna a awm thung. Pathian chuan inlungrual lohna hi a hua (Thuf 9:16-19). Hemi kawngah hian tuilairapa awm theih loh – sengkhawmtu ni lo chu tidarhtu a ni. (Matt 12:30). Fing inti a thinlung dik lova rawngbawl inti, nihna leh chanvo beisei tlat, midangte thik a dinhmun sang zawk an awm ngai thei lo tute chu a hun takah Pathianin a timualpho mai thin a ni. ( I Kor 3:19 ).
Lucifera rawngbawlna in A mite a khawih chhiat loh nan Pathian chuan min ven reng avang hian lawmthu i sawi ang u. “Lalpa’n khawpui a vawn that loh chuan, A vengtu chu a meng thlawn mai a ni” (Sam 127:1b). In pumkhatna ti chhe theitu laka min vengtu chu Thlarau Thianghlim a ni si a. “… Chumi hunah chuan i chhung ata i mi, chapona hlimpuitute chu ka la bo vang a, Ka tlang thianghlimah hian chapo hmangin i awm tawh lo vang. I chhung ata mi retheite leh tihduhdah tuarte chu ka zuah ang a, LALPA hming chu an ring ang” (Zeph 3:11,12). Pathian Kohhran hi chu mi inngaitlawmte chauh awmna tur a ni. A thianghlimna vawng tur chuan a duh danin, a duh hunah mahni in ngaisangte chu a nawr chhuak mai dawn a ni.