BIHRUKNA HMUN ATANGA KAL CHHUAH
(Light of Life October 2016-a Sandeep Poonen-a ziak lak chhawn)
Adama leh Evi khan suala an tluk khan Pathian lakah an biru a, kha ta tang khan mihring hian Pathian laka bihruk hi kan ching ta a. Nimahsela Pathian chuan Amah chu bihrukna atan kan hman hi a duh ber a ni (Sam 32:7). Pathian kan tlan bo san a, lehlam kan hawisan lai pawh hian Ani chuan kan inzawmna ti nung tur hian min nghak reng thin zawk a ni.
Abrahama kha kum 75 mi anih Pathianin a ko chhuak a, a hnenah thutiamin fapa a pe dawn tih a hrilh a. Kum 11 a nghah hnu chuan Abrahama chuan Pathian thutiam chu nghak zo lovin a bawihnu Hagari lakah fapa Ismaela a nei tih kan hria a. Kha mi atang khan Pathian leh Abrahama chu an inbe pawp tawh lo nge, kum 13 zet chu a reh ta vang vang anih kha.
Khatih chhung khan Abrahama kha Ismaela a buaipui nge, fapa a nei ta kha a lungawi ta mai nge hriat a ni lova, Pathian lakah a biru ta niin a lang a. Pathian khan Abrahama pawl turin hun a nei ta lo pawh ni lovin Laodikei kohhran ang khan, lum si lo, vawt si lovin Abrahama kha a awm ta a nih hmel hle mai. A hausa a, mamawh a nei tawh lova, fapa a nei ta bawk a, Pathian aw ngaithla turin a rilru a inthlahdah a ni ngei ang.
Kum 13 a han ral chuan Abrahama chu Pathian lamah a khua a har ta a ni ang, Pathian nen an inbe pawp leh ta a. Pathian aw a hriat hmasak ber chu “ Pathian Engkimtitheia ka ni, ka hmaah awm la, tha famkimin awm rawh” tih a ni. Pathian hian tunge a nih, eng ang mi nge a nih tih hi min hriat chian tir hmasak a tum hle mai. Tu emaw satliah, duh duha nam nul theih, tawngkam thlum leh thaa hneh mai theih anih loh zia te, mihring duhdan leh awm tih anga dawr mai mai chi anih loh thu te, Amah dawr tur chuan A thu leh hla ngaichanga dawr tur, Engkimtitheia a nih thu a sawi chiang hmasa a ni. Khawi hmunah pawh, engtia rei pawh Pathian hi bihruk san ila, Amah kan dawr leh dawn anih chuan kan rilru put dan tur dik tak, kan in “RESET” na tur chu Pathian hi tunge a nih chiah? tih hi kan hre chhuak chiang hmasa ber tur a ni. Kan chhungkua, kan eizawnna, Kohhran leh khawtlang thil aiin Amah chu kan ngai pawimawh ber tur a ni a, fimkhur takin Pathian hmaah kan awm tur a ni.
Tha famkina awm turin min phut tlat bawk. Sual laka inthiarfihlim tur kan ni a, kan lo tisual anih pawhin thinlung takin ngaihdam kan dil ang a, kan tisual leh tawh tur a ni lo, tiin Bible-in min hrilh.
A thu kan zawm chuan Pathianin Amah kan bihruk san laia kan awmdan te chik takin min zawt si se tawh lova, Abrahama hnenah chuan “..nagmah nena kan inkarah thu ka thlung ang a, nasa takin ka tipung ang che” (Gen 17:2) a ti leh mai a ni. Hemi thu a hriat hi chuan Arahama chu Pathian hmaah a bawkkhup ta a. A bihrukna atanga lo chhuakin Pathian nen an lo in kawm leh thei ta a ni. Pathian hnen atanga tlan chhe lova a aw ngaithla tura kan rilru kan inpeih hi a va pawimawh em! Engemaw thu danglam bik tak beisei emaw, phur thar hurh ringawt ni lovin Pathian aw hre tura A tana kan thinlung kan hawn thar leh hian Pathian thatzia te, hmangaihna te, ngilneihna te kan hre thar leh a, Pathian chu kan bihrukna atana kan hman thar fo thin hi a va pawimawh em!