AMAH LEH AMAH A INTITLAWM A
(Zac Poonen-a ziak atanga lak chhawn)
Mihring hi chapo saa piang kan ni a, chhuan theih awm zawng zawng hi chu kan chhuang vek hlawm mai. Serkawn ngat, Baptist ngat, mahni thu-a BA pass ngat tih ang chi hi sawi chhuak kher lo mah ila, kan rilru-ah a lian fo thin. Isua Krista ropuina ber chu he leia a lo kal khan amah leh amah a intitlawm kha a ni.
Lei leh vana Pathian thilsiam ropui zia kan hmu a, thil te ber atom atanga thil lian ber arsi bawr khawm galaxy atang te in Pathian ropui zia kan sawi thin. Ngun taka Bible chhiar a, Isua Krista zirtir tak tak tan chuan thil siama Pathian ropuina lo lang chhuak aiin he khawvela mihring anga lo piang a, Pathian ropui ber a nihna paihthlaa A ropuina zawng zawng kalsan a misualte tana a nunna hlan tura A lo kal duh aia ropui zawk a awm thei lo. Thu tisaa lo chang a, kan zinga lo cheng duh ropui zia (Joh 1:14) hi thilsiam atanga ropuina lang chhuak aiin a va nasa zawk teh reng em! Lalber ni si kha mi naran angin a lo piang a, Kraws-a thi khawp hialin A pa thu a zawm ta anih kha.
Khawvela a awm laia a thilmak tih ropui ber aia ropui zawk Krista inngaihtlawmna hi kan chhut chian a pawimawh khawp mai. Isua Krista nuna min zirtir duh pakhat chiang tak chu Amah anga inngaitlawma nung turin mihringte hi min zirtir a duh a ni. Ama nunah khan chapona them pakhat pawh a awm lo va, chung tlak takin midangte nunah a ti ngai hek lo. Midangte aia a chungnunna a lan tir ngai lo va, anmahni siamtu, engkimtithei Pathian ni mah sela a ti lang ngai hek lo. “Mihring Fapa” a intihna chhan pawh kha “mihring pangngai, nangmahni ang ve mai ka ni e” a tihna a ni. Pathian chuan mihringte hi inngaitlawm turin min duh a ni.
Lucifer-a kha vantirhkoh fing ber leh hmeltha ber a ni a, chu chu a chapo pui ta a. A dinhmun duh tawk lovin Pathian chunga awm duhna rilru a lo pu ta hial a, chu veleh Pathianin a paihthla ta nghal a ni. Pathian hian chapona hi a haw em em a, a dodal bawk thin. Kan chapo chuan Pathianin min dodal nghal tih hi kan hrereng tur a ni. ‘Dodal’ tih hi ‘support lo’ tihna a ni a. Chuvangin kan chapo rual chiah hian Pathianin min support tawh lo tih kan hrereng tur a ni. Vanramah chuan chapona them pawh a awm thei dawn lo. Setana paihthlak a nih a, mihringte Pathianin a siam khan Setana chuan a chapona rilru kha mihringte ah a tuh ta a, kan lo bawhchhe ta a, chuvangin mihring zawng zawngin Setana hnen atanga kan rochun ‘chapona’ in kan lo khat ta anih hi.
Chu chapona kan thinlunga bet tlat la kata min chhandam tur chuan mahni intitlawmin Isua chu leiah a lo kal ta a ni. Tichuan he khawvelah hian thlarau indona tawp thei lo – mahni lan sarh duhna avanga midangte hnuk hniam duh thlarau, Setana atanga kan pianpui leh Lal Isua inngaihtlawmna thlarau, tlawm zawk nih duhna thlarau chu ringtute thinlungah hian a inbei reng a. Mahni han inngaihtuah vang vang ila, Krista inngaihtlawmna rilru nge kan neih len, mahni indahsanna? Thlarauva kan than leh than loh hriatna ber chu inngaihtlawmnaa kan than leh than loh hi a ni, a bak tehfung a awm lo. Mi tam tak rawngbawl nasa, thlarauva thang lo a awm theih. Kan active viau a ni thei, mawhphurhna tam tak min bel a ni thei e. Thlarauva thanglian chu a inngaitlawm tial tial tur a ni ringawt mai. Krista hian amah a inngaitlawm anga inngaitlawm a, midangte tana malsawmna ni tur te, an rawngbawl sak tur te leh tanpui turin min zirtir a ni tih hi i hrereng ang u.