ABRAHAMA TAWNGTAINA ATANGA ZIR TUR
(Bernard Thangasamy ziak atanga lak chhawn)
Bible-ah hian tawngtai thu hi vawi 800 vel lai tarlan a ni a. Heng tawngtaina atang hian Pathian mize thenkhat hmuh tur a awm thin – thianghlim, lainatna leh khawngaihnaa khat, thin nel leh hmangaihna leh thutaka khat a nihna te kan hmu thin a. Kan zir tur pawimawh tak chu Pathian thu hi awih a, chibai buk tur kan nihna hi a ni. Kan mamawh nia kan inhriat lai chauh ni lovin englai pawha A thu zawm a, chibai buk hi mihringte tihtur a ni.
Sodom leh Gomorra khaw mite sualna chuan Pathian pawi a khawih tak avangin dikna Pathian, kan ral hmang mei leh sual nena awm dun thei lo chuan hrem a tum nghet ta tih Gen 18-ah kan hmu. Misual tam tak a hrem tur zingah mi fel an lo tel palh hlauh ang tih hlau vin Abrahama chuan ngen ngawl takin Pathian hnenah a dil thu hetah hian kan hmu a ni. Mi fel sawmnga tal an awm takin tih atanga tanin 45, 40, 30, 20 ah a dil zel a, mi fel 10 tal an awm mial takin tih thlengin Abrahama chuan Pathian a dil thu kan hmu a, Pathian pawh a inhnuk hniam zel anih kha. Helaia Pathian leh Abrahama indawrna atang hian Pathian mizia lo lang 5 te tawi te tein i lo thlir ho teh ang.
Dikna Pathian anih zia kan hmu phawt a, Abrahama chuan dikna Pathian chuan misual a hrem tur zingah mi fel a hrem tel hlauh palh takin, tiin a dil a, Pathianin a ngaithla in a remti tih kan hmu. “Mi fel tawngtaina chuan thil nasa tak a ti thin (Jak 5:16b).
Tawngtai sakna ngaithlatu Pathian anih zia kan hmu leh a. Kristiante hian kan khawsakna hmuna midang awm ve te tana tawngtai sak thin hi kan ba a ni. An bawhchhiatna avanga Pathianin hrem a tum Jerusalem tan tumah tawngtai saktu an awm lo (Isaia 59:16). Hei hian Pathian mite’n mi dangte tana kan tawngtai sak pawimawh zia a tar lang a ni. Mi sualte bwhchhiatna aiin mi felte’n an tihtur an tih loh hian pawi a khawih thui zawk fo. Samuela tan chuan midangte tana tawngtai sak chu a tihtur (duty) a ni a, a tawngtai loh chuan Pathian pawi a sawi a ni (I Sam 12:23).
Khawngaihnaa khat Pathian a nihna a lo lang leh a. Abrahama khan 50 atanga tanin 10 thlengin Pathian hnenah a dil kha a ni a. Pathian ni lovin, Abrahama zawk kha 10-ah a tawp ta anih kha. Pathian hian misualte boral pawh hi a duh lova, an sual an sim a, a lam an lo hawi hian a lawm zawk ani. (Ezek 18:23). Thahnemngai taka Kohhran ho tiduhdaha man tir thin Saula pawh kha a sual a sim hnu kha chuan Kohhran hruaitu tangkai ber a lo nih tak kha. Kraws lera a khengbet tute tana Isua tawngtaina khan Pathian chu sual hua a, misual simte ngaidam thin a nihna a tarlang chiang hle bawk. Mi nu uire a, tualthat bawktu Davida pawh a inchhir a, a sim hnu kha chuan Pathianin “Ka thinlung ang pu mi” a tih kha.
Inngaitlawm Pathian kan hmu leh a. Pathian hian mihringte lakah hian bat engmah a nei lo va, kan tawngtaina ngaihthlak a, tih hlawhtlin pawh a ba hek lo. Nimahsela, khawngaihna avang zawkin kan tawngtaina te hi a chhang thin a ni. Inngaitlawm, hlau leh khur chunga Abrahama dilna chu Pathianin a ngaithla a (Gen 18:27). Jehosaphata pawh engmah tih theih nei lo, Pathian kuta innghat tawp mai anih zia inpuanga inngaitlawma Pathian hmaa dilna chu a hlawhtlin tir thu kan hmu bawk ( II Chron 20 ). “Pathianin mi chapote a dodal a, inngaitlawmte erawh chu khawngaihna a pe thin” ( Jak 4:6 ).
Chan huamte tawngtaina ngaithlatu Pathian a nihna kan hmu bawk. Mahni duh dan leh hlawkna tura Amah dawrtu ni lo, mahni pawhin chan huama tawngtaina chu a hlawhtlin tir thin a ni. Abrahama ai maha mahni neih tur chan huama Pathian dawrtu chu Mosia kha a ni ngei ang. A chhandamna hial pawh chan huama Israel te tana a dilna kha Pathianin a hlawhtlin tir a (Ex 32:33). Lalnu Estheri pawhin a nunna thapin Juda ho tan lal Ahasuer-a hnenah a dil sak kha. Abrahama pawhin a thinlunga Sodom khaw sualna phur chungin Pathian a dawr a, chu chu Pathianin a hlawhtlin tir a ni.
Pathian au eih tur hi chuan tih tak taka beih a ngai a ni.