THUPEK THAR
Upa Jonathan Lalremruata
‘Engnge thupek thar chu?’ tih Pathian thu atangin en ho ta ila. Johana 13:34-35-ah chuan, sawifiah zui vak pawh ngai loin thupek thar chu chiang takin kan hmu a, “Inhmangaih rawh u” tih hi Isua Kristan thupek thar min pek chu a ni.
He thupek ka rilrua a lo awm lai hian zawhna awm thei ni a ka hriat chu, Thusawm pekah khan he thupek tluk chiah, ‘Nangmah i inhmangaih angin i vengte i hmangaih tur a ni’ tih kha a awm tawh si a, engatinge Isua hian thupek thar a tih tlat le? tih hi a ni. Commentary kan enah chuan, a tawi zawngin sawi ta ila, Thusawm pek hi Israel hote leh Juda hote chuan anmahni pual bikah an ngai nghet em em a. Nimahsela, Isua Krista lo kal hnuah chuan Judate tan chauh ni lovin, khawvel zawng zawng a huap zawh tak avangin a ni, tiin a ziak a, a pawmawm hlein ka hria.
Isua Krista thupek thar hian mi zawng zawng a huapzo a, mifel leh fel lo pawh, mi hawihhawm leh hawihhawm lo pawh, a phu leh phulote pawh, kan vai in min huapzo a, mi zawng zawng hmangaih turin thu min pe a ni. Hetia han ngaihtuah mai hi chuan, mi zawng zawng hmangaih hi thiltih theih ni pawhin a lang lo a ni ti rawh u. Nimahsela, a thupek a ni tlat bawk si. Isua Krista hian kan zawm theih reng reng loh tur thupek min pe em ni ang? Mi zawng zawng hmangaih ka thei lo ni a ka inhriat lai a ka rilru a zawhna lo lut chu, vawi engzat chiah nge he thupek thar zawm tum hian ka lo bei tawh? tih hi a ni. Tum chhin pawh awm miah lo hian thei lovah kan lo inngai mai ang tih hi a hlauhawm khawpin ka hria. Setana, bumtu hian Pathian tana kan tih ve theih reng leh kan tih ngei tur thil kan tih dawn hian, kan tih ve ngai lo ang leh kan tih thei loh thil ni anga min hriattir a, min bum chang a tam hle in ka hria a ni. Mat19:26-ah chuan, Isuan, “Chu chu mihring tan tih rual a ni lo va; Pathian nen chuan engkim tih theih a ni,” tiin a sawi a ni. Isua Krista hian kan zawm theih loh tur thupek thar min pe lova, kan zawm theihna turin Amah leh amah inngaitlawmin, a nun a hlan a ni tih hi i hre reng ang u.
Engatinge he thupek hi min pek? A chhanna chu chang 35-naah khan kan hmu nghal a, “In inhmangaih chuan mi zawng zawngin ka zirtirte in ni tih chu miah chuan an hria ang,” Isuan a ti. Kan inhmangaihna tawnna hi Isua zuitute kan ni tih chinchhiahna/tilangtu anih tlat vang a ni.
Tunlaia tawngkam lar, ngaihthlak nuam vak lo, dik angreng viau bawk si chu, “A nunah hmuh tur a awm lo” tih hi a ni. Eng vangin nge keini ringtute, Isua zuitute nunah hian hmuh tur a awm lo an tih leh thin ang le? Kohhran activity hrang hrangah chuan tel kim thlap si, Pathian hmangaihna ka hre chiang a, Pathian ka hmangaih kan ti bawk si…. chuti chung a, a nunah hmuh tur awm lo min la ti tho bawk si hi engnge a chhan ni ang? Kohhranah an tel tak tak ngai loh avangin, min thlirtute hian an hmuh thiam lo a ni zawk ang em? Min hmuh dan dik leh dik loh hi ti zawng hian i han fiah teh ang; ka rawngbawlpui, Kohhrana Isua Krista taksa ka tawmpui nunah hian Krista hmel chu ka hmu chiah em? Kan uar deuh teh ang, kan pastor-te, kan upa te, kan rawngbawltute, kan FOD hruaitute, kan active member puite nunah hian Krista hmel chu kan hmu em? Kohhran, Krista taksa a tel, inpeng tawn theuh kan ni kan intih mek lai hian, taksa pakhat a peng hrang hrang ang hian kan awmin kan hria em? Ka kutin hliam a tuar chuan ka hre ngei ngei thin. Chutiangin ka ke hmawr pawh ni se, tin, ka hmuh thei loh laiah pawh hian hliam tuar ila ka hre tho thin. Chu chu taksa pakhat awm dan chu a ni. Krista a kan pengpuite kan hriat loh viau chuan Lu Krista kan zawmna hi kan enfiah thar a tul khawpin ka ring a ni. Isua Kristan Thupek thar min pek, ‘inhmangaih ula’ a tih hi kan lo hlamchhiah palh mai ang tih a hlauhawm hlein ka hria a ni. He thupek kan zawm hi, miten keimahni a Krista hmel an hmuhna tur a ni si.
Pathian hmangaihna ka hria a, kei pawhin ka hmangaih a ni tih liam ringawt hi a tawk zo lo a ni tih hi i hria ang u. IJohana 2:9-ah chuan, ‘Mahni unau haw si a, “Engah ka awm,” titu chu tun thleng pawhin thimah a la awm reng a ni.’ a ti tawp mai a ni. A aia chiang zawkin,bung 4:20-ah chuan, Miin,“Pathian ka hmangaih e” tiin a unau haw si sela, amah chu chu dawthei a ni; a ti a, a chhan pawh chiang takin a rawn ziak chhunzawm a, a unau a hmuh tawh renga mah a hmangaih loh chuan Pathian a hmuh ngai lohva chu engtinge a hmangaih theih ang? a ti hmiah mai a ni.
Mahni unaute, kan ringtupuite pawh hmangaih thei si lo hian, Pathian hmangaih riaute hian kan lo inngai palh ang tih a hlauhawm hlein ka hria a ni. Chang 21 kha kan en chhunzawm chuan “Tupawhin Pathian a hmangaih chuan a unau pawh a hmangaih bawk tur a ni” a ti a ni. “Tur a ni” tih lai hi i hre reng ang u. Thupek a ni.
A tawp berah chuan, midang hmangaih theihna hi a hranpa taka keimahni a lo thleng thut tur emaw, kan emotion khawih zawngin emaw lo thleng tura ngaih palh a awl khawpin ka hria. A hranpa taka lo thleng kher tur chu ni se, Isua Krista hian Thupek angin min pek a rinawm loh a ni. I Johana 3:18-ah chuan, ‘Naute u, thu chauhin i inhmangaih suh ang u, thil tih leh tih tak zetin ni zawk rawh se’ tih kan hmu a. Kan inhmangaihna hi kan tihlan pawh a tul a ni. I Johana 4:7-8 ‘Duh takte u, i inhmangaih tawn theuh ang u; hmangaihna hi Pathian laka chhuak a ni si a; mi tin hmangaihna nei apiang Pathian hrin an ni tawh a, Pathian an hre bawk a. Hmangaihna nei lo chuan Pathian a hre lo; Pathian chu hmangaihna a ni si a.’