THINLUNGA INCHHIRTE LALPA’N A LAWM
R. Lalchama (L)
“Ka tho vanga ka pa hnenah ka kal ang a, a hnenah, ‘Ka pa, vana mi chungah leh nangma mit hmuhin thil ka tisual e, i fapaa vuah tlak ka ni ta love; i hnena inhlawhfa pakhat angin mi siam ve rawh,’ ka ti ang” a ti a. Luka 15 : 18,19.
Heta Bible chang ka han tarlan atang hian kohhran member tin tan mahni nun theuh inbih chian tur kan nei tlang theuh turah ka ngai a ni. Kan Lal Isua tehkhin thu thil hrang hrang kawng thum helai bungah hian kan hmu a. Pakhatnaah chuan Beram bo thu hi a ni a. Pahnihnaah chuan Duli bo thu kan hmu leh a, tin, a pathumna atan Fapa tlanbo thu kan hmu leh a ni. Fapa tlanbo han tih hian a hmaa bo pahnihte anga, a neitu hnena kir leh nachang hre ve lo a ni lova, a mangan tawhna leh a beidawn tawpna atang pawha thil tha zawk chang leh tura ngaihtuahna hmang thei a nihna hian mihringte thilsiam dang zawng zawng aia kan danglamna a tilang chiang hle a ni.
Aw le, a rilrua lut nawmchenna leh pa hmangaihna atanga tal chhuah a duhna chuan engemaw chen chu hlimna leh lawmnate neiin thian tam tak pawh a chhar a. Amaherawhchu, khawvel sum leh pai hian lawmna min pek theih chin chu tlak hniam hunte alo herchhuah theihzia chu a tawng tan ta a le. Chu ramah chuan thian thaa a ngaih nei teuhin awm mahsela, tam a lo tla ta a, mitin an lo buai ta, a ni pawh chuan eitur a lo tlachham tan ta le. Sum hman tur a nei tawh lo, tuman chaw vawikhat ei tur pawhin an sawm bawk si lo, a tan chuan chaw nghei a thih mai a hmabak alo ni ta. Han thih mai chu a hlau ve hle si a, a nun chhanhimna turin chumi rama mi hausa pakhat ava bel ta chawt mai le. Tichuan, chu pa hausa chu a vawk vulhna hmun lama vawk chaw pe a, inhlawhfa turin a tir liam ta a nih kha.
Han ngaihtuah mai chuan riltam mangang takin a nun chhanhim nan ava pan kha a ni a. Hmangaihtu dik ni ta sela, a mamawh chaw chu a pe tur a ni. Mahse, a dawng miah si lo, chuvang chuan a hna hmuh chhun vawk chaw pekna hmun a thlen chuan vawk ho ei ang tak ngial pawh chu intihpuar nan a it ta a ni. Khawi lam atang mahin tumahin ei tur dang an pe si lo, ava beidawnthlak tak em!
Amaherawhchu a tan kawng thar alo lang ta le, amah hmangaihtu tak tak awmna hmun chu a rilru ah alo lang ta a. Chumi hmun pan tura kir leh duhna thinlung chu a pu nghet ta a. Amaherawhchu, a lo dawngsawngtu a pa khan eng ang takin nge alo chhan ang tih kha a ngaihtuah ngam ta lo, chhiahhlawh dinhmun kha a chan turah ngaiin a pa chu a han hmu ta a ni. Mahse, heta Lal Isua tehkhin thu hi hmangaihtu dik tak lan dan inpuanchhuahna a ni a, a chhanna pawh kha a va ropui em! A beisei aia tha zawk hlirin chhanna a hmu a ni. Misual chanhaite tan belhtlak a nihzia he thu hian a tarlang chiang hle a ni. Lalpa chu fakin awm rawh se.
Aw le, tunlai kan Zoram dinhmun han thlir hian Pathian Kohhrante tan kan nun tak tak hi kan fimkhur a ngai. Khawvel lam hmasawnna kawngahte, kan nitin nun kan hman danah te, kan in en chian fo ava ngai ta em! Fapa tlanbo angin a Pa inchhung ata chu kan tlanbo ve kher lo pawh a ni thei. Nimahsela, khawvel ropuina leh nawmchenna lamah hian ke kan pen ta hle a ni lawm ni. Kohhrante zingah pawh a langsar zawnga hma laknaah pawh kan bang bik chuang lo. Amaherawhchu, Pathianin a fapa min hmangaihna lantir nan min rawn pek chhan ang tak hre fiah a, nunpui a, midangte tana malsawmna siamsaktu ni tura Thlarau Thianghlim tanpuina nena, kan dam chhung ni chhiar thar leh tur hian Pathian Kohhran hote a tharin kan in sawm thar leh a ni.