THLARAU THIANGHLIMA PIANNA
Emmanuel Lalruatsanga
Khawvel a changkang zel a, Kristiante pawh kan pungin, khawvel milin hma kan sawn ve zel a, hetih rual hian ringtu kal sual leh Pathian thlarau pawh pha lo a rawngbawlte pawh Kohhrante leh ringtute zing ah kan pung ve zel a. Kohhran hote he thu “Thlarau Thianghlima pianna” tih hmang hian i in ngaihtuah tha ve leh teh ang u.
1. Isua leh Nikodema: Johana 3:5-8
Tin Isua’n a chhang a, “Tih tak meuhvin, tih tak meuhvin ka hrilh a che, mi tupawh tuiah leh thlarauva an pian loh chuan Pathian ramah an lut thei lo vang. Tisaa piang apiang tisa a ni; thlarauva piang apiang thlarau a ni. I piang thar tur ka tih che hi mak ti suh. Thli khawiah pawh a duh duhin a tleh thin, a ri i hria e, nimahsela khawi atanga lo kal nge, khawiah nge a kal dawn tih pawh i hre si lo; tupawh thlaraua piang chu chutiangin an awm” a ti a. Helai Bible changa Isua leh Nikodema inbiakna hi philosophy ril tak ani a, kan chhui chiang dawn a ni.
1.1. Piantharna leh Pathian Ram:
Nikodema kha Isua hun laia juda mi midang rilru hneh thiam tak leh miril tak a ni a, chu chu Johana 3:1 a Isua hnena alo kal khan kan hmu a. Tin, amah hi Jewish council a tel ve (member) leh hotu pawl (Sanhedrin) a ni bawk a ni. Heng hotu pawlte hi Chanchin Tha Johana ziak ah hian Isua dotu pawl (antagonistic)-ah khan an chhal tel bawk a ni. Johana 3.3. Tin Isuan a chhang a, a hnenah “Tih tak meuhvin, tih tak meuhvin ka hrilh a che, mi tupawh an pian thar loh chuan Pathian ram an hmu thei lo vang” a ti a.” Helaia Pathian ram ‘hmuh’ a tih hi Pathian ram ‘lut’ nen thuhmun reng a ni a. Khatih lai hun khan Juda mi a piang chu Pathian ram rochun ngei ngei turah an in ngai a, kha vang khan a ni, Lal Isuan Nikodema, Juda-mi hnenah ‘mi a pianthar loh chuan Pathian ram a hmu thei tawp lo vang’ a tih pawh khan mak a ti em em a, a hrethiam lo nghe nghe a ni. Mizo Kristianna hi chhut ta ila, Kristian chhungkuaa piang kan intihna hi Pathian ram lut tura inngaih nan kan hmang a, piangthar lo hian Pathian Ram hi kan lut dawn lo tih hi i chiang hmasa phawt teh ang u.
1.2. Thlarau Thianghlima piantharna:
Johana 3:3 leh 3:7 a piang thar, a ‘thar’ lai hi Greek chuan ‘anothen’ tih a ni a, hei hi Chanchin Tha Johana ziak ah hian ‘chunglam atang’ tih ngaihtuahna a keng tel a, chu chuan vana Pathian hnen atanga lo chhuak, Thlarau Thianghlim tih danglamna a kawk a ni.(3:31; 19:11). Isua’n a sawi Pathian fate/ Pathian ram rochuntu tur te, a tih chu Pathian thlarau in a thlak danglam te hi an ni a, chu chu ‘chunglam’ Pathian thlarau pawhna nena nung, a thiltihtheihna a nitin a pawl theiha nungte hi an ni. A chang dawt chiaha kan hmuh ang khan, Nikodema khan Isua sawi piangthar/pian nawnna kha taksa tak leh tisa mita a thlir tlat avangin thlarau lam thil kha a hrethiam ta lo a ni. Chutah chiah chuan Isua’n a sawi chu Juda mi-a, a pianna khan Vanram a rochun tir dawn lo a, chunglam atanga piantharna a ngai a ni, tui leh thlaraua piantharna ngei kha. Tisaa kan awm chhung chu Thlarau Thianghlim thiltih leh hriatnate hi kan pawh pha lo fo reng a ni.
Thlarau Thianghlim leh a hnathawh zawng zawngte hi kan sawi zo vek theilo ang, Piangtharte hnena a in puanchhuah dan pawh hi a danglam fo a ni. Rom bung 8 pumpuiah khan Kristiante thlarau a nun dan tur chiang takin a rawn tarlang a, tisa dana nunna leh thlarau dan a nunna te hi a inhal tlat a ni. Pathian Thlaraua piantharna changte chu thlarau ah an nung a, an awmdan, tihdan leh nunphung zawng zawng Thlarau Thianghlimin a kaihruai a. Miten an nunah Isua hmel an hmu thin a ni. Kan piantharnate ngaihtuah ila, kan naupan laia baptisma kan chan vang ringawt te, Kristian chhungkuaa kan pianna ringawt te leh Kohhrana kan nihna te hian kan piantharna a dal fo thin a, piantharna aiin piansualna a thlen thin reng a ni. Kan ngaihtuah ber tur chu “Pathian Thlarau hruaiin kan awm em?” tih lai hi a ni. “Pathian Thlarau hruaia awm apiangte chu Pathian fate an ni si a” (Rom 8: 14). Lalpa’n malsawm rawh se. Amen.