KRISTIANNA CHHUNGRIL
Kristianna chhungril te kan ti ve ringawt a, ka sawi tum tak chu a innghahna emaw, a chhia leh tha a thliar hranna na tur a, a tehfung hman thin, a nun pui ngei ngei tur thil tihna a ni mai ang chu. Ka hriat thiam ve dan atangin kan sawi dawn a ni.
Kristian nun dan tur dik tak hi kan ngaihtuah ve nasa thei khawp mai a (a ziaktu pawh telin). A eng ber hi nge maw dik ta ber ang tih te ka ngaihtuah ve nasa thin. Nangni pawh in nih ve tho ka ring a. Thenkhatin Kohhran activities a tel that te, thenkhatin inkhawm kher lo pawn, thenkhatin lam leh tawnghriat loh lamte thleng pawn kan in teh, kan in teh ve fo thin. In teh tling an awm pawh chu ka hmu miah lo. Mahni leh mahni pawh kan inteh tling chuang lo a ni. A chhan chu mihring kan nih tlat avangin famkim lo kan ni, famkim lo kan nih vangin, sual hi sual a ni lo tihna a ni chuang lo, palzam ngawt chi erawh a ni lo. A nih chuan Kristiante nun dan dik tak chu engnge ni ang?
Rom 8:38-39 ah khan ti hian kan hmu a ni. “Thihna te, nunna te, vantirhkoh te, lalna te, thil awm sa te, thil lo la awm tur te, thiltihtheihna te, sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lovang tih dik takin ka hre si a.” Anih chuan helai changah hian kan core values, a chhia leh a tha kan thliar hranna lai tur chu chiang takin kan hmu a ni. Pathian hmangaihna, Krista hmanga a rawn tarlanna chiah ah hian a lo ni. Kristian nun dan dik chu hei hi a ni, Pathian a hmangaih tur a ni. Chu Pathian a hmangaihna chu a thil ngaihhlut thin zawng zawng aiin a dah pawimawh thei tur a ni. A awmzia ah chuan mi i huat deuh pawh Pathianin i hmangaih tur a ni a tih chuan i hmangaih ve mai tur a ni. Thupek petu chuan zawm thei turin a tanpui mai ang che.
Matthaia 13:44. “Van ram chu lova ro phum ruk ang a ni; chu chu miin a hmu a; a thukru a, a lawm avangin a neih zawng zawng chu a va hralh a, chu lo chu a lei ta a.” Neih zawng zawng han tih hian a tehkhin thu ang a, neih zawng zawng thawhlawmah rawn thawh rawh tihna chu a ni kher lo e. Amaherawhchu, mihring hian ngaihhlut zawng kan nei theuh mai. Thenkhat tan chu kan habit-te a ni tlangpui. Nuam kan tih berte hi min hmangaih em tih min zawhna atan hian Pathian in a hmang ve fo thin. Thenkhat Manchester leh Arsenal inkhelh zana Kohhran program lo awm tlat te, Bialnu bialpa te nena in hmuh aia Pathian program lo awmte, Game khelh chak em em laia TKP a program hlenchhuah tur lo awm te. Pathian chuan heng kan thil ngaih hlut te ai hian kei mi hmangaih em? tih hi min zawt fo thin a ni. I ngaihhlut ber chu Krista mawina emaw, i hmangaih ber chu Krista a ni tur a ni.
Rinna han tih hian han sawifiah leh lutuk chuan pawh ka thiam chuang lo a. Pathian nena kan inzawm tawh hnu hian mi rinawm leh mi phatsan ve ngai lo anih avang hian rin ngam hi a duh leh a phut tlat a ni. Rinna hi ka hriat thiam ve danah chuan Pathian nena thil tih dunna atang hian (relationship) a lo thanglian ve zel ni mai hian ka hria. Nitina Pathian nena leng dun leh cheng dun thin mi chuan Pathian rintlak zia a hmu tam tulh tulh a, a ring ngam tlat thin a ni. Hun harsa kan tawh chang te, Sual vang emaw, vanduai avang emaw in thil zawng zawng kan chan thei. Mahse, Isua Krista kan neih hi Setana emaw, sualna emaw, vanduaina emaw in min chhuhsak thei lo. Chu kan in nghahna Krista kan neih chhung chuan he khawvel chawp pawh hian ral mahsela kan nung reng dawn a ni. Ringtu tan hian Krista chan tluka thil hlauhawm engmah a awm lo, chumi tluka rohlu dang engmah a awm chuang hek lo a ni. Pathianin malsawmna min pekte hi Joba ang khan min lak sak vek mahse, min pe let leh vek thei tih rin ngam tur a ni. Neih tur dik, chatuan nunna neih hmasak leh vawn tlat hi a pawimawh hmasa ber a ni.
Khawngaihna hi ringtute nuna thil pawimawh tak a ni. Rinna avanga khawngaihna a chhandam kan nih chuan khawngaihna chu i ngai pawimawh ngei ngei tur a ni. Khawngaih chunga khawngaih leh chhawnna nen. Johana 1:16. Pathian nen kan inzawm leh nana kan pass mark hmuh hi tling chang chang (margin) tak a ni. Khawngaihna avang tak meuh a ni. Joba Pathian in mifel a tih pawh khan vut leh vaivuta thu in a sim a nih kha. Tunge fel awm le? Pathian khawngaihna ngai lo tunge awm le? Chu thil vek chu a ni Pathian in kan nihna tura min hrilh chu a ni. Pathian in a khawngaih che ang bawkin mi dang i khawngaih ve tur a ni. Heng sual langsar zual, zu te, mipat hmeichhiatna te, tih loh ringawt hi ni lovin, Pathian in a min phut tlat leh kan danglamna tur thilte hi Krista nen, he khawvel eng ni turin hlen chhuah i tum tlat ang u hmiang.