ROPUI TAKA NGAMTU
ROM 8:37-Thei suh e! Chûng zawng zawngah chuan min hmangaihtu avângin ropui taka ngamtu kan ni.
Sipai pahnih, indona hmuna awmte atanga thalaite fuihna tangkai tak an sawi thin chu hetiang hi a ni:
Indona hmunah sipai pahnih, inthian tha em em mai hi an awm a. Chu indona hmun atanga damkhawchhuah chu an duh ve ve a. Pakhat chuan an hmêlma chu huaisen taka hmachhawnin a kâp pawp pawp a, hmaichhanah a do a. Pakhat zâwk chuan a thi ang tih a hlauh avangin lei laihkhuarah chuan a tawmim tlat mai a, silai mu khat pawh a kâp per eih lo a ni. Vanneihthlâk takin an pahnih chuan an damchhuak ta hlauh a.
Sipai pahnih chungchângah hian pakhat zâwk chuan huaisen takin a hma-a thil awm chu a su a, pakhat zâwk erawh chuan a su ngam ve lo tih kan hmu.
Mi zawng zawngin harsatna kan tâwk a. Hmachhawn tûr hun khirh tak kan nei fo. Mi zawng zawngin kan sukiang ngam kher lo a. Thenkhat chu a chunga kan sawi angin an tlânchhe fo thin.
Kan hma-a harsatna awm kan hmachhawn ngam loh hian harsatna kan sukiang tihna a ni lo. Harsatna hmachhawn ngam loa kan awmna chuan harsatna lian zâwk min siam zâwk hial thin a ni.
Khawvêl-a harsatna awm thei hrang hrangte hmachhawn ngam tûrin hnehna neitu Pathian fate kan ni tih i inhria ang u. Chûng harsatna te chuan min ti chak zâwk thin a, kan hel avangin mi chak, ngamtu kan ni tihna a ni lo ve.
Harsatna tâwn ngam lo leh pehhêltute chu mi dawihzep, Lal Isua ring ngam lotute an ni.
Buainaten min kalsan ang tih beiseia harsatna hmachhawn ngam lo chu, a chaklohna vânga tihbuaiin a awm tho thîn.