TKP LEH ENVIRONMENT HUMHALH
Sarah Lallianpuii
Thalai Kristian Pawl thutiam ‘Krista leh Kohhran tan. Ka chakna Isua Krista chu ring tlatin nitin Pathian ka pawl anga. Kan Kohhran Pathian biakna leh hnathawnaah ka tel zel ang. Khawtlang thatna leh inunauna tinghet turin ka thawk anga. Krista hnenah midangte hruai ka tum tlat ang.’ tih thu hian thalai te min lo vawng reng a, he thutiam kan chham apiang hian eng lai nge kan tih hlawhtlin thin tih kan ngaihtuah ngai em le?
Kan khawvel lo changkang zelah hian keini Thalai Kristian te pawh hi a kum telin hma kan lo sawn ve zel a, rawngbawlna kawng thar hrang hrang te neiin, thil tha tam tak kan lo ti tawh thin a ni. Amaherawhchu, kan rawngbawlna hian eng chen nge a thlen phak tih hi kan ngaihtuah ngai em? Kan mihring puiteah hian a tawp mai em ni? Thilsiam dangte hian kan rawngbawlna hi an tem ve phak em le? Genesis 2:15-ah chuan, “LALPA Pathian chuan mihring chu a hruai a, huan enkawla vêng tûrin huanah chuan a dah a,” tih kan hmu a. He huan, kan khawvel enkawl leh ven hna hi keini Thalai Kristian pawl te hian kan thawk ngai em le? Khawtlang thatna leh in unauna tinghet tur hian keini Thalai Kristian pawl te hian eng kawngin nge hma kan lo lak ve thin le?
Environment (kan chhehvel) kan tih hian kan zinga thil nung leh nunglo te a huam veka, thil huap zau tak a ni. Tunlai khawvelah hian he thu hian hmun pawimawh tak a rawn luah chho zel a, la ngaihven em em lo te pawh hian mi sawi ri kan hriat fo ka ring a ni. Ringlo mi khawvel lehlam ami tam takte hi Environment humhalhna kawngah hian an piangthar tha em em a, keini Kristian inti te aiin an piangthar tha daih asin. Environment humhalh tur hian min thiam bik leh nihna neih kher a ngai lo va,kan nitin nunah hian kan theih dan kawng hrang hrangin kan humhalh ve thei a ni. Keini Thalai Kristian Pawl te hian hma kan lak ve theih dan tur tlem han tarlang ila.
1) Leiah – kan ram leilung hlu tak hi hmasawnna leh duhamna hian kan tichhe nasa tawh em em a, kan veng chhunga kan ramngaw te hi tul loa tihral mai anih loh nan veng hruaitute nen thawh ho dan te ngaihtuah ila. Chhan tlak a la awm lai hian keini thalai Kristian te hian hma i la ang u.
2) Tuiah- Kan vengah tuikhur hlu tak tak pahnih Baptisma leh Saptui kan nei a. Heng tuikhur hlute hi kan enkawl a ngai a ni. A tuihna a ro mai loh nan a bulhnai ramngawte humhalh tha ila. Tin, a tui tihthianghlim kawngah hian thalai Kristian te hian taima lehzualin i enkawl thar leh ang u.
3) Bawlhlawh – Serkawn hi veng fai lawmman te pawh lo dawng tawh thin kan ni a. Chumi chu chhawm nung zel turin keini Thalai Kristian Pawl te hian tan i la leh ang u. Bawlhhlawh a bawma paih te inzirtir uar zel ila, kan bawlhlawh paih hi kan fimkhur tawk loh chuan kan tui tlanah a luang lut leh zel tih hria ila, hma i la thar leh ang u.
4) Inzirtirna – Thil engpawh hi inzirtirna dik a awm chuan tha taka enkawl theih vek a ni a. Environment humhalh inzirtirna hi uar lehzualin keini Thalai Kristian Pawl te hian kan kohhran leh khawtlangah hian kalpui ila, veng nuam leh entawntlakah kan siam thei ngei ang.
Genesis 1:24&25-ah chuan, “Tin, Pathianin, “Lei chuan thil nung anmahni chi awm dân tûr ang theuh vin ran te, rannung te, ramsa te anmahni chi awm dân tûr ang theuh vin chhuah rawh se,” a ti a; tichuan, chutiang chu a lo ni ta a. Tichuan, Pathianin ramsa anmahni chi awm dân tûr ang theuhvin, rante anmahni chi awm dân tûr ang theuhvin, leia bawkvâka kal zawng zawngte anmahni chi awm dân tûr ang theuhvin a siam a. Tin, Pathianin chu chu a en a, tha a ti hle a,” tih ziak kan hmu a. Tin, Sam-ah pawh thilsiam ten Pathian an chawmawizia leh siamtuin tha a tihzia te kan hmu a ni. Thalai Kristian Pawl hla, Upa Lalthangvunga (L) phuah kan lo sak thin,
“Thalai Kristian Pawl, Krista Kohhran tan,
Kan lo ding ta e, Chanchin Tha puang turin.
Kan Lalpa’n min ko malsawmna ni turin,
Kan vanglaini Lalpa tan hmang ang u.”
tih chu hlen tumin hmangaih taka a siam khawvel hi keini thalai Kristian te hian duat tak leh tha taka kan enkawl hi kan va ba em!