THILPEK – PATHIAN KHAWNGAIHNA
Upa R.Lalhriatpuia
Malakia 3:10 “Ka inah eitur a awm theih nan, sawma pakhat zawng zawng chu thawhlawm inah rawn la rawh u; van tukverhte chu hawnsak che uin, malsawmna dawn sen loh khawp hial ka vur dawn che u nge dawn lo che u, mi han fiah teh reng u,” sipaihote Lalpa chuan a ti.
Ringtu kan nih vanga thilpek kan pek hi chi hnihin then ta ila:
Pathian hnena pek: Thuthlung hlui hun laia Temple leh hmun danga inthawina thil an hlan te, sawma pakhat leh Temple-a an pek thin chhiah leh thil dangte kha an ni a. Tunah chuan sawma pakhat kan pek te, inkhawm thawhlawm leh Kohhrana lut thin kan thawhlawm chi hrang hrangte hi a ni kan ti thei ang.
Mihring puite hnena pek: Kan mihring puite hnena thilpek pek hi Pathianin ti tura min duh, a ngaih pawimawh em em a ni a. Rethei leh harsate chhawmdawla, mamawh inphuhruk sak hi Pathianin ti ngei tura min duh, rawngbawlna pawimawh tak a ni.
Heng thilpek chi hnihte hi thenkhatin ngaih pawlhin, thil inang rengah an ngai thin a, hei erawh hi chu a dik lo a ni. Sawma pakhat Kohhrana pe lova, missionary chawm nana lo hmang ta mai te, retheite hnena pe ta maite an awm thin a, a kal kawng hi a dik tawk lo deuh a ni. Kohhran hi Krista taksa a nih avangin, Kohhrana kan pek hi Pathian ngei kan pe a ni tih ringtu puitling chin chuan kan chiang theuh awm e.
Mahni ngaihdan leh tinzawn dana thil ti mai lova, Pathian duh dan leh min kawhhmuh dan Bible-a kan hmuh ang kan zawm hi a dikin a tlo ber dawn a ni. Kohhrana kan thawhlawm thawh thin, Pastor leh Kohhrana thawktu dangte tana pe ni tlata inhriat pawh thil awm thei a ni awm e, a petu leh Pathian inzawm dan a fuh tawk loh vanga heng ngaihdan te pawh hi piang thei a nih a rinawm. Thil petu leh a dawngtu: Pathian pek mamawh miah lotu hian engatinge a hnena pe tura min duh tlat le? Min hmangaiha, Amah nen inzawmna nghet tak nei a, pumkhata kan awm theih nana kan chunga a khawngaihna lo lang a ni.
Thil petu leh a dawngtu inzawmna hi thilpek hian a ti ngheta, a in hnaihtir sawt thin a ni. Thil inpe tawn ngai hauh lo inthenawm chu in insi rial pawhin awm se, thenawm tha an ni tawn thei ngai lo ang. Chawhmeh insuah tawn thin thenawmte inkarah erawh chuan inzawmna tha tak a awm a, chhungkhat ang maiin an khawsa ho thin a ni. Pathian hian kan thilpek a mamawh hauh lo. Amaherawhchu, Amah nen inlaichinna tha tak kan neih a, a thlazar hnuaiah, a enkawla, mal a sawm theiha kan awm nan, a laka tihtur hrang hrangte min tuk ve a, chung zinga pakhat chu a hnena thilpek hi a ni. A malsawmna leh enkawlna kan chan theih nan kan tih ve tur min ruatsak a ni a. Chuvangin, Pathian hnena thilpek kan pe ve thei hi Pathian khawngaihna a thlawn a kan chan a ni, a hlu hle a ni.
Pathian hian malsawmna tam tak min vur a duh a, hriselnate, hmuingilnate, hlimnate, lungawinate, sum leh pai pawh kan mamawh ang zela min pek a duh a ni. Khawvel a kan dam chhung zawng min enkawla, kan hnenah chena, Amah nen lengdun tura min duh avangin a hnena thilpek ve hi a kawng min ruatsak a ni e. Lawmthu sawi chunga pek mai hi kan tih tur a va ni em!
(He sermon hi Dt.5.2.2017 issue-ah khan tihchhuah tawh a ni a. Vawiin, Pathian Ram Thilpek kan lak khawm ni nen a inrem em avang leh sermon thar kan neih mai loh avangin kan han chhuah nawn leh a ni e – Editor)