Eng nge mihringte mamawh ber (Sam 91)
Gangtus Khiangte
Sam 91-na hi Lalpa ringtute Pathianin a venhim thu hi Covid-19 boruakah hian a lar hle mai a. Kan missionary-te leh Pastor-te thlengin he Covid avanga boralte kan awm ta mek bawk si a. He Bible Sam 91 thu hi a rintlak/hmantlak lo em ni?
Thlirna 1-na : Kan hmelmapa hi rukhmang anih ang takin thiam takin kan nihna leh chanvote min ruksak thin a. Indonaa awm kan ni a, kan bihrukna tur hmuna kan awm loh avangte, rinnaa hmelmapa hnathawh lo dodal leh hmachhawn kawngah thutak hriatna kan lo tlakchham avang tein hetiang hi kan chungah a lo thleng thin a ni.
Thlirna 2-na : Tun hunah erawh chuan chungnungbera bihrukna hmuna awm te hi kan him tawh lo tihna em ni tih zawhna awm thei ta tlat mai, ngun takin chhui ve chhin ang aw. A hmasain Bible thu hi a la dikin ala pawmtlak reng a ni. DIABOLA kha van indona atanga leiah paihthlak a nih thu kan chhiar fova, kan hre fo bawk. A chhan pawh Pathian an a tumna a nih kha.(Isaia14:12-17;Eze 28:17) Thihna (taksa thihna leh thlarauva Pathian nena inthenna) leh thihna hi mihringte Diabola(Rul) bumna vanga kan Pathian anchhia kan dawn ngei a ni. Chuti chungin savun kawrfual min la pe ta fo mai. (Gen 2:17, 3:16-21) Pathian nena kan inrem lehna te, kan chanvo leh thiam kan chan leh theihnate erawh sawi lang lo mai ila. Mihringte hi tuar tur te, thi tur leh rim taka hna thawk tura lo piang a, natna te, harsatna leia roreltu paih thlaka thuhnuaia awm kan lo ni tawh reng mai. Chanchin Tha bu hrang hrangah Pathian fapa thihna hneha thawhlehnain khawvel hnehna a rawn tarlang ta. Rom ziakah pawh Amah ngeiin ‘Keiin khawvel ka ngam ta’ a rawn ti. He tlanna thu hi khawvel Diabola lalram chhutchhiat leh nan a tawk em em bawk a. Ringtu ten Pathian Lalram din lehna tura thil pawimawh ber a ni ta reng a ni.
Sam 91-na luhchilh dawn ang. Min vengtu Lalpa nihna te, hri reng rengin ringtute a luhchhuah ve lohna turte leh a thla hnuaia awmte venhimna thu a ni a. Tun hunah hian Pathian mite covid-19 avanga thihna an lo tawk hi Pathian hliahkhuhna thlazar hnuaiah, a Puan In a an awm loh vang em ni dawn, Chungnungbera Kohhran ten thihna an tawh? Ni lo ve, khawvelin a ken tel tawh chhiatna leh hripui avangin mitam takin nunna kan chan chho zel ta zawk a ni. Isua meuh pawhin hmelma hnuhnung ber thihna kha tirh a nihna avangin a tuar asin (IKor15). He Bible thu hi tun hunah hian Thlarau Thianghlim zarah lo chuan Setana/Diabola aw a ni thei tlat nia. Reference en ila, (Lk 10:19,4:10-12, Mat 4:6) te leh khing thu ken zawmpui te en leh ila (Deut 6 -8) inkar kha ngun takin lo chhiar ila. Pathian thupek leh thutiam a ni tlangpui a, Pathian fapa Kan Lal Isuan leia tuarna leh thlemnate a hmachhawnna atang khan, Isua Thlarau Thianghlimin a luah hnuah rawngbawlna atan dawn khan; Setana thlemin ni 40 leh zan 40 thlalerah a awm.(Chanchin Tha bu 4-ah ziakin a awm) Chutah chuan Setana’n thlemna chi hrang hranga a beihna kha Thuthlung Hlui Pathian thu vekin a ni a thlem ni. Pathian fapa Isua, Thlarau Thianghlim luah khat tan khang tisa riltamna, lalna te, Pathian fa nihna lantirna tura a tirtu thiltihtheihna hman theih loh a awm lo ngei ang. Mahse, Thlarau Thianghlim hruai a nih angin fing takin Pathian thu awm sa (ziah sa) atang thovin a ni Diabola kha a do ni. Heta pawimawh ka tih em em chu Lalpa ringtute hian Thlarau finna kan van mamawh ta ber em. Chumi neia Pathian aw leh Setana aw hrethiam tur chuan Thlarau Thianghlim awka kan hriatthiama kan zawn/Bible chhiar/hmuh leh tawngtai a pawimawh ta hle mai. Pathian Thlarau Thianghlim hian a mite (a koh-hrante) ah Amah rinna zawka fiahna paltlang tur te, hnawl tur te, Ama ropuina tura RING tur te, fiah a hun a fiahpui ngam tur te leh taksa thihna hial thleng tur pawh a Amah fiah lo tur a tihna awka (Lalpa i Pathian fiah suh) kan hrethiam ngeiin ka ring. (Daniela, Eliza, Samsona etc. nun chhui ila) Chutih rualin Pathianin Fiahna kaltlang pui a phalte an awm tho bawk. Khawvel luah khata thi tura rawn piang kan ni reng si a. Kohhran member boralte hi Sam 91-ah hian an awm lo, an awmna a dik, a dik lo, a inpek full loh vang etc. tih lam a kawk ta tlat lo nih chu.
Chuvang chuan he sam 91-in a tum hi engti kawng mahin a thelh lovanga, adik reng bawk ang. Amaherawhchu, a dawngtu lamin engtia hman chhuah tur nge tih erawh Thlarau Thianghlim tanpuina zarah chauh kan hrethiamin kan nei thei chauh ang. Tin, Pathian thu ringtu nun hi kan inzirtirna bul hi a fuh tawk lo tih ka nei ve. Pathian chu engkimtithei a ni a, thu kan awih chuan kan beisei (damna leh damreina, hmuingilna, tehna atanga sanga kan dah zahawmna Pastor, Upa leh Rawngbawltu,mi chunga leng nihna etc.) nei turin Pathian hian min awm tirin, mal min sawm thin, tih thu hi thutak hrul a thu dik a ni a. Natna leh retheihna te, thihna hi Pathian min pek ni lovah kan ngaiin kan ta nilo tur ah kan dah ta daih thin alo ni. A tawp berah chuan a sawitu hi Pathian thu duh ve tak, mahse luhlul ve em em sawifiah thiam silo a ni a. He thu leh thil dangah pawh mihringte mamawh ber nia a hriat chu Thlarau Thianghlim atanga chhuak hriatthiamna, hriatna, finna hi a ni mai e. (Rom 8: 24-30)
Lalpan malsawmin hriatthiamna pe lul che u rawh se.