LALPA HMAN TLAK
Alex Lalmalsawma Pachuau
Mosia chuan ama thahnemngaihna leh ti ve thei ni a a inhriatna, a chakna in thahnemngai takin Hebrai mi pakhat a chhan a, a pek pawh a inpe zo ngei mai. A lo vawtu Aigupta mi chu a vawhlum ngam hial a ni. A thahnemngaihnate, a dai thui ngamna, a inpeknate hi mihring atang chuan hei bak hi a awm thei tawh lo a ni. Nimahsela, a thahnemngaihna, ti ve thei ni a, a in hriatna zawn atanga a thiltih hian kawng ro a su lo khawp mai. Ram hla tak, Midian ramah a tlanchhiat phah ta vawn vawn mai a ni.
Bible thu kan chhiar zel chuan, Exodus 2:23 ah, “Israela thlahte chu an hnathawh hautak avang chuan an rum a, tin, an au va. Tichuan an hnathawh hautak avanga an au thawm chu Pathian hnena a han thleng ta a” tih a ni, ‘ta a’ tih lai hi ngun deuh zawk a kan ngaihtuah chuan Mosian chet a lak a, thahnem a ngaih em em lai khan Isarel fa te au thawm Pathian hnen a thlen thu ala lang lo. Chu mi awmzia chu Pathianin chet lak a tum hma in Mosian ama thahnemngaihna in chet a lo la tihna a ni. Mosia thil tih ve te hi a miten fak dawn se, fak tlak a ni a, a man chhuang dawn se, chhuantlak a ni bawk. Mahse alo tih ve hian kawng ro a su tlem hle. Pathian ala chet loh vang a ni.
Chutichuan Mosia chuan Median rama a pu Jethroa beram a ven laiin Pathianin a rawn ko ta a. A chipuite chhan nan a, tual meuh that ngam khawp a huaisen khan chhuan lam chi hrang hrang siamin, a pha nasa ta mai a ni. A chanvo a ruatsak a hi Committee-na a pha ni ta sela, a phatna thu sawi hian a ding kur zut mai dawn tih na a ni. A awmpui ngei tur thu te leh a tiang hmang a thilmak tihtheihna a neih tir ngei a ni tih te a hriat hnuah pawh tawng hmang a thiam loh thu a pha in, midang tir mai turin a la ti nasa mai a ni.
Mosia hi a mite hruai chhuak tur a Aigupta a kir leh hian amah ah chhuan tur a awm tawh lo a, tirh luih a ni. Tual meuh that ngam khawp a thahnem a ngaih laiin koh a ni lo a, khatih hunlai khan Pathian ala chet loh avangin a thahnemngaihna khan awmzia a nei thui lo hle bawk a ni. Pathian chuan thei ni a alo inhriatna leh a phurna zawng zawng a bo hun alo nghak a, amahah awm reng, a awm tawh loh hnuah Mosia hi hman tlak a lo ni chauh a ni. Aigupta a a kir leh hian Mosia ah hian phurna reng a awm tawh lova, a thahnemngaihna ni lovin Lalpa thahnemngaihna zawkin a rawngbawl turin a kir leh a ni.
Rilru leh tihtakzetin, “Lalpa min hmang ve rawh” kan ti a. Kan ti mai mai lo. Dil mai duh tawk lovin, “kan penchhuak tur a ni” kan ti a, a beih pawh kan bei nasa reng thin. Zanlai dar 1/2 ah pawh “Chutah, khatah tawngtaina tur a awm” ti a phone call dawn pawh a, Lalpa tan a nih phawt chuan phur tak leh thatho tak a chhuak mai tur hi kan tam em em a ni. Mosia ang a kohna dawng ve ni phei ila, phat chu sawi loh, kan va phur dawn em. “Heng kan rawngbawlna te hi i ti tawh lovang u” kan in ti a ni lo. “Buh seng tur a tam hle si a, nimahsela a thawktute an tlem” (Mt 9:37). A tih laiin, he ti khawp a Pathian hman ni duh si hi, kan in pekna ngaihtuah chuan Mosia in pek tirh lai ang maiin awmzia a nei thui lo thin khawp mai. Pathian ala che lo a ni ve tho mai lo maw?
A phur phur leh a thahnem ngai ngai te a hmang nghal ngawt lova, hman tlak ni turin min chher hmasak phawt hi a thil tum a ni. Thahnemngai thu ah chuan a ram zau zel tur hian keini aiin thahnem a ngai zawk. Amaherawhchu, a hman tlak kan la ni lo mai zawk thin a ni. Aman a duh ang a min chher hriam hunah chuan, ama thahnemngaihna zawkin kan tih theih loh min tih tir hi a in peih reng a ni. Mosia’n THEI ni a, a in hriat laiin kohna a dawng lo, tih i hre reng ang u. A thu malsawm thin tu Lalpa chu fakin awm rawh se.