TANG TLANG THIAM ILA
Dr. Zauva
Broiler ar vulh hi a chhiarkawp hisap chuan a hlawk khawp mai. Ar note man, ar chaw man te han chhut ila, thla hnih velah a hralh tan theih a, ar 100 vulh ila, pakhat Kg 3-4 vel kha Kg khat man zelin han puntir ila, kan inchhut hausa thuai mai. Mahse hralh tham deuh kan han neih meuh chuan rin aiin hralh zung zung a har, hisap nen a inmil tawh thin lo, engmah kan nih pui leh tak tak lo fo. Broiler ek hi thingzaina phuai nen chawhpawlh ila, lei laih khuar feet 2 X 3 a zau, feet 2 vel a thukah up ila, a bul vel hnim samna nen chawhpawlhin leiin chhilh ila, a chungah tui lut thei lo turin sylpouline in bilh tlat ila, thla hnih hnu ah hawngin chawk ila, up nawn leh in, thla khat dang up leh ila, leitha class sang tak mai a lo chhuak ang, thlai chawm nan a tha em em. Thlai hi han thar chiam pawh ni ila a hralhna lamah bawk kan buai leh a, dinchhuah pui a har khawp mai, mahni ei tur khawp thar pawh hlu tak a ni tho mai a, lei zar zar tu nei ila chuan sum thawh chhuah ve teuh theih erawh chu a ni. Sangha khawi hi a har vak lo, chawm an hautak si lo, Grass carp (a dum chi) hian Isikut hnah hi an duh em em a, an thang duh hle bawk. Magur ho phei chuan duh an ngah a chawm an awl, Silver carp leh common carp hian archaw hi an ngeih khawp mai, chawm that chuan an sa a tui hle a, chaw tha a tling bawk. Hralh khawp thar a har lo, mahse hralhna-ah bawk kan buai leh thuai mai. Kan khawtlangah hian chhungkaw li nga vel hian tih takzetin ar vulh ta se, an arsa chu lei sak tum hram ta theuh ila (arsa kan lei dawn chuan kan khaw arsa ngei lei ila, ka tihna), chutiangin sangha kan lei dawn pawn kan vengte dil sangha ngei kha, thlai pawh thiamna nen, leitha rintlak nen tam tham deuh thar chhuak thei chhungkaw li nga vel awm se, an ta hlir chu khawtlang hian lei ila. Chutiang zelin tang tlang thiam ila chuan khaw khat a kut hnathawk chhungkaw 20 vel hi chu veng dang market ngai miah lovin kan dinchhuahpui thei mawle. Vawk vulh hi tunlai vawk hri len lai tak chuan sawi pawh a phurawm lo. Mahse, hri leng hi chu a la zia leh mai ang a, vawk vulh dan lamah hma kan sawn hleithei lo hi chu a pawi ngawt mai. Kan sa ei duh ber leh ei tam ber a ni si, uluk ve deuhvin scientific ve deuhvin vulh dawn teh ang u, hri leng a lo awm pawh a him turin a tih theih asin. Vawk hian lum leh vawt an tuar thei lo hle a, khaw lum huna in tih daih theih, a vawh huna in tih lum theih turin vawk in sak a har lo. Tih fai ngun an tul, tlat tirna area zimte tal nei se, tawm hulna bukte nen. Zau ve deuh hlek a hung tur a ni a, a hung chhungah mihring leh ran dang reng reng an lut tur a ni lo va, a enkawltu chauh a lut ang a. A lut tur hian vawk in chhunga hak tur bik thawmhnaw a nei ang a, vawk in kawngka bulah a inthlak vek ang a. Chaw leh damdawi bak, pawn lam thil a rawn pu lut miah lo tur a ni. Chutiang chuan hri leng lakah an him mai. Inhnuai leh kawmkar tawp lai-ah vawk in tenawm angreng tak kan la nei fur mai. Hmasawn kan tumna tur pawimawh ber pakhat niin ka hria. Chutianga uluk leh scientific ve deuhva tan lak chuan vawk vulh hi eizawnna tha ber pawl a nih ka la ring tlat nia.
(STK R&D Committee-in a rel angin ziah a ni)