VAN RAM I KAI NGEI ANG
Chhana Ralte
Tun tum chu Lal Isuan vanram min buatsaihsak mek kan chan theih dan tur kawng lo zir ho dawn ta ila. Kan hriat theuh angin thlahtu bul Evi leh Adama-te bawhchhiatna avangin khawvela mihring piang zawng zawngte chu Pathian hmelma kan lo ni ta kha a ni a. Chu Pathian leh mihringte inrem tawh lo chu a siamtu Pathian ngei chuan mihringte min hmangaih em avangin amah nen kan inzawm leh theihna tur kawng hnih a ruahman a. Chu ruahmanna kawng hnihte chu kan chhui chho dawn a ni.
Ruahmanna hmasa zawk kha han chhui hmasa ta ila. Pathian chuan Amah nen kan inrem leh theih nan leh a malsawmna leh duhsakna mihring ten an chan leh theihna turin dan leh thupekte a siam a. A thupek zawmtute chu malsawmnain a umzui thin a. Pathian duh dan zawm lova thil sual titute chu Pathian ngaihdamna chang turin inthawina an hlan angai thin. Pathian laka thil sual ti te’n Pathian ngaihdamna an chan leh theih dan kawng tlem Leviticus bu atangin kan sawi zui ang.
A hmasa berah chuan Puithiamin thil sual lo ti ta ang sela, chu thil sual tih man chu mipui ten an tawrh lo ngai ta ang se, mipuite tuar ai chu ranin a tawrh a ngaih phah thin a. Puithiam thil tihsual avang chuan bawngpa tuai hmelhemna nei miah lo an talh a ngai thin a. Tunlai hunah han ngaihtuah ta ila, kan puithiamte chu pastor-te hi an ni mai awm e. Pastor ten thil sual Pathian duh loh zawng an tih apiangin a bial mipui te’n Pathian hremna an tawrh loh nan bawngpa tuai hmelhem lo talh ziah a ngai dawn a nih chu. An sawngbawl dan hautak zet chu kan sawi zui lo mai ang.
A pahnihnaah chuan Israel mipuite khan tihpalh thil thuah Pathian duh loh zawng thil sual an tih khan Pathian nen an inrem leh theihna turin Pathian hnenah bawngpa bawk an sual thawi nan an talh leh a ngai a. Tunlai angah chuan kohhran mipuite’n kan hriat lohna avang pawhin lo kal sual palh ta ang ni ila, kan kal sual apiang khan Pathian ngaihdamna kan chan leh theih na turin bawngpa talh fo a ngai dawn a ni. Kal sual kan awm zin deuh phei chuan mahni hna tul leh pawihawi pawh khawih hman lek lovin khawtlangin inthawina atan hun tam tak kan hmang ral ngei ang.
A pathumnaah chuan ram hruaitu leh roreltuten Pathianin tih loh tur a tih ang chi reng reng, entirnan, dawt sawi ang chite an lo ti palh anih chuan chu an thil sual tih lak a Pathian ngaihdamna an chan theih nan kel no hmelhem lo hmanga inthawina hlan leh a ngai a ni. Dawt an sawi zin deuh emaw Pathian duh loh zawng engpawh an lo tih zin deuh phei chuan rorel hman lek lovin inthawina atan hun tam tak sen a ngai ngei ang.
A tawp berah chuan minaranin thil sual Pathian duh loh zawng a lo ti palh anih chuan a thil sual tih thawi nan kel nu hmelhem lo a hlan ve leh a ngai a ni. Pathian chu thianghlim famkim anih ang takin ama mite pawh thianghlim turin a phut bawk a. Tih loh tur tam tak a hrilh a; ei leh in thuah te, mipat hmeichhiatna hman khawloh thuah te, in thenawm khawvenna thuah te, chenna in sak dan thuah te,thil thiang lo khawih thuah te, hre miah lova thil lo tihsual thuah te, sum leh pai hman dan leh kawng tinrengah duhdan a nei a. Chung a duh dante chu mihringte chuan an zawm loh ni apiangin Pathian ngaihdamna an chan leh theihna turin inthawina chi hrang hrang an hlan a ngai thin. Chutiang chuan Lal Isua Kalvari tlang kraws-a a thih a, a thawhleh hma zawng kha chuan Pathianin a mite a enkawl thin.
Pathian chuan a mite chu a dan pekte zawma thianghlim taka nung tura a phut thin chu, a phut mihring ten an theih lohzia a hriat chuan Amah Pathian ngei chu a hmangaih mihringte lakah chuan a beidawng ta a. Chuvang chuan thuthlung tha zawk (khawngaihna), ruahmana tha zawk a lo siam leh ta a ni. Ruahmanna hmasa zawk kan sawi zawh tak chiah hi dan hmanga Pathian rorelna tiin sawi ta ila. Dan hmanga Pathianin ro a rel lai khan tumah reng reng Pathian mit tlung zova khawsa thei an awm lo anih kha.
Hebrai lehkhathawnah chuan ‘thuthlung hmasa chu sawiselbo ni se, thlun nawn a ngai lo tur,’ tiin a ziak a. Thuthlung hmasa zawk chu hnawlin Pathian leh mihringte inrem leh theihna turin Thuthlung Thar siam a lo ni leh ta a. Chu thuthlung thar chu tlem han zir ho leh ta ila.
Rom lehkhathawn kan en chuan mi pakhat avangin khawvelah sual a lut a, chu sual chuan mi zawng zawng a fan chhuak a, mi tin mai chu Pathian hmelma an lo ni ta vek mai a ni. He lai thu hi mi tin mai hian pawm nuam kan ti em em mai a. Misual, Pathian hmelma leh chhandamna chang ve phak lova inngaihna lian tak hi kan nei reng mai a. Nimahsela, khi mi chang chhunzawma thu lo awm leh chu, mifel pakhat a lo awm leh a, chu mifel avang chuan mi tin mai chu mifel leh thianghlim, Pathian fate nih theihna an lo nei leh ta vek mai a ni tih hi mi tam zawk hi chuan kan pawm thei lo thin a ni.
Pathian mite, chhandam fa, ni tur chuan thianghlim famkim nih angai a, nitin darkar tin suangtuahna sual, Pathian duh loh zawng ngaihtuah a ti thin kan ni tih kan in hriat aia chiang hian Pathian chuan min hria a. Dan zawh famkim a thil tha ti tura phut leh hrem thin chuan mihring a siam that lohzia a hriat chian em avangin Ama nun ngei, a fapa Isua Krista nun ngei chu kraws kal tlangin a thlawnin min pe a. Chu Isua Krista chuan, i ngaihtuahna sual leh thil sual tih thin avanga ran talh fo ngai tawh lo turin kraws-a an khenbehna thisen luang ngei chu kengin Pathian hnenah i tihsual thawi nan, Pathian ngaihdamna leh chhandamna i chan theih nan ama thisen ngei kengin Puithiam hna min thawhsak ta a. Chu Chanchin Tha lawmawm em em chu i tan a ni tih hria la, pawm bawk la, Lal Isua chuan i ai awhin Pathian hmaah a din sak ve dawn che ani tih hi beisei tlat la. Zu leh drugs ngawlvei pawh i ni maithei, hlep ruk ching leh dawtsawi ching, sex hmang khawlo thin leh sual chi tinreng khawih thin pawh i ni maithei, mahni mihring puite zinga nung ve tlak lo thih dan azawnga thih dan tenawm ber krawsa amah kan Lal Isua ruala khenbeh ve ngei pawh khan, thuthlung tha zawk; Thuthlung Thar chu a chhawr tangkai tak zet. Pathian hnen thleng thei turin eng thil tha mah ti thei dinhmunah a ding tawh lo, thi lek lek tawh kha a ni a. Nimahsela, pan tur dik tak leh beisei tur dik tak Isua Krista chu beiseiin, Lal Isua chuan a beisei aia tha mahin chhandamna a pe nghal hmiah mai a nih kha.
Awle, nangpawh unau duhtak, i awm ang ang khan i aiawhin Lal Isua’n Pathian hmaah a din sak duh che a ni tih hria la, ringhlel lovin pawm bawk la. Chhandamna i chan tak avang chuan Pathian hnenah bang lovin lawmthu sawi fo la, tichuan i nun pawh i hnena awm Thlarau Thianghlim chuan nitin a ti chakin a ti thianghlim zel ang che.