A TLAKNA CHU NANG LEH KEI HI KAN NI
Luka 8:13 “Tin, pialtlep chunga mi chu heng mite hi an ni:an hriat veleh thu chu lawm taka pawmte hi;nimahsela zung reng an nei lo-reilote chauh an awih a,thlem hunin an bansan leh thin.”
He lai thu hi kan hre ngaithla tam tawh awm e. Buh chi tehkhin thu kha a ni. Luka bung 8 ah hian buh chi kha Pathian thu a ni tih chiang takin kan hmu. Luka bung 8-ah hian a tlakna lei hi pa li kan hmu thung a ni. Rah chhuah leh rah chhuah lo an awm si. A nih leh a buh chi a kha a danglam vang a ni thei em? Ni thei lo. Buh chi kha a ngai reng a ni. Buh chi tha bik chuang a theh bik pawh a sawi lo. Buh chi ngai Pathian thu tho kha a ni. A tlakna lei zawk hi a pawimawh a ni. A awmzia ah chuan Pathian thu chu thlarau takin rawn sawi emaw, Vantirhkoh tawngin rawn sawi emaw pawh ni se a ngai tho a ni an rawn sawi dawn! Engti zawng emaw a phut deuh duala, mur deuh chem chem thei khawp a Pathian thu sawi thiam a nih vanga Isua Krista hi zui tur kan ni lo. Isua Krista hi min chhandamtu (sual lakah) a nih avangin ka zui mai tur a ni. Thu chu a danglam thui lutuk thei lo a ni.
A pawimawha chu nang leh kei hi kan lo ni ta a ni. Pathian thu in min den dan hi a pawimawh em em a ni. Mi chi hrang hrang kan awm a ni. Pathian thu ngaihthlak dan chi thum han bih zuai ila.
Thawnthu anga ngaithla thin: Aw le, mi thenkhat chuan ngaihtuah chiang mang hlei lo hian kan ngaihthla liam ve mai mai thin. Inkhawm hunah inkhawm ve tlawng, Fellowship hunah kal leh hmiah, thingpui lum tur tih a lum ve mai. Pathian pawh ngaihtuah ngai em em lo, Pathian thu pawh zawm tum chuang em em lo. Mahni awm awm a lungawi. Pathian leh kohhrana mahni hmingchhiat lohna tawk a, mi pangngai nihna atana bel ve thin pawh a lo awm ve theih tho a ni. Rah an chhuah thei lo a ni.
Midang tana ngaihthlatu: Pathian thu an han sawi a, midang zawm tur atana lo ngaithla daih mai mi pawh a awm ve theih tho a ni. Pathian thu a sim tur sual hrang hrang an sawi laia, midang sim tur lo hmu kur mai thin. Mahni zawm tur hmu thei miah si lo pawh hi a awm theih em em a ni. Mite tana Pathian thu ngaithla thin hian rah an chhuah ngai lo a ni.
Engnge, buh chi rah chhuah tir thei khawpa lei tha chu ni ta ang le? Lei tha, Pathian thu rahchhuah tir thei chu hei hi a ni. Pathian thu chu a thinlungah a vawng reng a. A ngaihtuaha, a zawm a (harsa ti tak chung pawn) a nun pui (a practice) thin a ni. Chu mi ngei chuan Pathian thu chu engnge a nih a, Pathian thu zawm lawmman pawh chu engnge a nih chiang takin a hria a. Midangte tana malsawmna awm tur pawh a kawhhmuh ve thei thin a ni. “A lawmna chu Lalpa danah a ni zawk; a dan thu chu a chhun a zanin a ngaihtuah thin.” Sam 1:2.