KUT HNA THAWH
Dr. Lalramzauva
Serkawn Biak Inah hian Thawhlehni apiangin kuthnathawktute pualin kan tawngtai thin. Kut hna thawh hi eizawnna pawimawh ber a ni a, a chhan chu kamding kan tih ho ai hian kut hna thawka ei zawng kan tam daih zawk vang a ni. Kut hnathawk tih leh mahni kutkawih ring a ei zawng, tih hi thil thuhmun thuak, danglamna pawimawh tak nei si a ni. Kut hnathawh chuan mi hnuaia nitin rate-a inhlawkfak emaw, lo leh huan neih te a kawk deuh bik a. Mahni kutkawih ringa ei zawn tih hi keima rilruah thiamna leh finna hmanga mahni emaw, mahni baka midang rawih belh hial zawk a eizawnna ngelnghet deuh zawk din hi a ni. Entrepreneurship an tih hi a ni ber awm e. Lehkha zir sang tan chuan sawrkar hna thawh a tha ber a, mahse hna a awm mai loh avangin sawrkar hna nghah pah a engemaw ti a lo intuak ve mai mai ang deuhvin hna hi kan en fo mai. Hei hi a dik lo. Mahni kutkawih ringa eizawnna kan in siam thiam hunah chuan sawrkar sawrkar hna thawh chu ngaihsanawm a lo ni hauh lo, tih kan hmuchhuak thuai ang. Lehkha zir sang lo tan mi hnuaia inhlawh a lar hle a, hei pawh hi eizawnna tling a ni, a tha em em a. Regular taka thawk peih tan chuan hlawh rate hniam berah pawh thla khatah cheng sing chuang hlawhna a ni. Kan hriat atana pawimawh erawh chu, hna hnuaihnung ber, helper kan tih ang thawk kumkhua tura indah deuh tlat, hmasawn tum lo, thiam belh em em tum lova rate hnuai bera awm tlat hi sim a. Intahhriam ve deuh va, huai taka mahni rate pawh in san ve ngam hi tihmakmawh a ni.
(STK R&D Committee-in a rel angin ziah a ni)