HMANGAIHNA HMASA
Jn 14:23-24; Thup 2:1-7
Rev. Lalramngheta Chhangte
Ephesi Kohhran Background: Ephesi khua hi Rome sawrkar hun laia Asia ram bunga khaw pawimawh ber a ni a. He khua hi sumdawnna hmun pawimawh tak a ni a, mi tam tak sumdawng turin an lo kal thin a ni. He khuaa Kristian awm hmasa ber te chu Priskili leh Akuila te an ni (TT 18:18-20) Chumi hnuah Paula pawh kum hnih lai mai a awm ve nghe nghe a, hetah hian Kohhran a din a ni (TT 19:1-10). Ephesi khuaa Paula awm kum hi AD 53-55 vel nia ngaih a ni a. Heng hun lai hian nitin inkhawmna inah huai takin thu a sawi thin a, tichuan Kohhran a lo ding ta a ni tih Tirhkohte Thiltih Bung 19-ah kan hmu a ni. Heta Paula thu ngaithlatute hi Ephesi khaw mite chauh ni lovin sumdawnga lo kal te pawh an ni a, anni hian Kristianna chu an awmna hmun theuhvah an pu darh ta a. Chanchin Tha thehdartu pawimawh tak an ni (TT 19:10).
Ephesi Kohhran ding tir chu Thlarau Thianghlim an chungah a thleng a tawnghriatlohtein thu an sawi a, Pathian Thu pawh an hril thin a. Asia ram zawng zawnga Judate leh Grikte pawhin Lalpa thu an hre ta hial a ni. Lalpa Isua hming a lo lian ta a, an thiltihte thupha an chawi a, an inpuang a. Dawihmang a then tam tak pawhin an lehkhabute an rawn la khawm a, an eizawnna chan huamin an halral a, cheng singnga man hu lai a ni. Lal Isua an hmangaihna hmasa hi a ropui hle mai. Lal Isua pawhin a comment dan hi lo en ta ila “I thiltihte, i thawh rimzia leh i chhelzia te, mi sualte i ngaihtheih lohzia te ka hria. Tirhkoh ni si lova tirhkoh intite chu i fiah bawk a, dawthei an ni tih i lo hre tawh a; chhelna i nei bawk a, ka hming avangin i tuar tawh a, i chau si lo va” a ti a ni. Harsatna lo thleng karah pawh huai takin an ding a, chhel takin an tuar a, an chau chuang lo a ni tih chiang takin a lang.
Amaherawhchu Lal Isuan demna a neih chu ‘hmangaihna hmasa ber ban’ chungchang a ni tlat. An thawkrimin an chhel hle a, sual pawh an ngai thei lo narawh. Tuarna karah pawh chhelna nasa tak neiin tuar hle mah se an chau chuang lo va, mahse Isuan demna a la nei fo mai. He Kohhran hi Kohhran tha tak ni ngei pawhin lang mahse Lal Isuan “demna che ka nei a ni, i hmangaihna hmasa ber kha i ban tak avangin. Chutichuan, i tluksan tak chu hre reng la, simin, atira i thiltihte kha ti leh rawh, chutilochuan i hnenah ka lo kal ang a, i sim loh zawngin i khawnvar dahna kha a hmun ata ka sawn ang.” a la ti fan a ni. A va zia lo em! Lal Isua hmangaihna hmasa bansantu tan chuan thawhrimna te, chhelna te leh sual huat te pawh hian Kohhran neitu lung a ti awi zo chuang lo a ni tih a chiang hle mai.
He thu hi kan in ennna tur a ni. Ephesi Kohhran tan chauhva sawi a ni lo va, keini tan pawh a ni tih chang 7-naah hian a lang chiang hle a ni. “Thlarauvin kohhranho hnena thu a sawi hi beng nei chuan hre rawh se” tiin a sawi a ni. Chuvangin hmangaihna hmasa ber bansan lo va, chumi hmangaihna kan neih laia kan thiltihte tih zui zel a tul tak zet a. Chumi kan tihzui loh chuan khawngaih rawngbawlna hna, kan khawnvar pawh min sawn sak hial mai dawn a ni tih chiang takin kan hmu a ni.
Lal Isua hmangaihtuten kan tih thin tur a awm a, chu chu a thupekte zawm a ni. Lal Isua Thupekte zawm hi amah hmangaihtute tih ngei ngei tur chu a ni tih Lal Isuan hmun hrang hrangah a sawi a, “Nangnin mi hmangaih chuan ka thupekte chu in zawm ang” (Jn 14:15). Tupawh ka thupekte neia zawm chu mi hmangaihtu a ni; tupawh mi hmangaih chu ka Pain a hmangaih ang, kei pawhin ani chu ka hmangaih ang a, a hnenah ka inlar ang,” (Johana 14:21) “Miin mi hmangaih chuan ka thu a zawm ang a; ka Pain ani chu a hmangaih ang a, a hnenah kan lo kal ang a, a hnenah kan awm reng ang”. (Johana 14:23) a ti a ni. Chutih laiin Lal Isua vekin Tupawh mi hmangaih lo chuan ka thu a zawm lo (Johana 14:24) a ti a ni. A thu zawm lo chuan Lal Isua a hmangaih ngai lo a ni.
Hmangaihna hmasa bansan tute pawh Lalpan a ko nawn leh thin a ni tih chu Petera chanchin atang hian a chiang hle mai. Lal Isua zirtirte zinga khaipa ber a ni a, Lal Isua avanga nun hial paih ngam a ni. Mahse a Lalpa vawithum zet a phatsan a, a hna ngaiah let lehin len dengin a kal leh ta a ni. Mahse hmangaihtu chuan a va hmangaih tak em! A hna hlui a thawk tan chauh tihin a hnenah a rawn inlarin zawhna chhan har em em mai vawithum, a phatsan zat chiah a zawh hnuah a tira a kohna ngai bawkin “Mi zui rawh” a ti leh ta. Hmangaihna bansan tawhtu ni mah ila, Lalpan hmangaihna avangin min ko nawn leh thin a. Kan hmangaihna hmasa ber tluksan lo va, nitina hmangaih zual deuh deuhtu kan nih a tul a ni tih i hria ang u.
Tlangkawmna: Kan hun kal tawhte chhui kir ila, Lal Isua nen kan intawhna hmasa bera kan rilru leh ngaihtuahna te chhut let leh ila. Amah kan hmangaihna nasatziate pawh chhui kir lehin atan kan inpeknate pawh chhut nawn leh ang u. Kan hmangaihna hmasa ber kan lo ban tawh pawh a ni mai lo maw? Kan lo ban tawh anih chuan Lal Isuan kan tluksan tawh chu sima kan thil tha tih thinte ti leh turin min sawm a ni. Chutilochuan a khawngaih rawngbawl hna kan kova a nghah ngei pawh hi min sawn sak mai ang tih thu a sawi si a. In en let a, kan nun inchhut ngun theuh turin Lalpa hmingin ka sawm che u a ni. Lalpan a thu kan zaa tan malsawm rawh se.