NUN HLIMNA THURUK
Phillippi 4 : 11-13 “Ka tlakchham thu sawi zawng ka ni love; kei zawng eng ang pawhin awm mah ila, lungawi zel ka ching tawh si a. Tlawm taka awm dan ka thiam a, hausaa awm dan pawh ka thiam bawk a; thil tinrengah leh thil zawng zawngah tlai leh riltama awm dan, hausa leh tlachhama awm dan thuruk ka hre chhuak tawh. Mi tichaktuah chuan engkim ka ti thei a ni.”
Mihring kan nun dan kawngah hian Pathianina min duan dan kan ti dawn nge, mihring nunphung ve hrim hrim kan ti dawn zawk. Kan paltlang tur leh hmachhawn tur tam tak hi a inchhawp teuh mai a. Chu chu tute tan pawh, ringtu tan pawh ring lotu tan pawh pumpelh theih a ni chuang lo a. A changin kan nunah hlimnain min rawn nan chang a awm a, a changin kan hlim theih miah loh lai te, kan lungngaih em em hunlaite a awm thin a. Kan sawi tawh ang khan chu thil chu mihring tute pawh mai hian kan paltlang vek a ni. Mipa kan nih vang emaw hmeichhia kan nih vang emaw, kan hmelthat vang emaw kan hmelchhiat vang emaw, kan hausak vang a ni emaw, kan retheih vang emaw, engvang pawhin he thil hi pumpelh theih a ni lo a. Chutih rual erawh chuan, kan mizia a zir te, kan thil thlir dan a zir te leh chhan hrang hrang avangin hlimna kan hmachhawn dan te, lungngaihna kan hmachhawn dante pawh a inang lo thei awm e. Thenkhat chu an hlimna an tawh lai leh lungngaihna an tawh lai pawha danglam em em lo, lanchhuah tir lem lo leh hriat har tak te pawh an awm laiin, thenkhat ve thung erawh chu an hlim lai leh an lungngaih lai hriat em em, an hmel leh an awmdan thlenga hriat theihte an awm thung a. Chutih rual erawh chuan mi zawng zawng, tute mai pawh hian hlim theih dan te, lungngaihna hmachhawn dan tur zirtirna hi mamawh vek mai kan ni a. Chutiang atana point pawimawh tlemte kan thiam ang ang han zir ho ta ila.
1. Mahni aia midang tha zawka ruat : Phillippi 2 : 3 thuah khan kan hmu a. “Elrel leh inngaihhlut avanga engmah ti lovin, mi tinin inngaitlawm takin mahni aiin midang tha zawk ah ruat theuh rawh se.” tiin a inziak a. Mahni kan inngaihhlut avang hian midang itsikna hi kan thinlungah hian a lo piang awlsam khawp mai. Miin min ngaipawimawh lo ni a inhriatna avangte hian kan thinlungah hian hrehawmna te, itsikna a lo piang duh khawp mai. Chu thil chuan lungngaihna min thlen fo thin reng a ni. Chutih rual erawh he thil pawimawh tak ni si hi Isua Krista ringtu kan nihna atang chuan thil neih theih a ni thung a ni. Isua Krista he khawvela rawng a bawl lai khan a nun leh a thiltih tam takah khan tlawmna a entir a. Chu chu amah ringtute pawhin kan tih ve tur leh kan nuna tel ngei ngei tur a ni. Pathian atanga tlawmna nun tak tak neih chuan kan nunah itsikna leh elrelnain hmun a chang tawh lo a, midang hmuh dik theihna leh duhsakna thinlungah a lian em em zawk tawh a ni. Chutiang thinlung miin a neih na na na chuan, nun hlimna thuruk mak tak mai a nei thei a ni. Pathian avanga harsa ti chung chunga ka ngaihdam emaw ka thungrulh loh hian malsawmna tam tak thlarau lamah pawh ka dawn let phah a, nun hlim ruk veng vengna ka neih phah thin. Chutiang chu nangni pawh in nih ve ngei ka ring.
2. Tawng tam loh : Hei hi a pawimawh khawp mai. I Petera 3:10-ah khan kan hmu a, “Nunna hmangaih duh leh ni thate hmuh duh chuan sual lakah a lei veng tha sela, a hmui pawh ngam thlemna thu sawi lo turin veng tha rawh se.” tiin a ziak a. Midangte tana pawi thei tur thil emaw, mi rilru leh thinlung tina thei tur chi zawnga tawng lo tura kan lei leh ka kan ven a pawimawh a ni. Mi tana pawi sawi zawnga tawngkam kan hman hian emaw an chanchin tha vak lo kan hriat sawi chhuah sak chhen emaw hian, a hrilhna hmun tur dik tak anmahni hnen ni lo, midang hnena kan sawi hian, mi kan hliam a, kan tina, midang lungngaihna kan thlen bakah keimahni pawh hmelma insiamin lungngaihna kan in thlen thin. Chuvangin keimahni kan hlim nan leh midangte hlimna thlentu kan nih theih nan mi tana hlimna thu chhak chhuak zawng leh mi pawi sawi tam lo zawnga nun i tum ang u.
3. Taihmak : Rom 12:11 ah kan hmu a, “taihmak kawngah chuan thatchhe suh ula, thlarau kawngah chuan thahnem ngai ula,” tiin. Thatchhiatna chuan tlakranna min thlen a, chumi avang chuan midang thil neih awt reng rengin a awm theih. Kan thatchhiat na na na chuan retheihna in min nang ngei ngei thin. Rethei taka awm chuan nun hlim te hi a lo har khawp mai. A mihring thil tak pawhin kan khawsakna kawnga kan duh leh mamawh nei ve thei tura taima taka hna kan thawh hian hlimna min thlen thin a ni. Chutih rual erawh duhamna avanga alo a luak chhuaka thawh vak vak erawh chuan lungngaihna leh phurrit min siam thin tih kan hriat tel a pawimawh hle. Pathian hnung kan zuina kawngah hian a ni tho ania. Ringtuten kan din ngheh theih nan leh thlemna kan do zawh theihna atana pawimawh tak tawngtaina leh Bible chhiar kawngah te, Pathian tana fianrial hun neih kawngah te pawh hian a ni; mi hemi kawnga a taihmak tlat chuan thlarau pawlna thar te a dawng tam a, thlemna do zo tur turin nun chak a nei thei a, hlimna a nei thin.
Awle, mihring nunah hian kan sawi tawh ang khan a hlim reng theih loh a, lungngaih changte pawh a lo awm thin ang. A pawimawh berah Isua Krista kan engkim ni thin hi vuan tlat ila. Amah kan neih tlat chuan manganna, lungngaihna, beidawnna, tahna kan nuna a lo thlen chang pawhin chung thil zawng zawng chu malsawmnaah a chantir thei a ni. Isua Krista ringtu kan nih tlat chuan he leia hlimna mai bakah kan thih hnu thlenga hlimna in min hmuak a. Kan hausa emaw kan rethei emaw, kan hrisel emaw kan bawrhsawm emaw, engkima lungawi theihna Isua Krista kan neih tlat chuan engkim hi a lo fel vek mai a. Chu chu nun hlim thuruk bulpui leh pawimawh ber a ni tih hi i hre tlat ang u. Mi ti chaktuah chuan engkim ka ti thei a ni tih i vawng tlat ang u.