We treat, God Heals
Upa Dr.B.Laldinliana
“Tidamtu chu Pathian a ni a, keini chu a hmanrua mai kan ni” tih hi Christian Hospital Serkawn thupui/motto a ni a. Hei hi Exodus 15: 26: “…… Lalpa a tidamtu che ka hi” tih atanga lak a ni. Vawiin hi BCM ni pawimawh Kristian Hospital Ni a ni a. He ni hi Serkawn tan phei chuan a hlu lehzual em em a, kan zosap missionary ten tihdam rawngbawlna an rawn tanna hmun leh tun thlenga la chhunzawmna hmun a ni a. He rawngbawlna hi Serkawn khua leh chhim bial pumpui tan malsawmna nasa tak a ni. Tihdam rawngbawlna hi Lal Isua Krista rawngbawlna pawimawh tak anih avangin amah zuitute chuan an chhunzawm zel a. Mizorama zosap missionary-te pawhin chanchin tha an rawn luhpui rualin hriselna leh tihdam hna hi an thawk nghal a. Sap Upa leh Pu Buanga ten bul an tan a, a hnuah Missionary nurse te leh doctor ten thahnemngai taka he rawngbawlna hi chhunzawmin tun dinhmun hi Mizo te min thlen a ni.
10th February 1923 khan Mizorama Mission (Kohhran) Damdawiin hmasa ber Kristian Hospital Serkawn chu kha tih laia Mizorama lalber (Superintendent of Lushai Hills) W.L.Scott-a nupuiin hawngin he rawngbawlna hi tun thlenga chhunzawm zel a ni. Serkawna Hospital hawnni 10th February hnaih Pathianni hi Kristian Hospital Ni (Special Sunday) atan BCM chuan a lo hmang chhunzawm ta a ni. Tun dinhmunah chuan Hospital pahnih (Serkawn leh Lawngtlai) neiin thawktu 180 vel kan awm mek a. School of Nursing ah hian kum tin students 20 lain students 60 vel awn awm mek bawk a ni. Duhthusam angin doctor chungchangah leh Medical equipments chungchangah te thil awm vek lo mahse kawng tam takah chhim biala tihdamna kawnga hmahruaitu Pathian zarah kan la ni ve zel a. Hei hi BCM Kohhran member zawng zawngte thahnemngaihna leh tawngtaina vang a ni a, a lawmawm hle a ni. Kan thupui ang hian Pathian hi kan innghahna leh tidamtu tak tak chu a ni a, thawktute hi chu a hmanrua mai kan ni. Chuvangin, Kohhran ten thahnemngai taka BCM-in tihdam rawngbawlna hna a thawhnaa thawktute hi kan tawngtaipui a pawimawh a ni.
Kristian Hospital Pathianni ah hian Mizo ten hriselna kawnga kan hriat tur pawimawh tak han tarlan ka duh a. Kan taksa hriselna hi i ngai pawimawh ang u. Kan châk zawng leh nuam tih zawngah insum lek lova inhmangin kan taksa kawng hrang hrangin kan ti chhe nasa a, mi tam takin hun lo takin an thih phah mek a ni. HIV/AIDS hi kan hmelma lian ber pakhat chu a lo ni ta. Tunah hian tam takin an vei mek a, kan in kai darh mek a, tam takin an thihpui tawh a, an la thihpui dawn a ni. A kaichhawnna lian ber chu mipat hmeichhiatna hman dik lohna a ni a, hemi kawngah hian a bik takin thalaite kan inthiar fihlim a, kan insum a van pawimawh em. Kristian nun dan dik a nun a, kan invawn thianghlim chuan HIV kaina chance hi a tlem a, chuvangin dam chhunga kan inchhir loh nan i fimkhur ang u.
Pahnihnaah chuan zu leh drugs leh zuk leh hmuam kan ti nasa lutuk hian nunna hlu tam tak a suat mek a ni. Hei hi a bik takin mipain kan tuar zual bik a, mipa vanglaia thi kan tam em em a, hmeithai an tam hle. Synod inkhawmpui statistic ah chuan kum khata mipa piang zat hi hmeichhe piang aiin 509 in an tam a, chutih laiin kum khatah mipa thi chu hmeichhie thi aiin 837 in an tam zawk thung a ni. Mipa thi tam zawk hi an vanglai taka thi an ni. Sawi uar deuh chuan mipa hi ruihtheih thil avangin kan pul mek a ni. Kuminah hian voters mipa 3,89,243 kan awm laiin hmeichhia chu 4,10,085 an awm tawh a ni. Chuvangin, hma kan sawn a, Pathian ram zau tura hma kan lak zel nan mizo te hian kan hriselna kan ngaih pawimawh a tul hle a. A bik takin mipa ten taksa hriselna kan ngaih pawimawh tawk loh avanga hetianga mipa thi an tam zawk zel chuan hnam boral kan la ni mai dawn a ni. Lal Isua rawngbawlnaa Taksa, Thlarau leh Rilru damna a tel kim angin kan kohhran (BCM) ngei pawh hi a lo than a, kan lo pun a, chak leh zau zawka rawng kan bawl theih nan tihdam rawngbawlna leh taksa hriselna kan ngaih pawimawh zel a pawimawh hle a ni.