PATHIAN NGAIHA THA
I Timothea 2:1-15 hi han zirho dawn ila, A bung zawng zawng hi han sawi fiah kilh kelh dawn ila, ka hriatna pawn a pha kher lo mai thei. Amaherawhchu, helai chang atang hian eng chu nge Pathian ngaiha tha chu tih kan zir dawn a ni.
Engvangin nge Pathian lawmtlak hi kan zawn fo thin ang. A chhan chu min tehtu tur a hi Pathian a nih tlat vang a ni. “Mi fiahtu chu Lalpa a ni zawk” 1 Korinth 4.4. Ringlo miten min tehna ai hian Pathian in min tehna hi a pawimawh zawk tlat a ni. A chhan ni awm a lang chu he khawvel mite buk lung (thil tehna) ah hi chuan, he khawvel miten thiam an chan theihna tur buk lung an rawn hmang fo thin. Nimahsela, Krista buk lungah erawh hi chuan Pathian sualna nei lo leh keimahni, mimal tin in bukna a ni tawh a. A standard hi a in san hleih em em a ni. Chuvang tak chuan a ni, Pathian biak pawha engnge a duh zawng tih hi kan hriat fo a tulna chhan chu. Pathian duh zawng helai bung atanga kan hmuhte i lo tarlang teh ang.
1. Thil dil tawngtaina: Pathian hian kan mamawh leh kan duh thilte hi a hre sa vek a. Amaherawhchu, min pe ringawt thin ta se. Pathian hi kan mamawh kher lo ang. Pathian hian min ngaiin, min thlahlel em em a, kan mamawh ngawih ngawih a, a hnenah Pa a nihna anga thil kan va dil (Permission va lak), te hi a lo thlahlel ve em em thin a ni. Anih chuan ringtute hian Pathian hnena thil kan dil ve hi kan tih makmawh a ni.
2. Tawngtaina: Pathian nena kan inbiak pawhna hi tawngtaina a ni. Maimitchhing kher lo pawhin rilru in Pathian nen hian kan in be mawlh mawlh thei tho a ni. Tawngtaina hi Pathian hian a lo ngai pawimawh hle a.Amah nena inkawm hlim tura siam kan nih miau avangin, min ngaiin min thlahlel thei hle a lo ni. Chuvangin, tawngtaina hi Pathian duh zawng thil a ni. Adama leh Evi kha bawhchhiatna an tluk hma khan Pathian nen an leng dun (Fellowship) thin a ni. Genesis 3:8 ah an bawhchhiatna avangin an lo biru ta a ni. Pathian nena leng dun thin mi hi Bible ah an awm nual a, Enoka, No-a leh mi dangte, Mikah 6:8 “Aw mihring, tha chu a entir tawh che a ni; LALPAN a phut che chu eng nge ni? Dik taka tih leh khawngaihna ngainat leh i Pathian nena thuhnuai rawlh taka lendun a ni lo vem ni?” Pathian nena in be pawp a, amah ring chunga nitin a tawngtaia(mit chhing kher lo pawhin) amah be pawp reng turin min duh a ni.
3. Tawngtaisaknate: Tuikuk ringthar an sawi ang deuh a. Tumah hrilh phal lo a,mahni pumbilh tum kha chu Pathian lawm zawng a ni lo a ni. Thil tha kan duh chuan midangte tana tha pawh kan duh sak ve hi Pathian lawm zawng a ni. Matthew 18:21-35.-ah khan chhiahhlawh ngaihdam, mahse midangte ngaidam ve thei lo tu kan hmu a nih kha. Chuvangin ringtute hian in duh sak tawn te, kan in tawngtaisak tawn liam liam te (rilru leh tih tak zet a) hi Pathian tha tih zawg a ni.
4. Lawmthu sawina: Lawmthu sawina tur kan neih loh lutuk avang hian ringtu nun hi a chak lo fo thin a ni. Pathian hnena lawmna kan neih loh avang hian kan phunchhiarin, ringtu enna pe chhuak lo, khakna petu kan ni fo thin. Thil engkim sawisel thin mi, thil tha hmu ngai reng reng lo mihring i lo nih thut chuan Pathian hnena kir leh fo ang che. I ringtu nun siamthar a ngai hle tawh tihna a ni. Sam 37:4 “LALPA chungah chuan lawm bawk rawh; Tichuan i thinung duhzawngte chu a pe ang che”. Pathian laka lawm tur hi chuan amah nena kawng kan lo zawh tawhte thlir let fo a ngai thin. “A lama rilru dik tak putute chunga a chakzia tilang turin khawvel zawng zawngah LALPA mit chu a leng ruai ruai thin a ni.” (II Chronicles 16:9). Pathian chungah lawm fo la, lawmthu sawi turte pawh ngaihtuah fo ang che.
5. Pathian ngaihsak leh zahawm tak leh inrem taka khawsak: Pathian ngaihsak tih hian Pathian duh zawng eng nge tih ngaihtuah tihna a ni mai. Zahawm taka nun tih hian uchuak lutuk a thil tih loh a tha. Mahni hmasial taka uchuak taka kan nun hian kan zahawmna a bo fo (Gas lakna ahte, Sa leina ah te, petrol lakna, traffic rule zawm that, dawt sawi mai mai loh.etc). Mi pahnih intibuai ah hian thiam famkim 100% an awm khat viau, an ngaihdan in an loh vang a ni duh chawk thin. Ringtute chu inremna kan siam fo tur a ni. Krista ah chuan inrem takin kan nung tur a ni. Ngaihdan hrang te pawh lo awm thin mah se la.
6. Mi zawng zawng chhandama awm tir leh thu tak hre tura thawh: Krista chanchin hrilh hi kan tih mak mawh a ni. Pathian in hna min pek chu Chanchintha hrilh hi a ni. Chanchintha hi kan hre thelh lek lek thin te hian ka hre thin. Mi piangthar lo na na Pathian thu atanga zu in sim tir tumte hi thil har a ni mai thei. Tin, mi in min ngaihsan avanga inkhawmna ina an lo telte, zaipawla an lo telte hian ngaih that ngawt tur a ni lo. Krista hi an hmu tawh em, an hmangaih tawh em? Anmahni chhandamtu chanchin hi hrilh a, sawi rik tam a ngai a ni. Chu Krista chauh chu an vanram kalna kawng tur a ni. An tlukchhiat tawh lohna tur chu Krista chauh a ni. Keimahni min ngaihsan avanga Krista zui ni lovin, Krista hmangaihna avangin, decision hi siam se chu chuan vanram a hruai thleng dawn zawk a lo ni.
Thufingte 16:7 “Mi, a awmdanin Lalpa a tihlawm chuan, A hmelma nen lam inremin a awmtir thin.”