PATHIAN HMANTHEIH TURA HARSATNATE:
(Serkawn BKHP Unit Reatreat)
Speaker: Rev.C.Lalbiakzama
Chawhma lamah Pathianin min hmantheihna tura pawimawhte kan sawi tawha. Chawhnuah hian Pathianin min hmantheihna tura harsatna rawn in lar thinte kan sawi thung dawn a ni. Exodus atangin Isreal fate Lalpa Pathianin thlalerah nithum kalah Lalpa tan inthawia a rawngbawlsak tura atihnaah hetiangin Aigupta lal Faro-a hnen atangin dodalna leh remsiampuina hi an hmachhawn ta a ni. Heng remsiampuina chi hrang hrang hmanga Isreal fate chu Lalpa rawng an bawlna tur ti thulh turin harsatna an hmachhawn a ni.
Pakhatna: He ramah hian inthawi mai rawh u(Ex.8:25): Mosia hnenah Faro-a’n remsiampui a tumna chu Isreal fate tan pawh a hahdam thlak zawk a ni. Thlalera kal chhuah ai chuan an awmna hmuna inthawi mai chu a a hahdam thlak zawk a ni. Mahse Lalpa thupek dan a ni tlat lo. Pathian rawngbawl turin Pianthar kher a ngailo, kristian i ni tawha, kristian chhungkuaah i sei liana khaw i awmhmun atang khan a tawk, tiin Setana hian thiam takin Pathian hman tak tak nih theihlohna tur hian remsiampui tur hian mi a bei thin a ni. Sal tanna atanga chhuah loh chuan Pathianin a hman theihloh avangin Aigupta atangin an chhuak ngei tur a ni tlat a ni.
Pahnihna: Inthawi turin kal ula, kal hla vak suh u(Ex.8:28): Faroa hian kal chu a phal ngei mai mahse kal hlat a phal lo a ni. Ringtute hi kan hriat loh laia Setan’n min hneh thinna fo chu rawngbawl tura kal hlat loh hi a ni. Pathian hman tura in ruatve mai hi chu a theih mahse hman theih tak tak tura pen thuk erawh hi chu a har thin. Setana hian pen thuk vak duh suh a rualpawl tawk leh a heksaklo tawkin ti ve la, kal hla duh suh min ti thin a ni. Hei hi Setana remsiampuina a nihna hre loin kan nih ve dan tur awm tawkah ngaiin chu mi lamah chuan in thiam takin kan awm mai mai ta thin a ni. Mahse Pathian inpekna chu Van ropuina kalsanin, a mite chhan chhuah nan thihna a zawnga tlawm ber a thlang a ni. Chu mi kan thlir chuan inpekna thuk zel hi Pathian hmantheih mi nihna a ni.
Pathumna: Inthawi tur chuan kal ula, mipaho chauh kal rawh se(Ex.10:11): Faroa chu a in hawng zau sawt ve hle mai. Mahse BKHP rawngbawla chhuah a remti tel ve tlat lo. Hei hi Paho tam tak rilru leh inpekna tawk a ni fo thin. Nuho engmaw zat pawh hian Pathian hman theih ni ve tum aia chuan Paho rawngbawlna tawk ti maia, an mahni thawk chhuak ve tura inngailo an tam hle a ni. He Setana remruatpuina thil niawm ve tak avang hian Pa ber emaw Nu ber emaw rawngbawlna a thawk chhuak a Pathian hmantheih tura inpe chhungkaw member dang chu penchhuah tum ve tlat lo hi Setana bumna a ni. Nu. Pathian rawngbawl hi chhungkuaa thawh tham a ni.
Palina: Inthawi tur chuan kal ula, inran rualte tel lovin(Ex.10:25): Faroa chu a in hawng zau leh hret, Isrealfate inthawina hmunah chuan an nupui fanaute chu kal ve a phal ta tlat mai. Mosia hote chu an lawm dawn teh lul nen, inthawi nana pawimawh ber ranrualte kal ve a remti ta tlat lo a ni. Chuvangin Pathinin Isreal fate chu an ranrual tel lova in thawi a rem ti tlat lo, chuvangin an ran rualte nen an kal vek tur a ni a ti tlat a ni. Kan Pathian hian mihringte hi a rawngbawl turin min hman a duh rualin kan inchhungkhur a mi hi hman theih vek a duh a ni. Mahni inpek tawh bakah kan sum leh pai leh zel Pathian hmantheih tura kal tir ve hi Setana huat zawng tak a ni, chuavngin a dal dan kawng hi a dap ngat ngat thin a ni.
Engkim hi Pathian rawngbawl nana hman theih hi Lalpa duh zawng chu a ni. Vawiinah hian kan nikhat hunte kan kum khat hunte hi chhut let ila tu hian nge min hmang tam ber thin le?