TKP THU HLA
⇒ Dt.19.5.2019 Pathianni chawhnua thehkhawm neihah khan Rs. 11,800 lai hmuh a ni a, thahnem ngai taka chhangtu member-te chungah lawmthu kan sawi e.
⇒ Faith Promise (Missionary support) May thlaa lakkhawmah Rs. 8,700 lai hmuh a ni. Faith Promise hi la duh tan Secretary hnenah lak theih reng a ni.
⇒ Committee member nikhat hlawh/remchan ang ang la pe lo te tan pek theih reng a ni.
STKP Short Film Contest:
TKP Documentation sub-committee buatsaihin Short film in siam siak tur a nih kha. Colony tin atangin film pahnih theuh siam tur a ni ang. Hemi atana hriat tur pawimawhte:
1. Theme tur hi ‘I rawngbawlna hlen rawh’ tih a ni ang.
2. Duration – 15 mins.
3. Film pakhata tel tawh film dangah tel phal a ni lo.
4. Phone camera chiah hman phal a ni.
5. Editing software erawh duh duh hman theih a ni.
6. STKP member an ni ngei tur a ni.
7. Dt 15.7.2019 ral hmain theh luh tur a ni.
8. Film siam hi Tv.Remlalnghaka Renthlei hnenah pendrive-in theh luh tur a ni.
WORK CAMP REPORT
Upa J.Lawmsanga
Director, Tuikawi Work Camp
(Vol.XXXII No.42 ah khan Pu H.Lalneia tih kha Pu H.Lalzuia tih tur a ni e)
Inrinni-a lo haw tura inbuatsaih mah ni ila. Kan hnathawh tur ber kan zawh dawn si chuan, tiin haw na tur Sumo kan ngaihtuah a. Signal a awm thei si lova, kan buai hle. Kan hna hi zing kara thawh zawh theih tur tawk vel a ni a; 16/5/2019 (Thursday) zingah dar 5:30 velah thawk lehin dar 8:00 rik hma deuhin kan zo fel ta a ni.
Kan hna hi thawktu Santi Ronjon a in(inchhia) sak that a ni a; (ani hi BCM Thualthu-in Rs.3,000/- hlawha an chhawr, an chawm chhunzawm theih tak loh avanga thawktu hmeichhe pathum ten Rs. 1,000/- thlatina an thawh khawma an chawm tak a ni) A dung 15ft, a vang 12ft chauha lian a ni. Hmanrua hi an lo nei sa a, a chung rangva lei nan BCM Thualthu hian Rs. 3,000/- an rawn pe ve leh a; a bak hi chu thing leh mau an put khawm a ni.
Hemi bakah hian Quarter pakhat repair a ni a, Bathroom chhia repair a ni a, a chhuat cement a zut sak leh, a bang skirting hi brick a rem a ni a, plaster sak a ni. In bang chhak lam leiminin, a skirting chin rangva a chhilh vek chu haifai sakin, skirting rangva hi thlaksak leh a ni a. A tuihawk luankawr cement in zut sak a ni bawk. Kawmchhak lam inchung rangva lawr tawi lutuk chu ruahin a theh thei a, 6ft a sei rangva a zawm sak a ni bawk. Tin, inban pathum leiseh chin cement-a thlak sak a ni bawk.
Ningani (16.5.19) dar 9:00 tukthuan eiin (tukthuan hmeh tur hi Quarter kan repair sak Nl. Zodini hian kel min talh sak a, kan lawm hle) dar 10:30 ah Tuikawi kan lo chhuah san a; Diblibagh atanga Sumo-a lo haw lehin zan dar 6:00 ah Serkawn dam takin kan lo thleng leh ta a ni.
Work Camp-na atan Upa R.Lalrosanga leh Upa ZD.Lalnunmawia ten Rs. 1,000 ve ve min pai a; kan lawm hle. Tawngtaina-a min lo tanpuitu Kohhran member-te chungah kan lawm em em bawk a ni.
Thawktu hi panga an awm a; hmeichhia pathum BCM rawih leh chakma mipa pahnih an ni. Hmeichhia pakhat hi a nghet a ni a, pahnih hi contract an ni a; chakma pahnihte hi pakhat BCM Zotlang North sponsor a ni a. Pakhat hi thawktu pathum ten an thawhkhawm a an rawih a ni.