JHARKHAND TOUR REPORT
Dt.15th – 17th March, 2019 chhunga Baptist Church of Jharkhand Inkhawmpui vawi 12-naa rawngbawlna nei turin Rev. TC.Vanlalmalsawma, Field Director-in kan kohhran zaipawl leh speaker a rawn sawmna chu Pathian chakna leh kaihhruainaa tihlawhtling turin 12th March, 4 PM–ah member 23-te chuan Sumo-in Serkawn kan chhuahsan a. A tuk zing dar 10:45-ah Silchar atangin Rel-a kalin 14th March, 4:30 PM-ah Rampur Hat kan thleng a, kan missionary Pu CL.Remruata leh native worker pakhatin min lo hmuak a. Bus-in Dumka kan pan nghal a, Field Director awmna Baptist Mission Center-ah kan thleng a, missionary-te leh inkhawmpui chhim tura kal Non-Mizo Fellowship, Venghlun atanga kal ten min lo hmuak a. March 15 chawhnu ah inkhawmpuina hmun Inderbani panin kan chhuak leh ta a ni.
Inderbani-ah hian kan thlenna tura an ruat Evan. J.Lalrinawma quarter-ah kan indah fel hnuah min lo hmuahna hmun Pandal-ah kan kal a. Gate mawi takah nula lam thiam rual leh kohhran mipui tam takin min lo hmuak a. Min lo lawmna thu an aupui hnuah, lam chunga hma hruaiin Pandal chhungah min hruai lut a. A tam zawk tana a vawikhat nan Parthi mawi tak min awrhtir chu ropui kan tih tawh tehlul nen, kan ke min han silsak leh theuh chuan rilru a khawih hle mai.
Hetih lai hian thli leh ruah a rawn thleng ta thut mai a. Thil dang tih hleih theih a ni ta lova. Kan inkuah khawm a, kan tawngtai rual a, mipuite pawh chuan min rawn zawm ve nghal a. Chutah zaipawlin a rem dan ang anga ding khawmin hla pahnih an han sa zui bawk a. Khuain a zir tak loh avangin hemi zan hian inkhawm theih a ni ta lo. Amaherawhchu, Programme sheet-a tel miah lo Thlarau remruat rawngbawlnaa bul kan han tan thei kha ropui kan ti hle.
March 16 chawhma leh zan inkhawmah Upa J.Lawmsanga’n thuchah a sawi a, March 17 chawhma leh zan inkhawmah Upa Lalbiakthanga Chawngthu-in a sawi ve thung a ni. Inkhawm apiangin STK Zaipawlin hla an rem bawk. Zirtawpni chawhnuah kohhran/fellowship hrang hrang ten Recitation-a inelna an nei a. Pathianni chawhma inkhawm banah mi 11-in Baptisma an chang a, chawhnuah Sacrament inkhawm a awm bawk a ni. Worship Team tha tak an nei a, zai hruai mai bakah zaipawl/group/solo te zai an lo remsak vek zel thei a ni. Inkhawm ban apiangin zaihona hun an hmang ziah bawk.
Jharkhand-ah hian BCM enkawl lai Kohhran/fellowship 31-an awm a, heng atang hian palai 500 chuang an rawn kal a, nausen pawm lai chenin an rawn kal a ni. Kum 3 chin chung lam tan Registration fee Rs 10/- an la a, in hrang hrangah thleng mahse, hmun khatah chaw eina siam a ni.
STK hmingin biakin sak mek tanpui nan Rs.10,000, Inkhawmpui tanpuina Rs.7,800 Inderbani Kohhran ah Lectern Rs.3,000 man hlan a ni.
March ni 18 zing dar 5-ah bus-in Kolkata panin kan chhuak a, 1:20 PM-ah BCM Guest House kan thleng a, March 19-chamin, a tuk 5:50 AM-ah thlawhnain Silchar kan pan a. Silchar-ah hian chhun hun hmangin 6 PM-ah Sumo-in kan rawn chhuak leh a. Tichuan, 10 AM velah tluang tak leh dam takin Serkawn kan rawn thleng leh ta a ni.
He rawngbawlna kawng min hawnsaktu leh min tihhlawhtlinsaktu Pathian chungah lawmthu awm se, bang lova min tawngtaisak thintu Kohhran-te chungah lawmthu kan sawi mawlh mawlh e.
Rbt.SAICHAMA KHIANGTE
Secretary-cum-Manager
ZOSAP THLAN ZAWN CHHUAH REPORTS
Zanin inkhawmnaah hian Serkawn khua leh Kohhran dintu kan Zosap, Pu Buanga te thlan zawn chhuaha siam that anih dan leh Pi Zomawii biangbiakna te chu Pu K.Lalsanga (EX-MLA) te nupa in Projector hmangin an sawifiah dawn a. Chuvangin Kohhran mipui, thalai leh naupangte a tam thei ang ber inkhawm turin kan inhriattirin kan insawm a ni e.
TKP THU HLA
Sumtuakna atana Colony tin ten thehkhawm kan neihah khan kan hmuh zawng zawng chu Rs. 16,220 a ni