INTHLANPUI AWM TUR ATANA BCM THUCHAH
Kan ram hi inthlang ram kan ni a, Inthlanpui a awm apiangin Baptist Church of Mizoram chuan inthlan chungchangah thuchah kan siam thin. A sawtna chen a awm ngeiin a lang a. Mizoram State Legislative Assembly Inthlanpui lo awm leh tur atan pawh inthlanna thianghlim leh felfai tak neia sawrkar tha tak a din ngei theih nan BCM chuan a hnuaia mi ang hian thuchah a siam a, Mipui-te, Political Party leh Candidate zawng zawngten ngai pawimawha zawm theuh turin a ngen a ni.
1. Mipuite hnena thuchah.
1) India khua leh tui dik tak, vote neite chuan vote thlak theuh ni se.
2) Inthlan campaign laia Party leh Candidate-te hnena thil phut neih hi chin loh ni se, Mimal, Pawl hrang hrang pawhin chin loh tur a ni.
3) Mahni chhia leh tha hriatna thiang tak hmangin vote thlak tur a ni a, tu hnenah mah hralh loh ni se.
4) Pathian tih mi leh kohhran ngai pawimawh mi vote tum hram tur a ni.
5) Tharum thawh chin loh ni se, dawt hmanga inbeih hi chin loh tur a ni.
2. Political Party-te hnena thuchah.
1) Party tinin Candidate atan mi hming tha, ram leh hnam thatna tura thawk ngei tur leh Pathian tih mi thlan chhuah tum ni se.
2) Thlei bik nei lo va, ram pum huapzo sawrkar din tum tlat ni se. Kan Party mi leh sate pawh chutiang tura inkaihhruai leh inzirtir ni se.
3) Chhuan lo awm zel tur tan pawha chhenfakawm, ram leh hnam tana him leh tlo tur ngaihtuahin manifesto, party policy leh programme-te siam ni se.
4) Inthlanna muanawm tak a awm theihna turin tawngkam, ralthuam, thuziak leh hel pawlte hmanga inrikrapna tel miah lo turin party tinin hma lak ni se.
5) Party tinin mipuite, pawl leh kohhranten thil phut an neih pawh a, chung mite chu hnawla malmak ngam tum theuh ni se.
3. Candidate-te hnena thuchah.
1) Mipui retheihna denchhena sum leh therhlo hmanga vote lei tur a ni lo.
2) Vantlang ruai siamsak, vote thlak tura khaw danga awmte phurh khawm vak te, hautak uchuak taka campaign nana Banner, flag, leh poster siamte tih loh tur a ni.
3) Candidate-te chu entawntlaka nung a, inthlan lai leh a hnu pawha belhchian dawl zel tura beisei an ni.
4) Ruihhlo, mipat hmeichhiatna leh corruption-a fihlim, Pathian leh Ram leh hnam hmangaihtu ni se.
Sd/- Sd/-
Rev. Lalbiaksanga Chinzah Rev. F. Ramdinmawia
President General Secretary
Baptist Church of Mizoram Baptist Church of Mizoram
SUNNA
Kan kohhran member duh tak Upa R.Thangzuala H/o Pi Nuzawni chuan ni 29.9.2018 khan chatuan ram min pan san tak avangin, a kalsan tak a chhungte kan tuarpuiin Lalpan thlamuanin awmpui zel rawh se.
LAWMPUINA
Kan TKP member duh tak Lalliankima (Te-a) leh Lalhmangaihkimi te chuan dt 11.10.2018 khan Pathian leh a Kohhrante hriat puiin Kohhran Dan Puitlingin tiam tlat e an ti. TKP ten kan thinlung zawng zawngin kan lawmpui tak zet che u a ni. Pathian in fanau malsawmna in vur zel che u se la, Nupa hlim tak ni turin kan duhsakna kan hlan a che u.