Jubilee Bible School, Serkawn chu anmahni building, Ramzotlang Serkawnah ruahman lawk angin April 7, 2015 (Thawhlehni) atang khan tan a ni ta. Batch hmasa berah hian zirlai 33 an awm a, an zinga 8 chu missionary thawk lai mek an ni a; mi dang zawng chu Tualchhung Kohhran hrang hrang atanga thlan chhuah te an ni. A tirhah residential veka tih tum a ni nain la inpeih fel hman vek a nih loh avangin Missionary leh Pastor, nupui fanau neite chu Serkawn leh a chhehvelah inluah phalsak an ni.
BYFI Inkhawmpui lian, National Youth Coference of India, Serkawn 2015 atana inbuatsaihna a kal mek a, mikhual thlen min beisei zat member chhungkaw hrang hrangah semchhuah tawh a ni a, khami zat tal kha chu tlawmngaih chhuaha thleng hram turin kan inngen a. Inkhawmpui denchhen hian Kohhran hnatlang leh thil tul neuh neuh a awm chho tam viau dawn a, Pathian rawngbawlna a ni tih hriain member te i insang mar zel ang u.
BCM Mission Promoter thar Upa HL Liantluanga chuan April 7, 2015 khan a hna a zawm fel ta a. Upa HL Liantluanga hi a nupui fanaute nena Lunglawn Pangkai Venga khawsa mek niin BCM Mission rawngbawlnaah kum 27 zet tawnhriat lo nei tawh a ni.
All Mizoram Mission & Evangelical Network (AMMEN) hruaitute leh BCM hruaitute chuan April 7, 2015 khan BCM Office Serkawnah inkawmna an nei a, AMMEN hruaitute hnenah hian BCM puipate chuan Zoram Baptist nihphung hloh lo chuan tupawh rawngbawlna kawngah an thawpui thei a, midangte nena rawngbawlna neih ho chu an duhthusam a nih thu leh an inhawn reng thu an hrilh a ni.
Puanthui Zirna:
BCM Website, www.mizobaptist.org -a tarlan angin Baptist Church of Mizoram, R & D Department hnuaia Skill Training Programme hnuaiah puanthui zirna training, Thla 6 awh chu May Thlaa tan turin buatsaih a ni leh dawn ta a. Hmeichhia 10 tan seat a awm a ni.
Dil duh chuan lehkha phek pangngaiah dilna ziakin Pu MS Dawngliana, Director, Relief & Development Dept, BCM (Ramzotlang, Serkawn) hnenah dilna hi April 2015 chhungin thehluh theih a ni a. Dilnaah hian mahni lawina Kohhran lehkha thil tel tur a ni.
Interview Hun : 5th May 2015 (11:00 AM)
A Hmun: R & D Hall Ramzotlang, Serkawn
Keimahni:
Kan member leh Joint Editor ni bawk Tv Zosangzuala chu a hnathawhna vangin hmundangah a awm a tul a, a nihna a chelh chhunzawm theih dawn loh thu STKP Secretary hnenah a thlen avangin TKP Serkawn Unit Executive Committee chuan a aiah Tv R Zothansanga Savidge Colony chu Juniper Editorial Board member atan a ruat a ni.