Kan Tualchhung Kohhranah tluang taka Good Friday leh Easter Sunday hman zawh a ni a. Good Friday denchhen hian Kohhran zaikhawmna leh inkhawmna hrang hrang te neih a niin thuchah ngaihnawm leh hlawk thlak tak tak te ngaihthlak a ni.
BCM Relief and Development hnuaia Zo-Clinic hmalakna kal zelah Artemesia Annua thing hmanga hmalakna thar neih belhchhah a ni a. Director, Pu M.S. Dawngliana leh Pu Stuart Spani Chairman, Bye Bye Malaria, Canada te’n 22 Feb – 1 March, 2015 khan Anamed hnuaiah Training Ranchi ah an nei a. Artemesia Annua chin dan leh sawngbawl dan leh damdawi hman dan te an nei a ni. Training zawh hian a chi te rawn hawn in Mizoram khaw hnihah Training pe in a chi te pawh kui nghal a ni. Artemesia Annua hi Malaria laka inven nan leh a veite enkawl nana hnimhnah damdawi tha bera ngaih a ni mek a ni. Africa ramah tunah chin darh ni in Malaria benvawn veite pawh a ti dam a ni.
Baptist Youth Fellowship of India (BYFI) inkhawmpui lian National Baptist Youth Conference, Serkawn 2015 kan dawl tur atana inbuatsaihna a ngawrh chho hle a. Kohhran hnatlang hrang hrang pawh a tam sawt hle. Kohhran member ten kan vaia rawngbawlna a ni tih hria a, India ram huapa Serkawn hmel leh Baptist Kohhran hmel a lo mawi zual zel theih nan mahni theihna zawn apiangah theihtawpin hma i la zel ang u.
TKP Memberte Tan
TKP Fellowship hun Dar 1:30 PM ni thin chu Dar 2:00 PM ah sawn a ni leh ta. 12th April 2015 ah pawh hian TKP Ramzotlang Unit ten min rawn tlawh dawn a. Dar 2:00 ah tan a ni ang kan unit member te a tam thei ang ber kal turin kan insawmin kan inhriattir a ni.
Zokhawthiang daia inlambun leh mi 3 thihna thleng chungchanga BCM thu chhuah
TUARPUINA
March 28, 2015-a Zokhawthiang daia inthahna rapthlak tak thleng hi Mizoram Baptist Kohhran chuan pawi a tiin rawng taka chetna hi a dem takzet a ni. He thil thleng avanga nupui fanau nei lai leh chhungkaw member duh lai ngawih ngawih chântute leh hliam tuarte kan tuarpui takzet a. He thil thleng avanga rilru mangang leh thlabar a awm, kan ram hruaitute leh kan ram tana thawktu zawng zawngte kan tuarpui takzet a, rilru leh taksa damna an chan thuai theih nan kan tawngtaipui a, kan ramah hian remnain ro rel sela, hetiang thil rapthlak hi thleng tawh lo se kan ti.
Sd/- REV. H. LIANNGAIA
General Secretary,
Baptist Church of Mizoram
KOHHRAN MIPUITE HNENA NGENNA
Ni 23-26 April, 2015 chhung hian National Baptist Youth Conference chu Mizoram Thalai Kristian Pawl in Serkawn Tualchhung Kohhran-ah a thleng dawn a, he Conference hi India ram pum huap a nih avangin India ram hmun hrang hrang atangin Palai engemawzat an lo kal dawn a, tin, Mizoram chhung atang pawhin Palai engemawzat lo kal tura beisei a ni a. Hetah hian Kohhran mipuite mikhual thleng turin kan inngen a, mikhual thleng turin Kohhran mipuite zau taka inhawng turin kan inngen a ni.
Tin, he Conference chhung hian kan in leh a vel leh kan khawlaite fai taka enlkawl turin kan inngen a. Inkhawmpui chhinchhiah tlak kan neih theihna turin leh tluang taka inkhawmpui kan neih theih nan Tawngtaina nen Kohhran hote tan la theuh turin kan inngen a ni. Lalpa’n vengin awmpui zel che u rawh se.
In rawngbawlpui,
C. LALTHANTLUANGA
Secretary
Inkhawmpui Organising Committee
Serkawn Tualchhung Kohhran