NANG MALSAWMNA NI ANG CHE
K.Zodinsanga
A hmasa berin Kohhran member leh ka Thalaipui zawng zawng te kum thar chibai ule.
Pathian khawngaihna avangin kum 2017 kumthar kan lo chuangkai leh ta reng mai, he hunthar min hmuhtir tu Lalpa hian chhan feltak neiin, he kumthar hi min hmuhtir ani tih hi kan hriatchian a tul hle mai. Kum bul kan tan chho a, kan nitin hna kawng hrang hrangte bul tan chho lehin Kohhran leh khawtlang pawl hrang hrangah mahni phak tawkah mawhphurhna nei theuhin hun kan hmang tan leh anga, hun liamta aia tha zawk leh nun duhawm, midangte tan malsawmna ni turin inbuatsaih thar teh ang u. He hun thar ah hian i rawngbawlna kal liamta zawng zawng te theihnghilh ila, hma kan lo lak ve tawhna te, kan nihna kal ta zawng zawngte theihnghilh in Krista ah chuan i in siam thar leh ila. Phur leh tha tho takin rawng bawl leh turin Krista tan a ka thawhpui, TKP member zawng zawng te ka insawm thar leh a ni. Lalpa lawmtlak in tun kum chu rawngbawl i tum thar leh ang u hmiang tiin kan in sawm a ni e.
He kumthar ah hian kan khawtlang, kan chhungkua leh kan mimal nun min hruai turin Lal Isua chauh hi i thlang teh ang. Lal Isua hi kan thlanglo anih chuan tunlai khawvel, chhiatna leh buaina, chanchin thalo tinreng in nitin a min tuam mek karah hian thlamuanna leh himna tur hi a va tlem sawt em. He kumthar hi Lal Isua nen bul tan ila amah hnaiha kan awm hian kan thlarau leh kan taksa tan a him ber a ni. Kan hlimna leh lawmna siamtu Lal Isua Krista a nih hre reng in kan nun ah Krista i dah Lal ber ang u,
Kumhlui liamta ah te kan duhthusam anglo deuhin kan hun kan lo hmang ani thei, he hun thar, Pathian min pek ah erawh hi chuan hmasawn tum ila, nasa zawka tang turin, i in buatsaih sauh sauh ang u. A pawimawhber chu Kan thlen chin theuh atangin hma i sawn zel ang u.( Phillipi 3:16). Lalpa tana rimtui ni turin i insiamthar sauh sauh ang u. Bible chuan tui luang lo chu a rimchhia a ti angin, ringtu hmasawn lo chu Lalpa tan a rimtui thin lo.
Mi tam tak, mahni tan an nun pum hmangin, he khawvel an chhuahsan a. Nang leh kei erawh lawm man, tha zawk he khawvel in a pek theih loh chang turin hun tha (Khawngaihna hun) min la pek hi, chuvangin kan theihtawp a sang ber, Krista leh Kohhran tan i hlan ang u. He kumthar ah hian mimaltin ten midangte tan malsawmna kan nih theih nan tan la ila kan chenpui kan chhungkaw tan, kan nitin hnathawhna hmun leh khawtlang tan malsawmna thlentu kan nih theih nan i inbuatsaih thar theuh teh ang u.
“ Nang malsawna ni ang che”.