KA FA I THINLUNG MIN PE RAWH
P.C.Lalhmangaihzuali
Jeremia 17:9 ah chuan, thinlung hi thil zawng zawnga bum hmang ber, chhe lailet der a ni tih kan hmu a. Thinlungah hian thil chi hrang hrang a tha lam leh tha lo lamte thleng hian a awm vek mai a ni. Thinlunga a awm len dan ang zelin miin a nundanah Duhthlanna a siam mai thin a ni. Mihringte, misual boral mai tur chhandam kan nihna hi a ropui tak zet a, Van khua leh tui nihna (Pathian fa) chanvo ropui tak chu Pathianin a fapa Isua Krista hmanga min siam sak leh a, min pe leh hi ava ropui teh lul em! Chutiang taka hmangaihna ropui chu hmangaihna vekin, keini mihringte hian chhang let tur kan ni.
Mihringte hi khawvela kan la awm rih avang hian, khawvel thil tam tak hian kan thinlungah Lalna chan tumin min bei reng thin. Hlimna leh lawmna nei viau tur ang te hian chu khawvel thil chuan kan thinlung a fan thin a. Chu chu kan thinlungah a lal tlat chuan khawvel lamah kan nun hi a lo tlan mai thin a ni. Chutiang mi lo ni `hin mah ila, Pathian hmangaihna danglam ve ngailo chuan ‘Ka fa, i thinlung min pe rawh’ tiin tun hun thleng hian min auvin, min sawm reng a ni. Khawngaihna hun tha a in hawn lai hian Lalpa hnenah kan thinlung i hlan ang u.
Roreltute 16:4 ah chuan Samsona leh Delili chanchin kan hmu a. Delili’n Samsona chakna thuruk hriat a duh a. Amaherawhchu, Samsona khan vawi hum (3) lai mai a tih der a, chutah Delili chuan, “I thinlung mi pe hlek si lovin, Engti ziaa, ‘Ka hmangaih che’ ti thei nge maw i nih le?” tiin a zawt a. Samsona chuan a rilru zawng zawng a hrilh ta vek tih kan hria a ni.
Rawngbawl mek inti Kohhran/TKP activity-ah buai tak leh chanvo leh mawhphurhna kan hlen chhoh mek zelah hian thinlung zawng zawnga Lalpa hmangaihna nei tak tak si lo hian rawngbawlna hlen ve mai mai hi thil awl tak a ni. Chanvo leh mawhphurhna kan tih ve theih hian Lalpa kan hmangaihnaah ngaih mai pawh thil awl tak a ni. Lalpa Pathian hi rilru enchhuaktu, thinlung fiahtu a ni a, a hnenah kan thinlung hi pe hmasa phawt ila. Chu chu kan thil tih leh nun danah alo lang chhuak ang a, nung takin rawng kan bawl thei ang. ‘Lalpa i Pathian chu, i thinlung zawng zawngin, i thlarau zawng zawngin, i rilru zawng zawngin i hmangaih tur a ni.’ (Matthaia 22:37) Hawh u, Lalpa hian kan thinlung zawng zawnga hmangaih tura min duh angin, kan thinlung pe ila, chutiang a lo nih chuan, bawl loh tum teh mah ila, kan bawl lo thei lo ang.
Thinlunga Lalpa hmangaihnain bul tan ila, Lalpa rawng hi nasa leh zualin, nungin i bawl sauh sauh ang u tiin Lalpan min sawm a ni. Lalpan malsawm rawh se.