KA DUH E, LO THIANGHLIM TAWH ANG CHE (Matt. 8:3)
Rev. C.L.Malsawma
Vawiin Sunday hi BCM chuan Phar Pual Pathianni atan kan hmang a, ni pawimawh bik tak a ni. Lal Isuan Thlarau, Rilru, Taksa a natna neite he khawvela a awmlai khan a tidam thin a. Taksa pharna hi hmasang khawvelah pawh khan a lo tam mai a. Hmanlai chuan natna tihdam theih loh angin an ngai a. Chhungte zingah an hnawng a, khawtlangah an hnawng bawk a. An tan beisei tur a awm lo a ni ber mai.
Lal Isua hunlai hian natna tin reng a na te a tidam thin a. Miten taksa natna tidam turin an pan thin. He phar Lal Isuan a tihdam pawh hian Lal Isua tihdam beiseiin mipui tam tak Lal Isua zuituten engtiang pawhin lo tina dawn mahse, an ten em em a ni tih pawh hre reng chungin Lal Isua tihdam beiseiin mipui zinga a kal lai chu a au ta chawt mai a ni. Mite tenrawn nimahse dam a duh a, damna a beisei a “Lalpa I duh chuan mi tithianghlim thei e” tiin patling a au chhuak rawih mai a ni. Lal Isua duh tak tak tute hi Lal Isuan a ngawihbo san mai ngai lo. Duh ve deuh roh si, thildang beisei nei bawk si, lum deuh pelh pulh angah hi chuan damna tak tak a thleng ngai lo. Lalpa tihdam duh tak tak chuan thildang buaipui lovin an pan chawt thin. Tupawh, ka hnena lo kal chu ka hnawtchhuak/hnar tawp lovang titu hian a duhtute hnenah damna a thlen thin.
Taksa pharna hi chu damdawia tihdam dan doctor ten an hre tawh a, an tidam mek a. Leprosy Mission pawh hian a thiltum hmasa chu an phar damna a ni. Taksa pharna ni lo, rilru pharna hi thil hlauhawm tak a ni. Kan nih loh pui ni a inhriatna mipa hmeichhia nia inngaih tlatna te, hmeichhia mipa nia inhriat tlatna te hi Mizo zingah pawh kan awm ta nual mai. Tin, tisa chakna puitlin chak tlatnate hi rilru pharna a ni a, pawngsual a thlentir fo bawk a, chu chuan jail tanna, sum tam tak tul lova senna a thlen thin. Doctor (Psychiatrist) te rawih a ngai fo thin – Piansualna chikhat a ni.
A pathumnaah chuan piangthar si lo, piangthar awm ve ngawt hian van ram min thlen lo. Enganga rawnbawlnaa senior pawh ni ila thlaraua piang silova ni emaw intihna hi pharna chi ah chuan a rapthlak ber chi a ni ang.
Heng phar natna chi hrang hrang veitu kan nih chuan Lal Isua, “Keimah hi Kawng leh Thutak leh Nunna ka ni” titu hi thildang chhuanlam lovin i pan ang u. Tichuan, kan pharna ata damna kan chang ang. Lalpan malsawm rawh se.