I RAWNGBAWLNA KHA HLEN RAWH
Maruata
“Nang erawhchu engkimah fimkhur la, hrehawm tuar la, chanchintha hriltu lam hna thawk la, i rawngbawlna kha hlen rawh.” II Timothea 4:5.
Kan thupui hi Pastor, Evangelist-ten khawmpui Crusade -ah te pawh vawi tam tak an lo tlangpui tawh thin a ni a. Tun tumah hian ka rilruah hian a lian si a, chubakah kei ngei hian ka mamawh tur a ni tih hriain, ka phak ang bawkin kan thai lang ve dawn a ni.
Tirhkoh Paul-a pawh kha Pathian khawngaihna a chan hnu khan a rawngbawlna kha a hlen chiang ve khawpin ka hria. Ringtute pawhin kan entawn ber pawh a ni ta reng a ni. Kei ngei pawh hi vawi tam tak siamtharna changin ka duhtawk chinah ka rek bung leh thin a, chu chuan nasa tak maiin ka nun hi a vaw chau thin a ni. Chuvangin, ringtu Lalpa hnungzuitu intite pawh hi zawm thaw tak leh kan peih china Lalpa hnung kan zui hian rawngbawl e ti lovin, kan nun a chau in a hlim loh phah fo thin reng a ni.
Aw le, rawngbawlna hlen chhuak tura kawng pawimawh Pathian thuin min kawhhmuhte, ka rilru a lo langte in thai lang ve dawn teh ang (Kim lo deuh pawh a ni mai thei):-
1. Hmangaihna :- Hmangaihna han tih hian, mihring hmangaihna atanga rawngbawl ve na hi chuan tawp chin leh duh tawk chin a nei duh khawp mai. Pathian rawngbawlnaah hi chuan Pa atanga hmangaihna hi chuan dawh thei takin beidawng lovin, midang tan rawng a bawl theih thin a, a rah pawh a hmu nge nge thin a ni. Hei hian rawngbawl zelna kawngah ringtute a ti chakin kal zel châkna a lo piang thin a ni.
2. Dawhtheihna:- Pathian rawngbawlna kawngah hian dawhtheihna hi a pawimawh leh khawp mai. A bik takin Setanan ruihhlo hmanga a hrenbeh thinte chunga rawngbawlnaah phei chuan hmangaihna leh dawhtheihna hi a van pawimawh tak em. Pathian khawngaihna avanga kan experience tlemte atang pawhin, dawhtheihna avang hian a rah tha kan hmu ve zauh zauh mai. A chang chuan thinrima kalsan duh rum rum changte hi a tam thin khawp mai. He mi hunah tak hian Lal Isua zuitu intite chuan dawhtheihna nena a rawng kan bawl sak tlat chuan a hlawhtlinna kan hmu fo thin a ni. Hei hian Pathian rawngbawlna kawnga kal zel min ti châk thin a ni.
3 Taksa hlanna:- Rom bung 12 chang 1 a kan hmuh angin kan taksa kan hlan zelna hi Lalpa chuan kan rawngbawlnaah min lo pawm sak thin si a. Lal Isua zuitu leh neitu in ti si hian thenkhat chuan hmun hrehawm leh nuamlo deuh tura kan ngaihah chuan kan kal peih lo fo thin si a ni. Chu chuan kan hriat loh karah kan nun hi min ti chau leh zawk thin si a ni. Chuvangin, kan peih tawk chin ni lova, Lalpan tul leh tha a tih china min hman atan kan taksa hlan phal zela, Lalpa tana kan pen chhuah ve na ah hian he taksa hi lo chau mahse, kan chhungril a hlim si a, chu chuan rawngbawl zel châkna min pe fo thin a ni.
4. Pathian châkna nun: “Ka nunna hi Pathian châkin, Pathian nung châkin, a tuihal a ni” Sam 42:2. Hei hi a van pawimawh tak em. Ringtute hi chuan Pathian ngaihna leh châkna nun kan neih hi ava ngai tak em. Lalpa ngaihna leh châkna nun nei tlattu ringtu chu, Lalpan a ti chakin a thlang mai thin si a. A thlante chu a ti tlingin, rawngbawlna tam zawk a buatsaih sak zel thin si a ni.
5. Hmasawnna: “Eng pawh ni sela, kan thlen chin atang khan hma i sawn zel ang u” Philipi 3:16. Ringtu nun kawng kan zawhnaah hian ka ngai a ni mai kan tih tawh chinah chuan, in bih chian tak tak hi chuan kan hniam lam a lo ni duh khawp mai. Chubakah tha tho taka Lalpa rawngbawl a harsa duh khawp mai. Chuvang chuan Pathian khawngaih rawngbawlna kawngah hian duh tawk chin nei mai lovin hma ka sawn em tih in bih chungin kan peih tawk ni lovin Lalpan tul leh tha a tih chinah kan theih ve na sang ber kan hlan tur a ni. Hmasawn-a kan in hriat ve na atang chuan rawngbawlna kawngah pawh kal châkna a lo awm ve thin a, chu chuan rawngbawlna kawnga ke pen pawh a ti nuamin a châkawm thin a ni.
6. Midang lawmna zawn: “Krista pawh chuan mahni lawmna a zawng si lo” Rom 15:3. Miten Pathian a nun an neih theih nana buaipui thintu nun hi chu a chak phah ngei thin a ni. Lal Isua zuitu in ti te hi chuan Isua nun kan tawmpui a ngai si a. Chuvang chuan mahni in kal sana midang lawmna kan zawnpui zelnaah hian mahniah malsawmna kan dawng let fo thin a ni. Chu chuan Lalpa rawngbawlna kawngah min ti chakin min ti phur thin a ni.
7. Lungawina: “ Kei zawng eng ang pawhin awm mah ila, lungawi zel ka ching tawh si a” Philipi 4:11. Keimahni zawn chawp ni lo va, kan hmaa thil lo thlenga, lungawi zel theihna nun neitu ringtu chu a rinna kawngah a chak lo ngai lo tih theih awm e. Lal Isua kha Kraws kawng a zawhna-ah khan mihring rilru atang chuan lungawina tur ava han awm dawn lo tak em. Mahse, a tirtu Pa thuawihna avangin, a thil tuarah chuan a lungawi mai si. Nangmah leh keimah, a hmangaih avangin keini pawh rawngbawlna kawng kan zawhnaah hian hrehawm reng reng a lo awm pawhin Pathian thuawihna avanga kan lungawi zel thei anih chuan, rawngbawlna kawng kan zawhnaah pawh hnehna kan chang zel ngei ang. Chu chuan kan nunah rawngbawlna kawngah chhelna min pe zel dawn a ni.
8. Mahni ral phalna: Mihring hi chu lansarh nuam ti mi hi kan ni ve fo thin a. Lansarh lohna hmun turah chuan rawngbawlna kawng pawh nise tel chak lo leh tel peih lo thin kan ni fo mai. Thenkhat erawh chuan Lalpa rawngbawlna ni ve tawha an hriatah chuan langsar leh langsar lo pawh thliar lova Lalpa tan tia a, chak leh phur taka ti mai (Kolossa 3:24) an awm ve thung a ni. Mahni leh mahni inphatsan ngam nunah chuan rawngbawlna hlawhtling Lalpa thiltih ropui an hmu thin, chu chuan rawngbawlna kawnga pen zel chakna a pe thin a ni. Piangthar inti ringtu nunkawng zawhnaah hi chuan mihring ze hluite, Lalpa avanga paih ral ngamte nun hi Lalpa hman tlak a lo ni thin.
Sawitur leh ziah tur hi Point tam tak a la awm teuh thei ang. Heng kan point rawn sawi zawng zawng hi a taka chang leh hmang thei tur leh rawngbawlna hlen tur chuan Pathian ralthuam famkim (Ephesi 6:13) Bible chhiar leh tawngtaina hi a pawimawh ber a ni. Ringtu, tawngtaina ngaina lo leh a thu chhiar peih lo reng rengte hian rawngbawlna kawng hi nuam leh lawm takin an zawh peih lo a, an tlu chhe leh fo thin a ni.
Aw le, he ka thu ziak hi a lo chhiartu zawng zawngten Pathian zara rawngbawlna hlenna kawnga hma in lo sawn pui theih nan Lalpan malsawm che u rawh se, Amen.
“Chaklo chung pawhin Khawvel nun khengbetin tiam chin lam pan a tul si a.”