I RAWNGBAWLNA KHA HLEN RAWH
R. Lalrintluanga
II Timothea 4:5 “Nang erawh chu engkimah fimkhur la, hrehawm tuar la, Chanchin Tha hriltu lam hna thawk la, i rawngbawlna kha hlen rawh”.
‘Rawngbawlna’ han tih hian zawhna awm thei a awm nual mai. Eng nge rawngbawlna chu? Engtin nge kan hlen chhuah ang? Hlen chhuak turin eng nge kan mamawh? tihte leh a dangte pawh a awm thei nual awm e.
Rawngbawlna awmzia : Kristian, Isua Krista zuitu kan ni a. Chuti anih chuan Kohhran te, thalai huang chhung angah te leh Fellowship Organisation hrang hranga kan tih tur leh chanvo kan hlen chhuah hi rawngbawlna a ni thei mai em? Ngun taka han chhut erawh chuan rawngbawlna han tih hian chu ai chuan a lo huam zau fe thung si a. Ni e, Kohhran huang chhunga kan telna hi rawngbawlna chu a ni teh meuh mai. Mahse chumi piah lamah chuan kan nitin hun kan hmanna hmun kan eizawnna te, then leh rual kan kawmna te, kan awmna hmun apiang mai hi rawngbawlna hian a lo huam vek zawk hi a lo ni a. Chuti anih chuan ringtu kan nih chuan kan awmna khawi hmun mai pawh hi kan rawngbawlna hmun a lo ni vek zawk tihna anih chu.
Engtin nge kan hlen chhuah ang? : Rawngbawlna kan hlen chhuah dan tur chu a chunga Bible thu kan tarlanah khian chiang takin a inziak reng mai a.
Engkimah fimkhur la : Bible-ah ‘in nun hi fimkhurpui hle teh u’ (Jeremia 17:21) tih kan hmu a. Chumi awmzia chu kan vela ringlo mite hian min chhiarin min thlir reng thin a, ringtute ngei pawhin. Kan awmdan, kan tawngkam, kan sawi duhzawng leh kan incheina thleng hian ngun takin min teh reng thin a ni. Keimahni nun an chhiar atanga Isua hmel hmuh tur a awm si loh chuan kan rawngbawlna kan hlen chhuak lo tihna a ni dawn a ni. ‘Sunday Christian’ tihte hi a lar ta hle mai. Sunday chauha fel taka awm thin, mahse weekdays velah hnathawhna hmunah leh midangte bula an nuna Krista hmel hmuh tur awm si lo tihna a ni ber ang chu. Kan rawngbawlna hlen chhuak tur chuan kan nun danah krista hmel a lan theihna tura fimkhur a ngai hle tihna a ni. “Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u.” Hebrai 12:1
Hrehawm tuar la : Bible-ah kan hmu a, Isua zuitu nun kawng hi kawng awlsam a ni lo. “Tupawhin mi zui a duh chuan mahni hrehawm pawisa lovin, a kraws puin mi zui rawh se.” Matthaia 16:24 (Marka 8:34, Luka 9:23) tih kan hmu. Khawvel thil tak pawhin han chhut ila, mi hlawhtling leh mite awh khawp ni tur chuan kan hnathawhna/eizawnna zawnah theuh chhel tak leh taima taka kan thawh a ngai a. Hlawhtlinna tlanga ding thei tur chuan hrehawm tam tak pal tlang a ngai thin. Mizote zinga Mt.Everest lawn chhuak hmasa ber Pu David Zohmangaiha an kawmna in thlir ve anih chuan Everest tlang chhip lawn chhuak tura hrehawmna leh harsatna tam tak a pal tlangzia in hre ve thei ang. Pathian hnung kan zuinaah pawh hian Amah Isua ngei pawhin kawng awlsam a nih lohzia te, hrehawm tam tak pal tlanga Pathian ram lut tur kan nihziate a sawi mai bakah Amah ngei pawhin hrehawm tam tak pal tlangin krawsa thiin chhandamna min siamsak anih kha. Mizorama Kristiante han inthlir ila, Krista avanga hrehawmna kan tuar hi a tlem a ni tiraw. Kan Kristianpuite tihduhdahna leh nekchepna karah hrehawm nasa tak tuarin an awm thung si. Chuvang chuan kan phak ve tawka hrehawm ti chung chunga ke kan pen luih vena te, peih vak lo chung pawha kan kal luihna te, thawhpuiten eiruk avanga hausa taka an awm laia Pathian avanga eiru ve duh lova kan retheihna te, thian ten zu leh sa leh nulat tlangval nawmna an chen laia chak ve takchunga kan insumna te, midang neih kan neih ve phak loh avanga lungawi lo taka awm chung sia Pathian avanga kan inhnem lungawi leh theihna te leh a dangte pawh, rawngbawlna kan hlen chhuah nana hrehawm kan tuarna a lo ni ve reng a nih chu. “Pathian rawngbawltute angin engkimah mi mit tlungin kan awm zawk thin, nasa taka chhelnaah te, hrehawmnaah te, neksawrnaah te, hnawhchepnaah te.” II Korinth 6:4.
Chanchin Tha hriltu lam hna thawk la : Engtin nge Chanchin tha hriltu kan nih ang? Midangte bula Pathian Thu sawi te, Missionary-a kal te, Biak Ina Pathian Thu sawite chauh hi Chanchin Tha hriltu nihna a ni thei angem? Hengte hi Chanchin Tha hriltu nihna kawng khat chu a ni ngei mai. Mahse heng bakah hlen chhuahtur leh tihtur tam tak kan nei a ni. Kan awmna hmun theuhah hian Chanchin Tha kan hril thei a ni. Sunday a lo ni a kan inkhawm a, Sunday school kan kala, kan fellowship thin bawk. Monday atangin kan hnathawhna hmun kan pan leh ta theuh a, zirlai chuan kan zirna hmun. Biak Ina kristian tha em em si kha kan zirna emaw kan hnathawhna hmuna kan tihtur