– Upa Dr. B. Laldinliana,
Medical Superintendent, CHS
Kohhran member zawng zawngte Medical and Health Department hmingin chibai ka buk a che u. Pathian khawngaihna azarah BCM chuan tihdam rawngbawlna kum 90 chuang a lo kal pui ta a. Mi tam tak tan damna leh malsawmna niin Lal Isua Krista ngaih pawimawh tihdamna hna chu BCM chuan he hospital kaltlang hian a la thawk chhunzawm zel a. India ram leh khawvel hmun hrang hrangah tihdamna hna bul tantu te chu Christian-te an ni thin a. Hospital tha tak takte leh Medical College eng emaw zat dinin tun thleng hian hmahruaitu pawimawh tak an la ni reng a ni. Tunah hian India rama Mission Hospital hrang hrangah belhkhawmin damlo khum 80,0000(singriat) vel a awm a, chung hmang chuan tihdam rawngbawlna hi kalpui a ni a.
Kan Zosap Missionary-te pawhin an lo chhuah tirh phat atangin he rawngbawlna hna hi an thawk nghal a. Hospital mamawhna hriain building hi 10th February 1923-a hawn a lo ni a, mumal zawka he rawngbawlna hi kalpui zel a lo ni ta a ni. Hospital history leh hmasawn zel dan chu BCM Ni pawimawh buah chipchiar zawka ziak a ni a. Tunah hian Serkawnah khum 104 leh Lawngtlaiah khum 25 awmin rawngbawl mek a ni a. Tin, Nursing School-ah kum tin students 20 lain GNM course kalpui chhunzawm zel a ni. A remchan dan angin thingtlang leh hmun kilkhawr mamawhnaah te clinic neih thin a ni a, hei hi kan kalna ten an chhawr viau thin. Mahse, harsatna hrang hrang avangin duh anga tam kan kal thei lova, theih anga tam clinic hi neih tum zel a ni ang. Tunah hian Serkawnah Medical Officer 9, Dental surgeons 2 leh thawk tu dang 126 kan awm a, Lawngtlaiah Medical Officer 2 leh thawktu dang 31 kan awm. Doctor P.G. ti tura inbuatsaih (House job ti lai)- 1, Msc Nursing zirlai -1 leh Post Basic Diploma Nursing zirlai- 1 kan nei a, CMC Vellore-ah MBBS sponsored students 4 kan nei mek bawk.
He Hospital hi chhim lama damlote innghahna ber a ni thin. Tunah hian Sawrkar leh Private lama Medical service-in hma a lo sawn ta hle a. Chuti chung chuan Kohhrante hian tihdam rawngbawlna hna kalpui zel hi kan tih tur (mission) pawimawh tak a la ni reng a, Kohhran awm chhung chu a ni zel ang. Tin, Mission Hospital ten he rawngbawlna kan kalpui naah hian tisa/taksa tihdamna ringawt hi kan tum a ni lova, rilru leh thlarau damna hna kan thawk tel thin. Hei hi sawrkar leh private hospital-te nena kan danglamna tur chu a ni. Tin, tun laiin tihdamna hi mi tam tak sumdawnna (commercial) rilru pua thawk an awm a, damlo mamawh bak enkawlna leh investigations thleng tih a awm thei. Mission Hospital-ah chuan damlo ten damna tura an mamawh ang chin chauh rintlak taka thawh hi kan tum a ni bawk.
Kum 2014-2015 Financial year-ah hian Medical and Health department budget chu Rs.93,943,000/- a ni a, heta tang hian Rs. 86,443,000/- chu Hospital thawh chhuah tura tih a ni. Tin, thawh chhuah tur chin budget hi thawk chhuak pawh ni ila, hospital tan chuan hlep a awm chuang lova, kan inenkawlna leh hlawh daih tura ruahman a ni a. Tin, damlo eng emaw zatin ba min neih sakin, eng emaw zatin an pe thei lo bawk a. Kum 5 kalta chhunga damloten min bat sak leh pek theih loh tling khawm chu Rs, 75,00,000/- a tling. Amaherawhchu, heng zawng zawng hi rawngbawlnaah kan ngai a, hloh-hlepa kan chhiar vena a ni. He Hospital-a enkawl tura rawn tlu lutte hi eng ang mi pawh ni se sum harsat vang emaw thil dang vangin emaw kan hnar ngai lo va. Kum tam tak a thlawna enkawl pawh kan nei a, awm man pek tur nei lo tih hriat rengte pawh rei fe fe enkawl kan nei fo thin. Hetiang anih avang hian awm man pe thei tur dinhmuna dingte hi chuan ngai pawimawha pe hram tur pawhin kan in beisei thin a ni.
He Hospital hi BCM ta a nih angin Kohhran member zawng zawngte kan tel vek a, kan vaia rawngbawlna a ni. Lal Isua chuan ‘rawngbawlsaka awm tur ni lovin, rawngbawl tur leh mi tam tak tlan nana a nun pe zawk turin a lo kal a ni si’ a ti a( Marka 10:45). Hei hi kan thupui ni thei sela, keimahni ropuina turte, nawmna tur leh changkanna tur thlir lovin kawng hrang hranga min mamawhtute tana rawngbawltu leh malsawmna thlentu, damna thlentu kan nih a pawimawh a ni. Tun kum atang hian Assembly chuan Christian Hospital Sunday zing thawhlawm chu Hospital Poor Fund atan pek ni se tiin a lo rel ta a ni.
Kum kalta (2014) chhungin Pathian awmpuina leh malsawmna tam tak kan dawng a. Mimal/chhungkua, Pawl, Kohhran, Sawrkar leh BCM Hqrs kal tlangin hmasawnna tam tak kan hmu a. Private Cabin Block thar- Cabin 8, Student sick room-1 leh Nursing station 1 awm theihna kan hawng thar a. ICU khum 2 awmna (emergency-ah chuan 3 dah theihna) kan peih fel a, Central line Oxygen supply system O.T. ah leh ICU ah te kan nei thar a, Ambulance thar tha tak kan nei a, Diesel generator 25 KVA kan nei thar bawk a, Ultrasound Machine 1 leh Cardiac Monitor kan lei thar a. Hospital compound chhung Internal Road resurfacing chu High Power Committee, Lunglei kaltlangin tih a ni a. Tin, tun kumah hian ICU-a hman tur Ventilators 2 nei turin hma lak mek a ni a. Assembly chuan Dialysis Machine leina turin Special Appeal a siam mek a, MBKHP-in Colposcope (chhul enna khawl) leina tur an tuak mek bawk.
Christian Hospital Lawngtlai Main Building chu a tira plan aia liana kalpui turin hma lak mek a ni bawk. Tin, kan mamawh lian tak chu Doctor a bik takin specialist-te an ni. Tunah hian Gynaecologist (hmeichhe lam specialist)-1, M.S. General Surgeon (inzai lam specialist)-1 leh Family Medicine(FCAMS)-1 te kan nei a, kawng danga specialist-te kan mamawh bakah an ni hi pension-a an chhuah hun a hla vak tawh lova. Chuvangin, Pathian hnenah specialist thar an lo luh theihna tur leh tuna doctor thawk mekte hian specialist an zir theihna tura tawngtai zel a pawimawh a ni. A tawp berah chuan Christian Hospital motto ‘We treat, God heals’(Tidamtu chu Pathian a ni a, keini chu a hmanrua mai kan ni) ang hian BCM Medical and Health Department hi Lal Isua tihdamna chhunzawmtu leh a hmanrua a nih zel theih nan BCM member zawng zawngte kan thawk ho zel dawn nia.