CHANCHIN THA PUAN DARH HNA HI LALPA’N MIN PE

CHANCHIN THA PUAN DARH HNA HI LALPA’N MIN PE

– R Lalchama

Tichuan, Isua chu an hnenah a lo kal a, anni ho chu a bia a. “Lei leh vana thuneihna zawng zawng ka hnenah pek a ni tawh, chutichuan kal ula, hnam tin ami zirtirah te siam ula, Pa leh Fapa leh Thlarau Thianghlim Hmingah chuan baptis ula, thu ka pek zawng zawng che u pawm turin zirtir rawh u. Tin, ngaiteh u, kei kumkhuain, khawvel tawp thleng pawhin in hnenah ka awm zel ang” a ti a (Mathaia 28:18 – 20)
Kan Lal Isua thusawi kan han tarlan hi zirtir sawm leh pakhatte, palting ho hnenah a ni. Anni ho hi he khawvela A lokal chhan tihlawhtling tura hmun hrang hranga A rawngbawlpui te an ni. Lal Isua chuan boralte zawnga chhandam tura lokal a nih a sawi chu Ama nun ngeia kraws a lo tling tlak hnua thlan ata A thawh leh hnuah he thu ropui tak mai hi an hnenah vana a lawn hmaa a thusawi a ni. Thupek ropui ber a ni. Chu thuchah lo dawngsawngtute avang chuan keini khawvela ram te leh ram kilkhawr ber pawh Pathian malsawmna nasa taka vurin kan lo awm ta a nih hi, Lalpa chu fakin awm rawh se.
Awle, Lal Isua thusawi ngaithlatute hi patling sawm leh pakhatte an ni a, anni ho hian Lal Isua zuitu an nihna hre rengin an bawhzui ta a nih kha. Chutiang bawkin keini, Baptis Kohhran hote pawh hian Lal Isua inpekna hlu tak avanga kan nuna thil tha tam tak kan chan hi chang ve lo leh nei ve lote hnenah, pe chhuak ve ngei tura hriattir turin Lalpa laka kan mawhphurhna hi muang lova penchhuah pui a, midangte tana malsawmna kan lo nih zel theih nan Kohhran hote hi Pathian Ram Chanchin Tha chu mite thinlungah chi tha anga a lo to ngei theih nan Chanchin Tha puanchhuah hna chhunzawm turin Lalpa’n min la ko chhunzawm zel a ni tih i lo hre thar leh ang u. Hetiang vanneihna ropui tak hi kan chhang ve dawn lawmni? Fak hla siamtu chuan heti hian min hrilh a ni;
“I kiangah thimah mi an thi,
Thlanah thlamuanna nei lovin;
Meichher lain chhi eng zau rawh,
Thim chhah ber pawh a kian tir ang”
He hla thu hi ngun taka kan ngaihtuah chuan keini Pathian Chhandamna ropui tak changtute tan chuan thawh tur a va han tam tak em! Lalpa kohna hretute hi kan thu mai mai dawn emni? Pawisa, suma lei theih loh, Pathian Hmangaihna tuipui luangchhuaka sual tlenfaina la chang ve lote tan, hun tha Lalpa’n min pek lai hian patling sawm leh pakhatte hnena thusawitu ngei khan Kohhran hote hi min la ko reng a ni e. ‘Nakinah’ ti lovin tun atang hian i thawkchhuak ang u. Kan Lal Isua chuan a‘ boralte zawnga chhandam tura a lo kal chhan chu Luka 19:10 ah min hrilh kha. Chuvang chuan ringtu mi piangtharte tan khawvel hun hmawr tawh takah hian Amah zuitute tan awm mai maina hun kan nei tawh lova ni e. Hemi kawngah hian lungrual taka ke kan pen tlan zel theih nan Lalpa’n min sawmna chhanga hmasawnna kawng zawh zel turin Thlarau Thianghlimin min hruai zel rawh se. Lalpa’n A thu kan zavai atan mal min sawm sak theuh rawh se.