A KIM LOVIN KAN HRIA A, A KIM LOVIN THU KAN HRIL BAWK THIN A NI. (I Kor 13:9)
Vanlalnghaka Hnamte
He khawvela kan awm chhung, mihring taksa pu kan nih chhung hian Pathian mi zia hi hriat fiah a har khawp mai. Pathian hi kan hmuh dan a in ang lovin, a hrang theuh awm e. Amaherawhchu, kan biak Pathian a hi chu hmunkhat a ni lawi si. Zawlnei Jeremia pawh hian a hrethiam lo ve hle a ni ang. ‘Mahse, ka vuina thu chu ka sawi tho dawn. Engatinge mi suaksualte kawng a hmuingil thin ni? Engati nge bumhmang tawh phawtte chu nuamsa taka an awm thin le?’ a lo ti hial a ni.
Pathian awmzia/nihna an hrilh fiahna atana ‘Sangha dil chhunga awm’ theory an hmang thinte pawh hi a awm ve tho a ni. Sangha dil chhung lam chu sangha khawvel a ni. A hriatthiam chin chu dil chhung chauh a ni. Dil chhung tui chu a nunna khuahkhirhtu a ni. Chutiang ang deuh chuan keini mihringte pawh hi Hun (Time) hian min khuahkhirh tlat mai a ni. A dil pawn lamah chuan khawvel lian zawk a la tlawh pawh loh zau em em mai a awm a ni. Sangha chu tui pawn lama nunna awm hrethiam lo turin tuiin a khuahkhirh tlat a ni. Dil pawn lam chu mumang ang ruaiin a hmu a ni an ti thin. Galaxy dangah hian zin tum ila kan damchhung kum hian min daih lo hrim hrim a ni. Milky way Galaxy atanga galaxy hnai ber hi The Canis Major Dwarf Galaxy a ni. Chu Galaxy chu ni (sun) atanga tehin Kum 25,000 ah eng (light year) anga chakin kal ila kan thleng ang. Mahse mihring hi eng anga chak a kal chu a har viau ang. Kum 70-80 vel dam thin hian 25,000 light years chu a rei em a ni. Chuvangin kan hriatna hi tawp chin (limit) nei a ni. Thufingte 3:7 “Mahni ngaihin intifing suh la” tih a ni. Pathian hi mi pakhat chiahin a hre chiang chu chu a fapa Isua Krista a ni. Matthaia 11:27 “Pa lo chuan tumahin Fapa hi an hre lo; Fapa leh an hnena Fapain a puan duhnate chauh lo chuan tuman Pa chu an hre hek lo” I Korinth 12:3. “ Tin, tuman Thlarau Thianghlimah chauh lo chuan, “Isua chu Lalpa a ni,” an ti thei ngai lo tih ka hriattir a che u.” A fapa Isua Krista duha pawm tute hian Thlarau thianghlim atangin Pathian duhzawng chu an hre thiam mai thin a ni. Sawizel chakawm rualin duh tawk mai ang.
Pathian rorelna kan hriatthiam loh ber zinga kan sawi fo thin a ni. Bible a zawlnei langsar tak Jeremia zawhna hi, i lo chhang dawn ila (Bible vek hmangin). A chhan chu Pathian hmangaihna vang a ni. II Petera 3:9 “Tuma boral duh lova, mi zawng zawng lo sim duhin, nangmahni lamah a dawhthei a ni zawk e.” tihian ilo ngaihtuah zel ang. Kohhrana chawhpawlh nun nena rawng lo bawlte, thenkhat kohhran a tel duhlo, a chhiatna lai apiang lo sawi thinte pawh hi, Pathian hmangaihna hian a la khuh vek a ni. An boral loha chatuana nunna an neihna turin Pathian hmangaihna chuan khawngaihna nen, an sim theih nan hun a la pe mai zawk a ni. Hei vang tak hian alawm keini Piangtharte (Suala tlu tawh, Pathian ngaihdamna changte) pawh hian Pathian hmangaihna hi kan tawmpui ve a ngaih thinna chhan chu. Mihring dawhtheihna chuan a tlin kher lo. Camp vawi 10-lut tawh, vawi 10 piangthar da leh tawh pawh hi Pathian hmangaihna chuan a sim hun a la nghak thei cheu a ni. Mihring chuan han hal deuh puat mai hi chakawm ve deuh mai a ni. An sual, an thup tumna lamah hian ringtute thiamloh min chantir thin bawk nen (Setana zia). Simlo erawh chu a kuangkuah hauh lo, a sim erawh chuan a thiltih sual zawng zawng thaibo sakin a fa-ah a pawm leh si thin. Pathian hi chu a ropui a ni. Chuvangin, ringtu i beidawng a. Lalpa an duh lo a niang tiin kalsan ringawt suh. Lalpa dawhtheihna hi engchennge i hriat loh avangin, lo thinrim hmanhmawh suh! (Nangpawh khawngaihna avanga chhandam i ni si a). I zui Krista hmangaihna chu ngaihtuahla, siam tharin i lo awm thei dawn a ni. Krista i hmangaih khan, an tan thisen chhuakin a tuar sak si a. Hmangaihna avangin huat ve i tumna kha paihthla la Krista hmangaihna chuan in thuam thar leh thin ang che.
Pathian hmangaihna hi Pathian chaklohna (khawvel mite ngaihah) a ni. Kraws hi khawvel thil hmusit awm ber a ni awm e. Kraws-a thih kha thil zahthlak a ni. Mite hmuhsit leh mawl tih hlawhna chi khat a ni Isua zui hi. Marka 8:34 “Kraws puin mi zui rawh se” Lal Isua’n a ti a ni. Min hmusit tute hmangaihte, nuihza fiamthu a min hmangtute hnena chanchin tha hrilh hi Krista hnungzuina kawng chu a ni. Mite sum dik lo nena an lo hausak thur thur laia, dikna nena lo retheih ngam te. Dawt sawia fihlim mai thei mahse thudik sawi avanga buaina lo chhuakte (Dawt hmuchhuaktu chu Diabola a ni si a Johana 8:44). Heng kawng hrang hrangah hian i Kraws puin mahni hreawm pawh pawisa lo in Krista zui turin i han in tiam thar leh ang u hmiang.