THUHRUK THEIH LOH NUN
Esther LD Hrahsel
“Khawvel eng in ni e, Tlang chhipa khaw awm chu thuhruk theih a ni lo… chutiang bawkin in eng chu mi mithmuhin eng rawh se” Matt 5:14-16
Chhiartu duh tak, Isua Krista hmingin chibai le. Kei, engmah lo ber, Juniper Editorial Board-ten thuziak ve tura min sawm hi ka lawm hle mai. Krista-a i eng, midangte hmuha a lan theih nan Lalpan mal a sawm ngei ka beisei.
Ka bible chang thlan khi ka thinlunga nung ve tlat a ni a, keima nun ngei pawh ka thuziahah hian ka in rin lut tel ve tho tih ka sawi hmasa duh a ni. Pathian thu chuan, “Miin khawnvar halin hrai hnuaiah an dah ngai lo” a ti a. A chhan pawh in chhung zawng zawng en tu tur a nih vang a ni. Chutiang bawk chuan keini pawh mi piangthar, Krista-a nun neitu kan ni tawh anih chuan midangte hmuh theih tura nun eng chhuak, thup bo theih loh, thuhruk theih loh nun lan chhuah tirtu kan ni em? tih inngaihtuah a tul hle a ni.
Kan khawsak phung, eizawnna etc in hriat pui ve lo mah ila, a tlangpui chu kan in hre ve chiang fu tho mai. Kan inthenawm khawvenna leh hetiang thil ho te anga langah pawh hian tunge kan nih mahni ngei inbihchian a va tul em…
Kohhranah a kul a taia in hmang, Activity hrang hrang mawhphurhna leh chanvo tha taka hlen thin, sum leh pai thawhchhuahnaah pawh chhuanawm, thiamna leh finna lamah pawh zahpuiawm lo tak kan ni pawh a ni mai thei e. Mahse, chutiang mi ni-a kan lan mek lai hian, kan rawngbawlpui, hnathawh pui, inchhungkhur khata kan chenpuite ngei leh Setana bumna avanga boral mekte hian eng angin nge min hmuha, min ngaih tih kan chhut ngai em le?
Kawng hrang hranga thawk tha hle si hian, engatinge thlarau nunah kan than mawh viau a, hmasawnna hmel hmuh tur a tam loh hle si?!! Kan hmalakna peng hrang hrang midangten tel ve an chak loh phahna Kristian nih pawh hi thil awm ve thei tho a ni a. Keimahni theuh kan in hre chiang in ka ring.
Kan Pathian, A rawng kan bawl sak hi chuan pawn lam leh lang thei lam ni lovin, ‘CHHUNGRIL’ a en zawk a, tisa-a felna leh thahnemngaihna ai chuan chhungrila ‘TAKNA’ hian kan mihringpuite thinlungah nghawng a nei lian zawk. Bible chuan mi mithmuha eng turin min zirtir a, ‘Tlang chhipa khaw awm chu thuhruk theih a ni lo’ tih thu min hrilh bawk. Pang lehlam chauha hmuh theih ni lovin, khawi lam atang pawhin lang thei a ni tur a ni. Chutiang bawkin keimahni-ah Krista eng hi a awm tak zet anih chuan mi pakhat tal chuan tlan pah pawhin a chhiar thei tur a ni dawn lawm ni? Nge ni a …… midangte hmuh tham loh khawpa eng chau rau kawltu kan lo ni tawh zawk..?
Tunlai thil awmzia ngaihtuah hian ringtute hian kan nihna hi zahpui a, tih nep hun a ni tawh lova, midangte hmuhtheiha lan tirtu Kristian kan nih hi a hun tawh tak zet a ni.
Keimahni ngei hi, kan thil tih that avanga miten Amah(Pathian) an hmuh a, an chawimawi ve hun tur hi Pathian chuan a nghakhlel khawpin ka ring. Tuna kan awmdan hi duh tawk mai lovin, hei aia nasa zawka Krista tana eng chhuak a, thuhruk theih loh nun kawltu kan nihna hi huaisen taka lan chhuah tir zel turin theih tawp chhuahin i tang sauh sauh ang u. Chu hun chu a chakawm a, a nghahhlehawm a, a duhawm em em bawk a ni.
A thu malsawm thintu Pathian fakn awm rawh se.